10 నెలల్లో 23 కిలోలు తగ్గిన బిజినెస్‌మెన్.. జిమ్‌, డైట్ లేకుండానే.. ఎలాగో తెలుసా?

ప్రస్తుత లైఫ్‌స్టైల్ కారణంగా చిన్నా పెద్దా తేడాలేకుండా అందరూ అధిక బరువుతో బాధపడుతున్నారు. వయసుకు, బరువుకు సంబంధం లేకుండా ఊబకాయం చాలా మందిని వేధిస్తోంది. బయటి ఫుడ్ తినడం, సరైన నిద్ర లేకపోవడం, పోషక విలువలు ఉన్న ఆహారం తీసుకోకపోవడంతో చాలా మందిలో ఈ అధిక బరువు అనేది ప్రధాన సమస్యగా మారింది. ఇక విపరీతంగా బరువు పెరిగిన వారు.. తగ్గేందుకు రకరకాల ప్రయత్నాలు చేస్తూ ఉంటారు. కొందరు ఆపరేషన్లు చేయించుకోవడం, ఇంజెక్షన్లు తీసుకోవడం, మందులు వాడటం చేస్తూ ఉంటారు. ఇక మరికొందరు ఆహారం మానేయడం, గంటల తరబడి జిమ్‌లో చెమటోడ్చడం, లైట్ ఫుడ్ తీసుకోవడం, బయటి ఫుడ్ పూర్తిగా మానేసి.. కేవలం ఇంట్లో వండినవి మాత్రమే తింటూ ఉంటారు. ఇవేవీ లేకుండానే ఓ వ్యక్తి 10 నెలల కాలంలోనే 23 కిలోలు తగ్గి అందర్నీ ఆశ్చర్యంలో ముంచెత్తాడు.

గుజరాత్‌లోని భావ్ నగర్‌కు చెందిన నీరజ్ అనే వ్యాపారి.. ఈ ఘనత సాధించాడు. 10 నెలల క్రితం 91.9 కిలోలు ఉన్న నీరజ్.. ప్రస్తుతం 68.7 కిలోలకు తగ్గి.. బరువు తగ్గాలి అనుకునేవారికి ఒక ప్రేరణగా నిలిచాడు. ఈ విషయాన్ని ఫిట్‌నెస్ కన్సల్టెంట్‌ సాటేజ్ గోహెల్ సోషల్ మీడియా వేదికగా వెల్లడించారు. జిమ్, ఫ్యాన్సీ డైట్ ఏమీ లేకుండా సాధారణంగానే బరువు తగ్గినట్లు తెలిపారు. అంతేకాకుండా నీరజ్‌ బరువు తగ్గకముందు, తగ్గిన తర్వాత ఫోటోలను షేర్ చేశారు. "జిమ్ లేదు, ఫ్యాన్సీ ఫుడ్ లేదు.. గుజరాత్ బిజినెస్‌మెన్ గుజరాతీ ఇంటి వంటను తింటూనే ఇంట్లో వర్కౌట్లు చేస్తూ పూర్తిగా మారిపోయాడు" అంటూ సాటేజ్ గోహెల్ పేర్కొన్నారు.

అయితే నీరజ్ బరువు తగ్గడానికి ప్రధాన కారణం రోజుకు 10 వేల అడుగులు వేయడమేనని చెప్పారు. నీరజ్ బిజినెస్‌మెన్ కావడంతో బిజీ బిజీ షెడ్యూల్ కారణంగా మొదట్లో రోజుకు 10 వేల అడుగులు నడవడం అతనికి కుదరలేదని.. కానీ ఆ తర్వాత క్రమ క్రమంగా రోజుకు 10 వేల అడుగులు నడవడం ప్రారంభించినట్లు తెలిపారు. కొన్ని వారాల్లోనే రోజుకు 10 వేల అడుగులు నడిచి.. దాన్ని తన రోజువారీ జీవితంలో నీరజ్ భాగం చేసుకున్నట్లు వివరించారు.

గతంలో జిమ్‌కు వెళ్లిన అనుభవం లేకపోవడం, రోజు వారీ బిజీ షెడ్యూల్ కారణంగా నీరజ్ మొదట్లో జిమ్‌కి వెళ్లడానికి ఇష్టపడలేదని సాటేజ్ గోహెల్ తెలిపారు. దీంతో తాను రెండు డంబెల్స్‌తో ఇంటి వద్దే ఎక్సర్‌సైజ్ చేయాలని సూచించినట్లు చెప్పారు. అంతేకాకుండా మాంసాహారాన్ని పక్కనపెట్టి నీరజ్ రోజూ తాను తీసుకునే ఆహారంలో పన్నీర్, సోయా, నెయ్యి, పప్పులు ఉండేలా చూసుకున్నారని.. చక్కెరను గణనీయంగా తగ్గించినట్లు గోహెల్ తెలిపారు. దీంతో తర్వాతి 10 నెలల్లో పూర్తి రిజల్ట్ కనిపించిందని.. ఏకంగా నీరజ్ 23 కిలోలు తగ్గినట్లు తెలిపారు. ముందు 91.9 కిలోలు ఉన్న నీరజ్.. ఆ తర్వాత 68.7 కిలోలకు తగ్గినట్లు వివరించారు.