అలోక్ వర్మ రాజీనామా తిరస్కరించిన కేంద్రం

సుదీర్ఘ వివాదం తర్వాత సీబీఐ మాజీ డైరెక్టర్ అలోక్ వర్మ ఐపీఎస్ సర్వీసుకు ఇచ్చిన రాజీనామాను కేంద్ర ప్రభుత్వం ఇవాళ తిరస్కరించింది. తిరిగి డ్యూటీలో చేరాలని హోం శాఖ ఆయన్ని ఆదేశించింది. ఫైర్ సర్వీసెస్ డీజీగా బాధ్యతలు తీసుకోవాలని ఆదేశించింది. అయితే ఒక వేళ ఆయన కొత్త విధుల్లో చేరితే.. సాయంత్రమే వీడ్కోలు తీసుకుని ఇంటికెళ్లాలి. ఎందుకంటే ఆయన సర్వీసు నేటితో ముగుస్తుంది.

సీబీఐలో అంతర్గతంగా తలెత్తిన వివాదంతో కొన్ని నెలలుగా డైరెక్టర్ అలోక్ వర్మ,  స్పెషల్ డైరెక్టర్ రాకేశ్ ఆస్తానా పరస్పరం అవినీతి ఆరోపణలకు దిగారు. దీంతో అర్ధరాత్రి వేళ వారిద్దరినీ లీవ్ పై పంపుతూ కేంద్రం నిర్ణయం తీసుకుంది. ఆ తర్వాత తాత్కాలిక డైరెక్టర్ గా మాలకొండయ్యను నియమించింది. దీంతో తనను కేంద్రం బలవంతంగా సెలవుపై పంపిందంటూ అలోక్ సుప్రీం కోర్టులో పిటిషన్ వేయడం, మళ్లీ బాధ్యతల్లో చేరే అవకాశం కోర్టు ఇవ్వడం, ఆ తర్వాత సెలక్ట్ కమిటీ ఆయన్ని తొలగించడం చకచకా జరిగిపోయాయి.

సీబీఐ డైరెక్టర్ పదవి నుంచి అలోక్ వర్మను తొలగించాక… సివిల్ డిఫెన్స్, హోం గార్డ్స్,  ఫైర్ సర్వీసెస్ డైరెక్టర్ జనరల్ గా ఆయన్ని కేంద్రం నియమించింది. ఆ బాధ్యతలు తీసుకునేందుకు అలోక్ వర్మ నిరాకరించారు. ప్రభుత్వం తీరుపై నిరసన వ్యక్తం చేస్తూ ఏకంగా తన ఐపీఎస్ సర్వీసుకే రాజీనామా చేశారాయన.

జనవరి మొదట్లో అలోక్ రాజీనామా చేశారు. దాన్ని పరిశీలించిన కేంద్ర హోం శాఖ ఇవాళ తిరస్కరించింది. తిరిగి డ్యూటీలో చేరాలని ఆదేశించింది. అయితే కొసమెరుపు ఏంటంటే ఒకవేళ ఆయన ఇవాళ విధుల్లో చేరినా.. రేపటి నుంచి మళ్లీ ఆఫీసుకు వెళ్లే పనిలేదు. ఎందుకంటే ఆయన సర్వీసు నేటితో ముగుస్తుంది. 2019 జనవరి 31న ఆయన పదవీ విరమణ చేయాల్సిన రోజు. అంటే ఇవాళ అలోక్ డ్యూటీలో చేరితే… వీడ్కోలు కార్యక్రమంతో సాయంత్రం ఇంటికెళ్లొచ్చన్నమాట !