బాంబులా పేలిన ఎల్ఇడీ టీవీ..ఒకరి మరణం..నలుగురికి గాయాలు

ఎల్ఇడి టీవీ ఓ బాంబులా పెళ్లిన షాకింగ్ ఘటన ఉత్తరప్రదేశ్‌లో చోటుచేసుకుంది. ఘజియాబాద్‌లో ఓ ఇంట్లో ఎల్‌ఈడీ టీవీ బాంబులా పేలింది. ఈ ఘటనలో ఒక 16 ఏళ్ల బాలుడు చనిపోయాడు. మరో నలుగురికి తీవ్ర గాయాలయ్యాయి. పేలుడు తీవ్రతకు ఇంటి గోడలు పూర్తిగా ధ్వంసమయ్యాయి. ఈ ఘటనతో స్థానికులు భయాందోళనకు గురయ్యారు. అయితే తొలుత అందరూ ఇంట్లో గ్యాస్ సిలిండర్ పేలిందని భావించారు. తర్వాత ఇంట్లోకి వెళ్లి చూడగా.. టీవీ పేలిందనే విషయం తెలిసింది. ఆ పేలుడుకు ఆ ప్రాంతమంతా పొగ కమ్ముకుంది. అంతేకాదు బాధితుల శరీరాల్లోకి ఎల్‌ఈడీ టీవీ పార్ట్స్ చొచ్చుకుపోయాయి. పోలీసులు తెలిపిన వివరాల ప్రకారం పేలుడులో ఒమేంద్ర అనే యువకుడు తీవ్రంగా గాయపడగా ఆస్పత్రికి తరలించారు. అక్కడ చికిత్స పొందుతూ మరణించాడు. ఎల్‌ఈడీ స్క్రీన్‌లోని పదునైన పార్ట్స్ అతని మొహం, మెడకు తగిలాయని డాక్టర్లు తెలిపారు. అంతేకాదు టీవీనీ ఏర్పాటు చేసిన గోడ పూర్తిగా ధ్వంసమైంది. భవనం స్లాబ్ కూడా డ్యామేజ్ అయింది. ఈ పేలుడుతో అక్కడ పరిస్థితులు బీభత్సంగా మారాయి. పెద్ద శబ్ధం తమకు వినిపించిందని, సిలిండర్ పేలిందని తాము మొదట అనుకున్నామని ఇరుగుపొరుగు వారు చెప్పారు. అనంతరం వారు ఇంట్లోకి వెళ్లి.. బాధితులను చూశారు. ఈ పేలుడు కారణంగా చుట్టుపక్కల బిల్డింగ్‌లకు కూడా బీటలు వారాయి. ఈ ఘటనకు సంబంధించి కేసు నమోదు చేసుకున్న పోలీసులు...దర్యాప్తు ప్రారంభించారు. ఎల్ఈడీ టీవీలు పేలడానికి రకరకాల కారణాలున్నాయి. టీవీలో ఉండే కెపాసిటర్లు వల్ల పేలే ఛాన్స్ ఉంటుంది. ఎందుకంటే కెపాసిటర్ విద్యుత్ శక్తిని నిల్వ చేసుకుని.. బ్యాటరీ లాగా పని చేస్తుంది. టీవీ ఆపరేట్ చేయడానికి, అవసరమైనప్పుడు స్టాండ్‌బై మోడ్‌లో ఉండటానికి అవసరమైన కొద్దిపాటి శక్తిని నిల్వ చేస్తుంది. కెపాసిటర్ నాణ్యత చాలా తక్కువగా ఉండడం, కెపాసిటర్‌లు పాతవి కావడం వల్లే పేలుళ్లు సంభవిస్తాయి. అది కూడా ఈ రేంజ్‌లో పేలుళ్లు సంభవించవని నిపుణులు చెబుతున్నారు. అయితే పేలుడు ఇంత తీవ్రస్థాయిలో ఉండడానికి గది వాతావరణం కూడా కారణమై ఉండవచ్చని అంచనా వేస్తున్నారు. అలాగే వోల్టేజ్‌లో అకస్మాత్తుగా మార్పులు వచ్చినప్పుడు టీవీలు పేలుతాయి. తప్పుడు వైరింగ్ ఉన్న ప్రాంతాల్లో ఇది జరిగే అవకాశం ఉంది. అలాగే టీవీలు వేడెక్కడం వల్ల కూడా పేలే ఛాన్స్ ఉంది. టీవీ చాలా కాలం నుంచి నిరంతరాయంగా పనిచేస్తుంటే.. దాని వల్ అంతర్గత సర్క్యూట్‌‌లు సంభవించి మంటలు లేదా చిన్న పేలుడుకు దారితీసే అవకాశం ఉంది.