టీడీపీ, జనసేన పార్టీల సీట్ల పంపకాలు,,,,తాజాగా నియోజకవర్గాలవారీగా జాబితా

ఆంధ్రప్రదేశ్‌లో ఎన్నికలు సమీపిస్తున్న వేళ రాజకీయాలు వేడెక్కాయి. అభ్యర్థుల ఎంపిక, మేనిఫెస్టోను ఫైనల్ చేసే పనిలో ఉన్నాయి పార్టీలు.. ఇక టీడీపీ, జనసేన పార్టీలు పొత్తులో ఉన్నాయి. వీలైనంత త్వరగా సీట్ల లెక్కలు తేల్చి.. అభ్యర్థులను ప్రకటించాలని భావిస్తున్నాయి. ఇటు మేనిఫెస్టోకు ఫైనల్ టచ్ ఇచ్చే పనిలో ఉన్నారు. అయితే ఈలోపే రెండు పార్టీల మధ్య సీట్ల లొల్లి మొదలైంది. టీడీపీ అధినేత చంద్రబాబు మండపేట, అరకు సీట్లలో అభ్యర్థుల్ని ప్రకటించడాన్ని జనసేన పార్టీ తప్పుబట్టింది. పొత్తు ధర్మం ప్రకారం ఈ పద్దతి సరికాదని పవన్ కళ్యాణ్ అంటున్నారు. ఆయన కూడా రాజానగరం, రాజోలులో జనసేన పార్టీ పోటీ చేస్తుందని ప్రకటించారు.

టీడీపీ, జనసేన పార్టీల మధ్య సీట్ల పంచాయితీ అలా ఉంటే.. తాజాగా రెండు పార్టీలకు సంబంధించి ఏ నియోజకవర్గంలో ఏ పార్టీ పోటీ చేయబోతుందనే లిస్ట్ ఫైనల్ చేశారనే ప్రచారం మొదలైంది. అక్కడితో ఆగకుండా సోషల్ మీడియాలో ఓ జాబితా కూడా వైరల్ అవుతోంది. 'టీడీపీ- జనసేనల ఉమ్మడి సీట్ల జాబితా.. తెలుగుదేశం పార్టీ జాతీయ అధ్యక్షులు నారా చంద్రబాబు నాయుడు.. జనసేన పార్టీ అధ్యక్షులు పవన్‌ కళ్యాణ్ ఆదేశాల మేరకు ఇరు పార్టీల నాయకుల ఆధ్వర్యంలో సమన్వయ సమావేశంలో సీట్ల కేటాయింపుపై నిర్ణయం తీసుకోవడం జరిగింది. 2024 అసెంబ్లీ ఎన్నికల్లో దిగువ పేర్కొన్న విధంగా తెలుగుదేశం పార్టీ 114, జనసేన పార్టీ 61 అసెంబ్లీ నియోజకవర్గాల్లో పోటీ చేయాలని ఉమ్మడి సమావేశంలో నిర్ణయించడం జరిగింది' అంటూ ఓ లిస్ట్‌ను వైరల్ చేస్తున్నారు.

ఈ జాబితా సోషల్ మీడియాలో వైరల్ కావడంతో టీడీపీ స్పందించింది. 'నేను ఇంటికి పోవడానికి సిద్ధంగా ఉన్నా' అని జగన్ రెడ్డి చెప్పాక పెయిడ్ పేటీఎం బ్యాచ్ కి పనేం లేదనుకుంటా. ప్రతిపక్షాల వ్యవహారాల గురించి ఏవేవో ఊహించుకుంటున్నారు. ఇది ఫేక్ జాబితా. ఎవరూ నమ్మకండి'అంటూ టీడీపీ హెచ్చరించింది. ఈ మేరకు తెలుగు దేశం పార్టీ ట్విట్టర్ (ఎక్స్) ఖాతాలో క్లారిటీ ఇచ్చారు. అంతేకాదు రెండు రోజుల క్రితం కూడా టీడీపీ, జనసేన పార్టీలు పోటీ చేసే స్థానాలపై క్లారిటీ వచ్చిందంటూ ఏపీ టీడీపీ అధ్యక్షుడు అచ్చెన్నాయుడు పేరుతో ఓ ప్రెస్‌నోట్ వైరలైన సంగతి తెలిసిందే. అయితే అది కూడా ఫేక్ అని టీడీపీ క్లారిటీ ఇచ్చింది. ఇలా ఫేక్ ప్రెస్‌నోట్లు టీడీపీ, జనసేన పార్టీలకు తలనొప్పిగా మారింది. రెండు పార్టీల కార్యకర్తలు ఎవరూ ఈ ఫేక్ ప్రచారాన్ని నమ్మొద్ద అని సూచిస్తున్నారు.