కృష్ణా జిల్లాలో తీవ్ర విషాధం నెలకొంది...నలుగురి మరణం

కృష్ణా జిల్లాలో తీవ్ర విషాధం నెలకొంది. పుడికతీతకు వెళ్లిన నలుగురు ప్రాణాలు వదిలారు. బావిలో పూడిక తీసేందుకు దిగిన నలుగురు ప్రాణాలు కోల్పోయిన విషాదకర ఘటన కృష్ణా జిల్లాలో శుక్రవారం మధ్యాహ్నం చోటుచేసుకుంది. బుంటుమిల్లిలో బావిలోని పూడిక మట్టి తీసేందుకు వెళ్లిన నలుగురు ఒకరితర్వాత ఒకరు మృతి చెందారు. బావిలోని మట్టి తీసేందుకు వెళ్లిన క్రమంలో ఈ ఘటన జరిగింది. మృతుల్లో ఒకరు ఇంటి యజమాని కాగా, ఇద్దరు బంటుమిల్లి బిఎన్ఆర్ కాలనీకి చెందిన తండ్రి కొడుకులు, మరొకరు ములపర్రు గ్రామానికి చెందిన వ్యక్తి అని స్థానికులు తెలిపారు. మృతులను శ్రీనివాసరావు, లక్ష్మణరావు, రామారావు, రంగాగా గుర్తించారు.

ఈ నలుగురూ బావిలోని పూడిక తీసేందుకు వెళ్లి.. ఊపిరాడక స్థానికులు తెలిపారు. ఒకరు బావిలోకి దిగిన తర్వాత విషవాయువులతో ఊపిరిరాడకపోవడంతో అతడ్ని కాపాడేందుకు ప్రయత్నించిన మిగతా ముగ్గురూ ప్రాణాలు కోల్పోయారు. ఒకరి తర్వాత ఒకరుగా ఊపిరాడక మృతి చెందారు. దీంతో గ్రామంలో తీవ్ర విషాదం నెలకొంది. బాధితుల కుటుంబాలు కన్నీరుమున్నీరుగా విలపిస్తున్నాయి.

కొండా రంగా నివాసంలోని ఓ నేల బావి చాలా రోజులుగా పూడిపోయింది. పక్క నుంచి మురుగు కాలువ వెళ్తోంది. ఇటీవల వర్షాలకు నేలబావి వద్ద నీరు నిలిచిపోవడంతో భూగర్భ జలాల పరిరక్షణ కోసం బావిలోని పూడికతీసి శుభ్రం చేయాలని రంగా భావించినట్లు పోలీసులు తెలిపారు. పూడిక తీసేందుకు బంటుమిల్లికి చెందిన తండ్రీకొడుకులు వంజుల రామారావు, లక్ష్మణరావుకు పని అప్పగించారు.

సాయంత్రం నాలుగు గంటలకు బావి పూడిక తీస్తున్న సమయంలో రంగా, ఆయన సహాయకుడు మూలపర్రుకు చెందిన శ్రీనివాసరావు బావిలోకి దిగారు. నలుగురూ ఊపిరి తీసుకోలేక బావిలోకి దిగిన కొద్దిసేపటికే సొమ్మసిల్లిపడి.. ఆ తర్వాత ప్రాణాలు కోల్పోయినట్లు స్థానికులు చెబుతున్నారు. విషవాయువుల వల్ల ఊపిరాడక మృతి చెంది ఉంటారని పోలీసులు, అగ్నిమాపక సిబ్బంది అభిప్రాయపడుతున్నారు. ఘటన గురించి సమాచారం అందుకున్న వెంటనే అక్కడకు చేరుకున్న పోలీసులు బావిలోని మృతదేహాలను బయటకు తీశారు. కేసు నమోదుచేసి వివరాలు సేకరిస్తున్నారు.