చరిత్ర మర్చిపోయారా..? కెనడాపై రష్యా ఆగ్రహం

రెండో ప్రపంచ యుద్ధంలో హిట్లర్‌తో కలిసి పోరాడిన నాజీ సైనికుడిని కెనడా పార్లమెంట్‌‌ సత్కరించడం పట్ల రష్యా తీవ్రంగా స్పందించింది. కెనడా చర్య అత్యంత దారుణమని ఆగ్రహం వ్యక్తం చేసింది. ఈ వ్యవహారం చారిత్రక సత్యం పట్ల నిర్లక్ష్యంగా వ్యవహరించడాన్ని రుజువు చేస్తోందని క్రెమ్లిన్ మండిపడింది. నాజీల నేరాలను గుర్తుంచుకోవాలని, అటువంటి పీడకల వంటి జ్ఞాపకాల విషయంలో అలసత్వం వహించడం అత్యంత దారుణమని దుయ్యబట్టింది. ఉక్రెయిన్‌ అధ్యక్షుడు వొలిడిమిర్ జెలెన్‌స్కీ గతవారం కెనడాలో పర్యటించారు. ఈ సందర్భంగా కెనడా పార్లమెంట్‌‌లో ఆయన ప్రసంగించారు.

ఈ సందర్భంగా ఉక్రెయిన్‌ నుంచి వలస వచ్చిన, రెండో ప్రపంచ యుద్ధ సైనికుడు 98 ఏళ్ల యారోస్లోవ్‌ హుంకాను కెనడా స్పీకర్‌ ఆంటోనీ రోటా ఆహ్వానించారు. రష్యా నుంచి ఉక్రెయిన్‌కు స్వేచ్ఛను అందించడానికి పోరాడిన యోధుడు అంటూ ఆయనను స్పీకర్ కీర్తించి, సత్కరించారు. అక్కడే ఉన్న కెనడా ప్రధాని జస్టిన్‌ ట్రూడో, జలెన్‌స్కీ సహా అందరూ లేచి నిలబడి చప్పట్లు కొడుతూ హంకాను అభినందించారు. ఇదే విషయంపై రష్యా ఘాటుగా స్పందించింది.‘అటువంటి జ్ఞాపకాల పట్ల అలసత్వం వహించడం అత్యంత దారుణం.. రెండో ప్రపంచ యుద్ధ సమయంలో ఏ దేశంపై ఎవరు దాడి చేశారు? ఎవరిపై ఎవరు పోరాడారనే విషయం తెలియని యువతరాన్ని కెనడా సహా పాశ్చాత్య దేశాలు పెంచాయి.. నియంతృత్వ ముప్పుపై వారికేమీ తెలియదు’ అని రష్యా అధ్యక్ష భవనం క్రెమ్లిన్‌ అధికార ప్రతినిధి దిమిత్రి పెస్కోవ్‌ వెల్లడించారు.

నాజీ సైనికుడ్ని సత్కరించడంపై తీవ్ర దుమారం రేగడంతో.. పొరపాటు జరిగిందంటూ కెనడా స్పీకర్‌ క్షమాపణలు చెప్పారు. అంతేకాదు, నాజీలతో హుంకాకు సంబంధాలున్నట్టు తనకు తెలియదని, ఆయనను ఈ కార్యక్రమానికి ఆహ్వానించి తప్పుచేశామని ఆంటోనీ రోటా వివరణ ఇచ్చారు. దీనిపై తాను రాజీనామాకు కూడా సిద్దమేనని ప్రకటించారు. అటు, కెనడా ప్రధాని ట్రూడో కూడా ఇలా జరిగినందుకు కలత చెందానని అన్నారు. ఇది కెనడా పార్లమెంటుకు, కెనడియన్లందరికీ చాలా ఇబ్బందికరమైన విషయం అని చెప్పారు. ఇక, శుక్రవారం కెనడా పార్లమెంట్ హౌస్ ఆఫ్ కామన్స్‌ గ్యాలరీలో కూర్చుకున్న యారోస్లోవ్ హాంకాను ‘ఉక్రెయిన్ హీరో.. కెనడా హీరో.. ఆయన సేవలకు కృత‌జ్ఞ‌త‌లు’ అని స్పీకర్ అన్నారు. యుద్ధ సమయంలో వేలాది మంది ఉక్రేనియన్లు జర్మన్ వైపు పోరాడింది.. అయితే సోవియట్ రెడ్ ఆర్మీలో మిలియన్ల మంది పనిచేశారు.

ఇక, రెండో ప్రపంచ యుద్ధ సమయంలో హుంకా 14వ వాఫెన్-SS గ్రెనేడియర్ డివిజన్‌లో పనిచేశారు. దీనిని గలీసియా డివిజన్ అని కూడా పిలుస్తారు. ఇది నాజీ కమాండ్‌లో ఉక్రేనియన్లతో కూడిన వాలంటరీ విభాగం. పోలెండ్, యూదు పౌరులను చంపినట్లు ఆరోపణలు ఎదుర్కొంటున్నారు. అయినప్పటికీ ఈ యూనిట్ ఎటువంటి యుద్ధ నేరాలకు పాల్పడినట్లు ట్రైబ్యునల్ గుర్తించలేదు. 1945లో పాశ్చాత్య దేశాలకు లొంగిపోయే ముందు ఈ యూనిట్‌కుఉక్రేనియన్ డివిజన్‌గా పేరు మార్చారు.