గోపాలపురం: ఆనందంగా స్నేహితులిద్దరూ సెల్ఫీ దిగారు.. సరిగ్గా 13 నిమిషాల తర్వాత లారీ ఢీకొట్టడంతో చనిపోయిన ఇద్దరు స్నేహితులు

ఇద్దరు స్నేహితులు బైక్‌పై హైదరాబాద్ నుంచి అన్నవరం బయల్దేరారు. మార్గ మధ్యలో ఓ చోట ఆగి సరదాగా సెల్ఫీ తీసుకున్నారు. అయితే ఆ తర్వాత 13 నిమిషాలకే ఇద్దర్ని విషాదం వెంటాడింది.హైదరాబాద్‌ అమీనాపూర్‌ లోని సాయిరాం రెసిడెన్సీలో రంజాన్‌ కుమార్‌(22), రోహిత్‌(24) నివాసం ఉంటున్నారు. వీరిద్దరు వివిధ చోట్ల ఇళ్ల స్లాబ్‌ పనులను కాంట్రాక్టు పద్ధతిలో చేస్తుంటారు. ఈ క్రమంలో కాకినాడ జిల్లా అన్నవరంలో చేపట్టిన పనులను పరిశీలించడానికి హైదరాబాద్‌ నుంచి బైక్‌పై బయల్దేరారు.

తూర్పుగోదావరి జిల్లా గోపాలపురం మండలం కరిచర్లగూడెం సమీపాన మాతంగమ్మమెట్ట హైవేపై జరిగిన రోడ్డు ప్రమాదంలో ఇద్దరు చనిపోయారు. ఇద్దరూ హెల్మెట్లు పెట్టుకున్నా ఫలితం లేకపోయింది. రంజాన్‌కుమార్‌ అక్కడికక్కడే చనిపోగా.. అపస్మారకస్థితిలో ఉన్న రోహిత్‌ను 108 వాహనంలో స్థానిక ఆస్పత్రికి తరలించారు. అక్కడ చికిత్స పొందుతూ అతనూ కొద్ది సేపటికే ప్రాణాలు కోల్పోయాడు. ఇద్దరి మృతదేహాలను పోస్టుమార్టం నిమిత్తం కొవ్వూరు ప్రభుత్వాసుపత్రికి తరలించారు.. అలాగే హైదరాబాద్‌లో బంధువులకు సమాచారం ఇచ్చారు.

ప్రమాదం జరిగిన సమయానికి 13 నిముషాల ముందు.. అంటే ఉదయం 7.32 గంటలకు ఏలూరు జిల్లా కొయ్యలగూడెం సమీపాన ఇద్దరు యువకులూ సెల్ఫీ దిగారు. ఈ రోడ్డు ప్రమాద స్థలాన్ని పరిశీలించిన తూర్పుగోదావరి జిల్లా ఎస్పీ జగదీష్‌ ఈ విషయాన్ని తెలిపారు. అక్కడి నుంచి బయలుదేరి ఉదయం 7.45 నిమిషాలకు కరిచర్లగూడెం సమీపంలో మాతంగమ్మ మెట్ట వద్దకు చేరగా ఈ రోడ్డు ప్రమాదం జరిగిందన్నారు. అదే వారి చివరి ఫొటో అని మొబైల్ ఆధారంగా పోలీసులు ఈ ఫొటో సేకరించారు. ఎదురుగా వచ్చిన లారీ, యువకుల బైకు పరస్పరం బలంగా ఢీకొనడంతో ఈ ప్రమాదం జరిగి ఉంటుందని పోలీసులు అంచనా వేస్తున్నారు.