పొలానికి వెళ్తుండగా పొదల్లో నక్కి,,,అనంతపురంలో చిరుత పులి అలజడి
Andhra Pradesh Telugu | Suryaa Desk | Published : Tue, Sep 05, 2023, 09:53 PM
అనంతపురం జిల్లాలో చిరుతపులి అలజడి రేపుతోంది. పెద్దవడుగూరు మండలంలోని వివిధ గ్రామాల పరిధిలో చిరుత సంచరిస్తోంది. చిరుత సంచారం వార్తలతో స్థానికులు భయాందోళనకు గురవుతున్నారు. పొలాల్లోకి వెళ్తే.. ఎక్కడ నుంచి దాడి చేస్తుందోనని ఆందోళనకు గురవుతున్నారు. చీకటి పడితే ఆరుబయటకు వచ్చేందుకు భయపడుతున్నారు. చిరుత సంచరిస్తున్న దృశ్యాలను కొంత మంది యువకులు తమ సెల్ఫోన్లో చిత్రీకరించారు. ఈ వీడియోలను సోషల్ మీడియాలో పోస్టు చేయడంతో వైరల్గా మారాయి. అనంతపురం జిల్లా పెద్దవడుగూరు మండలం బందార్లపల్లి గ్రామ శివార్లలో చిరుత పులి కనిపించింది. పొలం పనుల నిమిత్తం వెళ్తున్న కొంత మంది రైతులకు పొదల్లో నక్కి ఉన్న చిరుత కనిపించింది. దీంతో వారు బెంబేలెత్తిపోయారు. గట్టిగా కేకలు వేయటంతో అది అక్కడ నుంచి వెళ్లిపోయింది.
అటవీ శాఖ అధికారులు తక్షణమే స్పందించి చిరుతను బంధించాలని స్థానికులు కోరుతున్నారు. తిరుపతిలో చిన్నారిపై చిరుతపులి దాడి చేసిన ఘటన రెండు తెలుగు రాష్ట్రాల్లో తీవ్ర విషాదం నింపిన సంగతి తెలిసిందే. ఈ ఘటన గురించి చర్చ జరుగుతుండగానే.. రెండు తెలుగు రాష్ట్రాల్లో కొన్ని రోజులుగా చిరుతల సంచారం కలకలం రేపుతున్నాయి. పల్నాడు, కర్నూలు జిల్లాల్లో.. ఇటు తెలంగాణలోని నిర్మల్, ఆదిలాబాద్ జిల్లాల్లో చిరుత పులుల సంచారం ప్రజలను ఆందోళనకు గురిచేస్తోంది.
|
|