వరద బాధితుల కోసం మెకానిక్ గొప్ప మనసుతో

విజయవాడను వరద ముంచెత్తి ఊహించని నష్టాన్ని మిగిల్చింది. బుడమేరు వరద నీటి దెబ్బకు ఇళ్లు, షాపులు, వాహనాలు మునిగిపోయాయి. అలాగే ఇళ్లలో, షాపుల్లో విలువైన వస్తువులు కూడా వరద నీటిలో తడిచిపోయాయి.. టీవీలు, ఫ్రిజ్‌లు, ఏసీలు, వాషింగ్ మెషిన్లు, గ్యాస్ స్టవ్‌లది కూడా అదే పరిస్థితి. అయితే వాహనాలకు సంబంధించి బీమా పరిహారం వెంటన అందేలా చూస్తామని చంద్రబాబు మాటిచ్చారు. అలాగే వరదల్లో మునిగిన వాహనాల రిపేర్లకు కొంత ఖర్చును ప్రభుత్వం భరించేలా ఆలోచన చేస్తున్నామన్నారు. అంతేకాదు ఎలక్ట్రిక్ వస్తువులు, గ్యాస్ స్టవ్‌లను రిపేర్ చేయించేందుకు అవసరమైన కసరత్తు చేస్తున్నారు.

ఈ క్రమంలో కొందరు మెకానిక్‌లు విజయవాడ వరద బాధితులకు అండగా నిలుస్తున్నారు. తాజాగా విజయవాడ విధ్యాదరపురంలో ఉచితంగా గ్యాస్ స్టవ్‌లు రిపేర్ చేస్తున్నారో వ్యక్తి.. వరద బాధితుల సహాయార్ధం ఈ నిర్ణయం తీసుకున్నట్లు ఆయన ఓ ఫ్లెక్సీ కూడా ఏర్పాటు చేశారు. అవసరమైన వారు వచ్చి ఇక్కడ ఉచితంగా గ్యాస్ స్టవ్‌లు రిపేర్ చేయించుకోవాలని సూచించారు. సోషల్ మీడియాలో ఈ ఫోటో వైరల్ అవుతోంది. ఆయన చొరవను సోషల్ మీడియాలో అందరూ ప్రశంసిస్తున్నారు. 'ఆయనకి వచ్చిన వృత్తిలో వరద బాధితులకి సాయం చేస్తున్నారు.. ఇది కదా మానవత్వం అంటే' అని అభినందించారు కొందరు నెటిజన్లు.

మరోవైపు విజయవాడతో పాటుగా మరికొన్నిచొట్ల వరద ముంపు కారణంగా దెబ్బతిన్న ఆటోలు, ఇతర వాహనాలకు బీమా పరిహారంపై ప్రభుత్వం ఫోకస్ పెట్టింది. వాహనదారులకు వెంటనే పరిహారం అందేలా చూస్తామని ముఖ్యమంత్రి చంద్రబాబు హామీ ఇచ్చారు. వరద ప్రభావిత ప్రాంతాల్లో చంద్రబాబు పర్యటించగా.. పలువురు తమ గోడును వెళ్లబోసుకున్నారు. కొంతమంది స్థానిక పలువురు మహిళలు, ఆటో డ్రైవర్లు చంద్రబాబుకు తమ సమస్యలు వివరించారు. ఈ సందర్భంగా వాహనాల బీమాకు సంబంధించి ప్రభుత్వం కసరత్తు చేస్తోందని.. నేటి నుంచి వాహనాల బీమా క్లైయిమ్‌లకు సంబంధించి విజయవాడలో ప్రత్యేక ఫెసిలిటేషన్ కేంద్రాన్ని ఏర్పాటు చేశారు. ఈ సెంటర్ ద్వారా వరద బాధితులు సేవలు పొందవచ్చని అధికారులు తెలిపారు.