రాజమండ్రి సబ్ జైల్‌కు 50 అడుగుల గోడ.. అక్కడికి ఎవరూ రాలేరు

ఏపీ స్కిల్‌ డెవలప్‌మెంట్ కేసులో అరెస్టయిన టీడీపీ అధ్యక్షుడు చంద్రబాబు నాయుడు జైలు రిమాండ్‌ను హౌస్‌ కస్టడీ రిమాండ్‌కు మార్చాలని దాఖలైన పిటిషన్‌పై వాడీవేడీగా వాదనలు జరిగాయి. సీఐడీ తరఫున అదనపు ఏజీ పొన్నవోలు సుధాకర్‌రెడ్డి వాదనలు వినిపించగా.. చంద్రబాబు నాయుడు తరఫున సుప్రీం కోర్టు న్యాయవాది సిద్ధార్థ్‌ లూథ్రా వాదనలు వినిపించారు. సోమవారం (సెప్టెంబర్ 11) మూడు విడతలుగా వాదనలు కొనసాగాయి. ఇరుపక్షాల వాదనలు విన్న విజయవాడ ఏసీబీ కోర్టు.. తీర్పును రేపటికి వాయిదా వేసింది. మాజీ ముఖ్యమంత్రి చంద్రబాబు నాయుడు భద్రతపై ఆయన తరఫు న్యాయవాది సిద్ధార్థ్ లూథ్రా ఆందోళన వ్యక్తం చేశారు. జైలులో ఆయనకు ప్రమాదం పొంచి ఉందని కోర్టు దృష్టికి తీసుకెళ్లారు. కరుడుగట్టిన నేరస్థులు, ఆయుధాలు వాడిన నేరస్థులు అదే జైల్లో ఉన్నారని తెలిపారు. చంద్రబాబు నాయుడుకి ముప్పు ఉన్న నేపథ్యంలోనే కేంద్రం ఎన్‌ఎస్‌జీ భద్రత కల్పించారని గుర్తుచేశారు. కేంద్రం కల్పించిన సెక్యూరిటీకి సంబంధించిన అంశంపై ఏపీ ప్రభుత్వం జోక్యం చేసుకునేందుకు అవకాశం లేదని వివరించారు. హౌస్‌ రిమాండ్‌కి సంబంధించి గతంలో సుప్రీంకోర్టు ఇచ్చిన తీర్పును న్యాయస్థానికి సిద్ధార్థ్ లూథ్రా వివరించారు. రిమాండ్‌ను హౌస్ రిమాండ్‌గా మార్చాలని న్యాయస్థానాన్ని విజ్ఞప్తి చేశారు.

చంద్రబాబుకు ఇంట్లో కంటే జైల్లోనే సెక్యూరిటీ ఉంటుందని సీఐడీ తరఫున వాదనలు వినిపించిన ఏజీ పొన్నవోలు సుధాకర్‌రెడ్డి తెలిపారు. చంద్రబాబు ఆరోగ్యం బాగానే ఉందని, జైల్లో పూర్తి స్థాయి భద్రత కల్పించామని న్యాయస్థానానికి తెలిపారు. జైల్లోనే కాకుండా పరిసర ప్రాంతాల్లోనూ పోలీసు భద్రత ఉన్నట్లు కోర్టు దృష్టికి తీసుకెళ్లారు. పోలీసులు 24 గంటలూ విధుల్లోనే ఉంటున్నారని, అత్యవసర పరిస్థితులు ఎదురైతే వైద్య సదుపాయం కూడా ఏర్పాటు చేశామని న్యాయస్థానానికి తెలిపారు. రాజమండ్రి సెంట్రల్ జైలులో 50 అడుగుల ఎత్తైన గోడలు ఉన్నాయని.. అక్కడికి బయటి వారెవరూ రాలేరని వివరించారు. ఆర్థిక నేరాల్లో సాక్ష్యాలను ప్రభావం చేసే అవకాశం ఉండటం వల్ల.. చంద్రబాబు నాయుడిని హౌస్‌ రిమాండ్‌కు అనుమతించవద్దని న్యాయస్థానాన్ని ఏజీ కోరారు. జైలులో చంద్రబాబుకి ప్రత్యేక గది కేటాయించామని.. సీసీ కెమెరాల పర్యవేక్షణ కొనసాగుతోందని వివరించారు. చంద్రబాబు భద్రతపై తీసుకున్న చర్యలపై జైళ్ల శాఖ డీజీ ఆదేశాల లేఖను కోర్టుకు సమర్పించారు. జ్యుడీషియల్ రిమాండ్‌లో ఉన్న నిందితుల భద్రతా బాధ్యత ప్రభుత్వానిదేనని.. చంద్రబాబు కోరిన‌ విధంగా కోర్టు ఆదేశాల మేరకు చంద్రబాబుకి ఇంటి భోజనం, మందులు అందుతున్నాయని ఏజీ తెలిపారు. గృహ నిర్బంధం పిటిషన్ డిస్మిస్ చేయాలని.. ఈ‌ పిటిషన్‌ని పరిగణనలోకి తీసుకోవాల్సిన అవసరం లేదని వాదించారు.