ఆత్మహత్య నివారణపై అవగాహన కార్యక్రమం

రాజంపేట ప్రభుత్వ డిగ్రీ కళాశాలలో ఆత్మహత్య నివారణ పైన అవగాహనా కార్యక్రమం సోమవారం నిర్వహించారు. ఈ కార్యక్రమం స్థానిక పోలీస్ డిపార్ట్మెంట్ ఆధ్వర్యంలో నిర్వహించడం జరిగింది. ఈ కార్యక్రమంలో కళాశాల ప్రిన్సిపాల్ డాక్టర్ బి. పురుషోత్తమ్ తన సందేశాన్ని వినిపించారు.

ఆయన మాట్లాడుతూ జీవితం చాలా విలువైనదని, ఆత్మహత్య చేసుకోరాదని, భావోద్వేగాలను అదుపులో ఉంచుకోవాలని విద్యార్థులకు సూచించారు. ఈ సందర్భంగా ఆత్మహత్యకు ప్రేరేపించే పలు అంశాలను సైకాలజీ పరిభాషలో వివరించారు. ఈ సందర్భంగా సైకాలజిస్ట్ చంద్రశేఖర్ మాట్లాడుతూ మానసిక వత్తిడి, భావోద్వేగాలను అదుపులో ఉంచుకోలేక పోవడం, ఆకస్మిక సంఘటనల వలన ఆత్మహత్యలకు పాల్పడుతుంటారని, ఎట్టి పరిస్థితుల్లోనూ వాటిని తమ అదుపులో ఉంచుకోవాలని విద్యార్థులకు సూచించారు. ఎన్నో వ్యయ ప్రయాసలకు ఓర్చి మీ జీవితాలను చక్కదిద్దాలని మీ తల్లిదండ్రులు ఆలోచిస్తారని, వారి ఆశలను అడియాశలు చేయరాదని చెప్పారు.

ఈ కార్యక్రమంలో డి. యస్. పి. శివ భాసకర్ రెడ్డి మాట్లాడుతూ భావోద్వేగాలను అదుపులో ఉంచుకోలేక చిన్న చిన్న కారణాలకే ఆత్మహత్యకు పాల్పడుతుంటారని, ఈ చర్యకు పాల్పడే ముందు విద్యార్థులు ఒక్కసారి తమ తల్లిదండ్రులను గుర్తు చేసుకోవాలని సూచించారు. అమ్మాయిలు ధైర్యంగా ఉండాలని, ఆత్మహత్య చేసుకుని జీవితాలను కోల్పోరాదని తెలిపారు. ఈ కార్యక్రమంలో సర్కిల్ ఇన్స్పెక్టర్ యస్. వి. నరసింహరావు మాట్లాడుతూ ప్రపంచంలో కేవలం మనిషి మాత్రమే ఆత్మహత్యకు పాల్పడే జంతువు అని, దీనికి కారణం పరిస్థితులను ధైర్యంగా ఎదుర్కొన లేకపోవడమే నన్నారు.

మరణం సహజ సిద్ధంగా రావాలి గాని బలవణ్మరణం తగదని తెలిపారు. ఈ కార్యక్రమంలో సబ్ ఇన్స్పెక్టర్ వి. యల్. ప్రసాద రెడ్డి గారు మాట్లాడుతూ సమస్యలు లేని వారు ఈ ప్రపంచంలో ఎవరూ లేరని వాటిని ధైర్యంగా ఎదుర్కొని పరిష్కార మార్గాలను చూసుకోవాలని, తమ సమస్యలను ఇతరులతో పంచుకోవడం వలన కొంత మానసిక వత్తిడిని తగ్గించుకోవచ్చని చెప్పారు. గురు పూజోత్సవం సందర్భంగా ఈ కార్యక్రమంలో పాల్గొన్న ప్రిన్సిపాల్ ని ఉపాధ్యాయులను పోలీసు డిపార్ట్మెంట్ తరుపున శాలువా కప్పి సన్మానించగా, సైకాలజిసస్ట్ చంద్రశేఖర్ ని ప్రిన్సిపాల్ కళాశాల తరపున శాలువా కప్పి సన్మానించారు.