ప్రమాదవశాత్తు లోయలో పడిన వ్యక్తిని కాపాడిన ఐ ఫోన్

పర్వత ప్రాంత రహదారి మీదుగా కారులతో వెళ్తూ ప్రమాదవశాత్తూ దాదాపు 400 అడుగుల లోయలోపడిపోయిన వ్యక్తి ప్రాణాలను అతడి ఐ-ఫోన్ రక్షించింది. మృత్యువు అంచు వరకూ వెళ్లిన అతడు..టెక్నాలజీ సాయంతో ఈ ప్రమాదం నుంచి బయటపడ్డాడు. అతడి ఫోన్‌లోని అలారం వ్యవస్థ రెస్క్యూ సిబ్బందిని అలర్ట్ చేయడంతో సకాలంలో అక్కడకు చేరుకుని రక్షించారు. ఈ ఘటన అమెరికాలో లాస్ ఏంజెల్స్‌లోని మౌంట్ విల్సన్ సమీపంలో శుక్రవారం చోటుచేసుకుంది. ప్రమాదం గురించి ఎల్ఏ కౌంటీ షెరీఫ్ డిపార్ట్‌మెంట్ ఏబీసీ న్యూస్‌తో మాట్లాడుతూ.. ప్రమాదవశాత్తూ కొండపై నుంచి పడిపోయిన డ్రైవర్ ఐ-ఫోన్ అలారం రెస్క్యూ సిబ్బందిని అలర్ట్ చేసిందని తెలిపింది.

సాధారణంగా ఆ ప్రదేశం నుంచి వచ్చే చాలా కాల్స్‌ ప్రాణాంతక ప్రమాదాలవే అని కౌంటీ షెరీఫ్స్ డిపార్ట్‌మెంట్ రెస్క్యూ అధికారి మైక్ లియం అన్నారు. ఆ ప్రాంతం మౌంట్ విల్సన్ రహదారికి దూరంగా ఉందని చెప్పారు. వాలంటీర్లు, రెస్క్యూ సిబ్బందికి శుక్రవారం రాత్రి 11 గంటల సమయంలో ప్రమాదం గురించి మొదట సమాచారం అందిందని తెలిపారు. ప్రమాదానికి గురైన డ్రైవర్ వద్ద ఉన్న ఐఫోన్ 14 క్రాష్ డిటెక్షన్ ప్రోగ్రామ్ వల్ల ఘటన గురించి తెలుసుకున్నారని లియం అన్నారు.. ఐఫోన్‌లు, యాపిల్ వాచ్‌లలోని ఎస్‌వో‌ఎస్ ఫీచర్‌ దాని యజమాని ఆపదలో ఉంటే ఆటోమేటిక్‌గా ఎమర్జెన్సీ విభాగానికి లేదా కంట్రోల్ రూమ్‌కి సమాచారం అందజేస్తుంది.

పర్వత ప్రాంతాల్లోని రహదారులపై జరిగిన ప్రమాదాల్లో బాధితులను సకాలంలో గుర్తించడం అసాధ్యమని, కానీ, శుక్రవారం నాటి ఘటనలో ఐఫోన్ అతడ్ని రక్షించిందన్నారు. అతడి వద్ద ఉన్న ఐ-ఫోన్ 14 శాటిలైట్ ద్వారా 911కి ప్రమాదం తక్షణమే నివేదించే ఫీచర్‌ను ఉపయోగించింది. GPS పొజిషనింగ్‌ని ఉపయోగించి రోడ్డుపైకి వెళ్లిన తర్వాత కారు ఎక్కడికి చేరుకుందో కోఆర్డినేట్‌ చేసింది. కమ్యూనికేషన్ సెంటర్‌లోని ఒక ఆపరేటర్‌ సాయంతో అక్కడకు చేరుకున్నారు. బాధితుడి అరుపులు విని వాహనం సుమారు 400 అడుగుల లోతులో ఉన్నట్టు గుర్తించారు. శాటిలైట్, క్రాష్ డిటెక్షన్ ఫీచర్‌ను సెప్టెంబర్ 2022లో యాపిల్ ప్రవేశపెట్టింది. గతంలోనూ ఈ ఫీచర్ కారణంగా పలువురు ప్రమాదాల నుంచి ప్రాణాలతో బయటపడిన ఘటనలు ఉన్నాయి.

గతేడాది స్విట్జర్లాండ్‌లోని జెర్మాట్ సమీపంలో ఓ మంచు కొండపై ఓ సైనికుడు స్నో బోర్డింగ్ చేస్తుండగా సుమారు పది వేల అడుగుల కిందకు పడిపోయాడు. మంచు పగుళ్ల మధ్య చిక్కుకుపోయాడు. అయితే పైకి రావడం కష్టమైపోయింది. చుట్టూ మంచు తప్ప ఏమీ లేదు.. అప్పుడు సాయం కోసం చూసినా ఎవరూ లేకపోవడంతో తన ఐఫోన్‌లోని ఫీచర్ సాయంతో అలర్ట్ చేశాడు.