అమెరికాలో బియ్యం కొసం ఎగబడుతున్న భారతీయులు,,,సూపర్ మార్కెట్ల ముందు భారీగా క్యూ లైన్లు

భారతీయులు ఎక్కడ ఉన్నా ప్రధానంగా తీసుకునే ఆహారం అన్నమే. ముఖ్యంగా దక్షిణ భారతీయులు బియ్యాన్ని ఎక్కువగా తింటారు. అయితే మన దేశంలో బియ్యం నిల్వలు సమృద్ధిగా ఉన్నాయి. విదేశాల్లో ఉండే భారతీయులు కూడా ఎక్కువగా బియ్యాన్ని వండుకుని తింటారు. అమెరికాలో ఉన్న దాదాపు 90 శాతం మంది భారతీయులు.. అన్నమే ప్రధాన ఆహారంగా తీసుకుంటారు. అయితే అలాంటి ప్రవాస భారతీయులకు ఇప్పడు కొత్త కష్టం వచ్చిపడింది. బియ్యం కోసం సూపర్ మార్కెట్లకు ఎగబడిపోతున్నారు. దొరికిన వారు దొరికినన్ని బస్తాల బియ్యాన్ని తీసుకుని ఇంట్లో పెట్టుకుంటున్నారు. ఇందుకు మన కేంద్ర ప్రభుత్వం తీసుకున్న నిర్ణయమే ప్రధాన కారణం.

దేశంలో బియ్యం ఎగుమతులపై నిషేధం విధిస్తూ కేంద్ర ప్రభుత్వం కీలక నిర్ణయం తీసుకుంది. బాస్మతి, ఉప్పుడు బియ్యం మినహా మిగితా ఏ రకమైన బియ్యాన్ని ఇతర దేశాలకు ఎగుమతి చేయవద్దని నిర్ణయించింది. దేశంలో పెరుగుతున్న బియ్యం ధరలను అదుపు చేసేందుకు మోదీ సర్కార్ ఈ నిర్ణయం తీసుకుంది. అయితే ఈ నిర్ణయమే ప్రస్తుతం అమెరికాలో ఉన్న భారతీయులకు కొత్త తలనొప్పి తీసుకువచ్చింది. బియ్యం ఎగుమతిపై భారత్ విధించిన నిషేధంతో అమెరికాలోని ప్రవాస భారతీయులు ముందు జాగ్రత్తగా భారీగా బియ్యాన్ని కొనుగోలు చేయాలని నిర్ణయించుకున్నారు. దీంతో వెంటనే సూపర్ మార్కెట్ల బాట పట్టారు. దీంతో అక్కడ గందరగోళం తలెత్తింది.

ఒక్కొక్కరు నెలలకు సరిపోయే బియ్యాన్ని ఇప్పుడే తీసుకు వెళ్తున్నారు. దీంతో కొన్నిచోట్ల నో స్టాక్ బోర్డులు దర్శనమిస్తున్నాయి. దీంతో సూపర్ మారెట్ల వద్ద జనం భారీగా బారులు తీరారు. దీంతో సూపర్ మార్కెట్ల యజమానులు ఆంక్షలు విధిస్తున్నారు. ఒక్కొక్కరికి కేవలం 5 బస్తాలే ఇస్తామని కొంత మంది చెబుతున్నారు. మరికొంత మంది మాత్రం ఒక్కరికి ఒకే బ్యాగ్ అని బోర్డులు పెడుతున్నారు. దీంతో ప్రవాస భారతీయులు తీవ్ర ఆవేదన వ్యక్తం చేస్తున్నారు.

బియ్యం కొరత ఏర్పడుతుందని భావించి ముందుగానే కొందామని వెళ్తున్న ప్రవాస భారతీయులకు సూపర్ మార్కెట్లు షాక్ ఇస్తున్నాయి. ఇదే అదనుగా భావించిన సూపర్ మార్కెట్లు ఎన్నారైల నుంచి వస్తున్న డిమాండ్‌ను సద్వినియోగం చేసుకుంటూ బియ్యం ధరలను అమాంతం పెంచేస్తున్నాయి. ఇప్పటివరకు 10 కిలోల బియ్యం ధర 18 డాలర్లు ఉండగా.. ప్రస్తుతం వాటిని 50 డాలర్ల వరకు విక్రయిస్తున్నట్లు కొందరు ట్వీట్లు చేస్తున్నారు. 15 డాల‌ర్ల విలువ గల కిరాణ సామాన్లు కొంటేనే బియ్యం బ్యాగు కొనేందుకు అనుమతి ఇస్తూ కొత్త నిబంధనలు పెడుతున్నాయి. బియ్యం ధరలు, కొనుగోళ్లపై ఆంక్షలు, పెంచుతున్న ధరలపై అమెరికాలో ఉన్న భారతీయులు సోషల్ మీడియా ద్వారా పరిస్థితిని వెల్లడిస్తున్నారు. దీనికి సంబంధించి చాలా ట్వీట్లు చేస్తున్నారు.

దేశంలో ఎల్‌నినో ప్రభావంతో ఈ ఏడాది రుతు పవనాలు చాలా ఆలస్యంగా ప్రవేశించాయి. ఈ కారణంగా వరి పంట ఆలస్యమైంది. దీనికి తోడు ఫిబ్రవరి, మార్చి నెలల్లో కురిసిన అకాల వర్షాలతో చాలా రాష్ట్రాల్లో వరి పంటకు తీవ్ర నష్టం జరిగింది. ఈ నేపథ్యంలో దేశంలో బియ్యం ధరలు రోజురోజుకూ పెరుగుతూ ఉన్నాయి. దేశంలో బియ్యం ధరలను అదుపులోకి తీసుకురావడానికి చర్యలు చేపట్టిన కేంద్ర ప్రభుత్వం బియ్యం ఎగుమతులపై ఇటీవల నిషేధం విధించింది. దీనికి సంబంధించి డైరెక్టరేట్‌ జనరల్‌ ఆఫ్‌ ఫారిన్‌ ట్రేడ్‌ గురువారం రోజు నోటిఫికేషన్‌ విడుదల చేసింది. ఈ క్రమంలోనే అమెరికాలో ఈ పరిస్థితి ఏర్పడింది.

అమెరికాలో దాదాపు 50 లక్షల మంది భారతీయులు నివసిస్తున్నారని అంచనా. ఇందులో 90 శాతం మంది బియ్యాన్ని వినియోగిస్తున్నారు. ఏటా దాదాపు 7 బిలియన్ డాలర్ల విలువ గల 1.25 కోట్ల మెట్రిక్ టన్నుల బియ్యాన్ని భారత్ ఎగుమతి చేస్తుంది. అంతర్జాతీయంగా బియ్యం ఎగుమతుల్లో 40 శాతం వాటా భారత్‌దే ఉంటుంది. ముఖ్యంగా థాయ్‌లాండ్, ఇటలీ, స్పెయిన్, శ్రీలంక, అమెరికా, కెనడా దేశాలకు భారత్ బియ్యాన్ని ఎగుమతి చేస్తుంది. బియ్యం ఎగుమతుల్లో భారత్ కంటే ముందుస్థానంలో చైనా ఉంది.