ఆ ఒక్కడి నిర్వాకం.. కాలిఫోర్నియాలో 3.5 లక్షల ఎకరాల్లో అడవి తగలబడిపోయింది!

ఉత్తర కాలిఫోర్నియాలో ఒక వ్యక్తి నిర్వాకంతో  కాలిఫోర్నియా అడవుల్లో చెలరేగిన కార్చిచ్చు వ్యాప్తి రోజు రోజుకూ తీవ్రమవుతోంది. గంటకు 20 చదరపు కి.మీ. విస్తీర్ణంలో అడవిని కాల్చిబూడిద చేస్తోంది. 24 గంటల వ్యవధిలో రెట్టింపు విస్తీర్ణంలో అడవి తగలబడిపోయింది. ఉద్దేశపూర్వకంగానే అతడు రగిల్చి చిచ్చు బుధవారం నుంచి మళ్లీ మొదలైనట్లు అనుమానాలున్నాయి. కాలిపోతున్న కారును అతడు దొర్లించడంతో మంటలు మొదలైనట్లు భావిస్తోన్న అధికారులు.. ఆ అనుమానితుడిని అరెస్టు చేశారు. రొన్నై డీన్ స్టౌట్ 2 అనే వ్యక్తిని గుర్తించి అరెస్ట్ చేశారు.

 ఇప్పటి వరకు ఈశాన్య చికోలోని దాదాపు 3.5 లక్షల ఎకరాలను దహించివేసింది. తాజా పరిణామాలతో కాలిఫోర్నియాలోని బుట్టె, టెహమ్మా కౌంటీల్లో అత్యవసర పరిస్థితి విధిస్తున్నట్టు గవర్నర్‌ గవిన్‌ న్యూసమ్‌ ప్రకటించారు. ఈ ప్రాంతంలో ఆరేళ్ల కిందట 2018లో వ్యాపించిన మంటలతో 80 మంది ప్రాణాలు కోల్పోయారు. మరోవైపు, మంటలను ఆర్పడానికి దాదాపు 2,500 మంది అగ్నిమాపక సిబ్బంది శ్రమిస్తున్నారు. అయినాసరే ఎటువంటి పురోగతి ఏమీ లేదు. 16 హెలికాప్టర్ల సాయంతో నీటిని కుమ్మరిస్తున్నారు. ఎత్తైన కొండలు, బలమైన గాలుల కారణంగా కార్చిచ్చును అడ్డుకోవడం కష్టంగా మారింది. ఉవ్వెత్తున్న ఎగిసిపడుతూ కొన్ని చోట్ల మంటల సుడులు (ఫైర్నిడోలు) ఏర్పడుతున్నాయి. దీంతో సమీపంలోని ప్రజలను సురక్షిత ప్రాంతాలకు వెళ్లాలని అధికారులు హెచ్చరిస్తున్నారు.

ఈ ఏడాది ఇప్పటి వరకూ కాలిఫోర్నియా రాష్ట్రం ఎదుర్కొన్న అతిపెద్ద కార్చిచ్చు ఇదే. ఈ మంటలు గంటకు 5,000 ఎకరాలకు వ్యాపిస్తున్నాయని కాల్‌ఫైర్‌ సంస్థ కమాండర్‌ బిల్లీ సీ తెలిపారు. శనివారం ఫైర్ ఫైటర్ల సంఖ్యను మూడు రెట్లు పెంచినట్లు ఆయన వెల్లడించారు. అయినా సరే ఈ సిబ్బంది సరిపోవడంలేదని ఆయన పేర్కొన్నారు. ముఖ్యంగా ఈ ప్రాంతాల్లో భారీగా గడ్డి పెరగడంతో అగ్నిమాపక దళాలు ముందు వెళ్లలేకపోతున్నాయని చెప్పారు. శనివారం ఒక్క రోజే 1.5 లక్షల ఎకరాల విస్తీర్ణంలో అడవులు కాలిపోయినట్లు ఆయన వెల్లడించారు.

ప్రస్తుతం వందల సంఖ్యలో కార్చిచ్చులు అమెరికా, కెనడాల్లో వ్యాపించాయి. ది నేషనల్‌ ఇంటర్‌ ఏజెన్సీ ఫైర్‌ సెంటర్‌ ప్రస్తుతం అమెరికాలోని పశ్చిమ తీరంలో వ్యాపించిన 102 కార్చిచ్చులపై దృష్టి పెట్టింది. ఓరేగాన్‌లో‌ని డుర్కీ సహా పలుచోట్ల మంటలు రగులుతున్నాయి. ఆ రాష్ట్రంలో 2.80 లక్షల ఎకరాల్లో మంటలు వ్యాపించాయి. మంటలను ఆర్పేందుకు ప్రయత్నిస్తుండగా.. శుక్రవారం ఓ ఫైర్ ఫైటర్ ప్రాణాలు కోల్పోయాడు.