ప్రమాదానికి గురైన కారులో విదేశీ మద్యం బాటిళ్లు.. ఎగబడి ఎత్తుకెళ్లిన జనం

జాతీయ రహదారిపై ప్రమాదానికి గురైన కారులోని మద్యం బాటిళ్లను జనం లూటీచేసిన ఘటన బిహార్‌లో చోటుచేసుకుంది. ప్రమాదం తర్వాత వాహనాన్ని వదిలి డ్రైవర్ పారిపోగా.. స్థానికులు మద్యం బాటిళ్ల కోసం ఎగబడ్డారు. ఈ ఘటనకు సంబంధించిన వీడియో ప్రస్తుతం సోషల్ మీడియాలో వైరల్ అవుతోంది. బీహార్‌లోని దోభి పోలీస్ స్టేషన్ పరిధిలోని రెండో నెంబరు జాతీయ రహదారిపై సోమవారం వేగంగా వెళ్తోన్న మారుతి సుజుకి విటారా బ్రీజా కారు మ‌రో వాహ‌నాన్ని ఢీకొట్టింది. దీంతో వాహ‌నాలు నిలిచిపోయి.. ట్రాఫిక్ స్తంభించింది. ఇంతలో ప్ర‌మాదానికి గురైన కారులోని వ్యక్తికి ఏమైందోనని వాహ‌న‌దారులు, స్థానికులు పరుగెత్తుకెళ్లారు.

అతడికి సాయం చేయాలనే ఉద్దేశంతో చుట్టూ వారంతా గుమిగూడారు. కానీ, అక్కడే సీన్ రివర్స్ అయ్యింది. ఆ కారులో భారీగా మ‌ద్యం బాటిల్స్ క‌నిపించాయి. అప్ప‌టికే వాహనం వదిలి డ్రైవర్ పారిపోవ‌డంతో ఇదే మంచి ఛాన్స్‌గా భావించి మ‌ద్యం బాటిళ్ల‌ను ఎగ‌బ‌డి ఎత్తుకెళ్లారు. కారు డిక్కీలో కాటన్ బాక్సుల్లో ఉన్న మద్యం బాటిళ్లను అందికాడికి దోచుకున్నారు. ఈ ఘటన గురించి స‌మాచారం అందుకున్న పోలీసులు ఘ‌ట‌నా స్థ‌లానికి చేరుకున్నారు. అయితే, అప్ప‌టికే మ‌ద్యం బాటిళ్ల‌ను లూటీ చేశారు.

కారులో ఖరీదైన విదేశీ మ‌ద్యం సీసాలు ఉన్నాయని, వాటన్నింటిని ఎత్తుకుపోయినట్టు పోలీసులు నిర్ధారించారు. ఈ ఘటనపై కేసు న‌మోదు చేసిన పోలీసులు ద‌ర్యాప్తు చేప‌ట్టారు. బిహార్‌లో 2016 నుంచి మ‌ద్య నిషేధం కొన‌సాగుతోంది. దీంతో అక్రమంగా ఎవరైనా మద్యం అమ్మినా, సరఫరా చేసిన కేసులు ఎదుర్కొవాల్సిందే. ఈ నేపథ్యంలో మద్యం తీసుకొస్తుండగా కారు ప్రమాదానికి గురికావడం వల్ల భయంతో డ్రైవర్ అక్కడ నుంచి పరారయ్యాడు. కొందరు ద్విచక్రవాహనాలు, కార్లు దిగి మద్యం బాటిళ్లను దోచుకుపోవడం గమనార్హం. ఈ తతంగాన్ని అక్కడున్నవారు వీడియో తీసి.. సోషల్ మీడియాలో షేర్ చేయడంతో వైరల్ అవుతోంది. ఎక్సైజ్ విభాగం అసిస్టెంట్ కమిషనర్ ప్రేమ్ ప్రకాశ్ మాట్లాడుతూ.. వీడియోలోని వ్యక్తులను గుర్తించే ప్రక్రియ కొనసాగుతోందని చెప్పారు. నిందితులను గుర్తించి చర్యలు తీసుకుంటామని ఆయన తెలిపారు.