చంద్రబాబుకు పవన్ కళ్యాణ్ లేఖ.. డిప్యూటీ సీఎం నిర్ణయంతో ప్రభుత్వానికి రూ.82 లక్షలు ఆదా!

ఆంధ్రప్రదేశ్ డిప్యూటీ సీఎం పవన్ కళ్యాణ్ ముఖ్యమంత్రి నారా చంద్రబాబు నాయుడికి లేఖ రాశారు. విజయవాడలోని క్యాంపు కార్యాలయాన్ని ఫర్నిచర్‌తో సహా వెనక్కి తీసుకోవాలని ఆ లేఖలో కోరారు. గుంటూరు జిల్లా మంగళగిరిలోని తన నివాసాన్ని క్యాంపు కార్యాలయంగా వినియోగించుకోవాలని పవన్ కళ్యాణ్ నిర్ణయం తీసుకున్నారు. అందుకే విజయవాడలో కేటాయించిన క్యాంపు కార్యాలయాన్ని, అక్కడి ఫర్నీచర్, ఇతర సామాగ్రి సహా వెనక్కు తీసుకోవాలని ప్రభుత్వాన్ని కోరారు పవన్ కళ్యాణ్.

విజయవాడలో ఎంతో విశాలమైన క్యాంపు కార్యాలయాన్ని తనకు కేటాయించడంపై చంద్రబాబుకు పవన్ కృతజ్ఞతలు తెలిపారు.విజయవాడ క్యాంపు కార్యాలయాన్ని ప్రభుత్వానికి తిరిగి అప్పగిస్తున్నానని లేఖలో పేర్కొన్నారు.

పవన్ కళ్యాణ్ డిప్యూటీ సీఎంగా బాధ్యతలు చేపట్టగానే.. ఆయనకు విజయవాడలోని జలవనరులశాఖకు చెందిన గవర్నర్ పేటలోని భవనాన్ని క్యాంపు కార్యాలయంగా కేటాయించారు. అక్కడ డిప్యూటీ సీఎంగా బాధ్యతలు కూడా స్వీకరించారు.. ఆ తర్వాత అక్కడికి పెద్దగా వెళ్లలేదని చెబుతున్నారు. అయితే ఇప్పుడు ఉన్నట్టుండి ఆ భవనాన్ని ప్రభుత్వానికి అప్పగించడం ఆసక్తికరంగా మారింది. ఈ భవనానికి వాస్తుపరమైన ఇబ్బందులు ఉన్నాయా అనే చర్చ జరుగుతోంది. ఆ భవనంలో 2014-2019 మధ్య టీడీపీ ప్రభుత్వంలో మంత్రిగా ఉన్న దేవినేని ఉమామహేశ్వరరావు.. గత వైఎస్సార్‌సీపీ ప్రభుత్వంలో మంత్రులు బొత్స సత్యనారాయణ, అనిల్ కుమార్ యాదవ్ ఉన్నారు. అయితే ఆ తర్వాత వీరు రాజకీయంగా ఇబ్బందిపడ్డారు. అందుకే ఈ భవనం కలిసిరాదనే సెంటిమెంట్ ఉందనే చర్చ నడుస్తోంది.

మరో వాదన కూడా వినిపిస్తోంది.. పవన్ కళ్యాణ్‌కు కేటాయించిన భవనానికి సంబంధించి ప్రభుత్వం రూ.82 లక్షలు నిధులు విడుదల చేసిందట. ఈ వ్యవవహారంపై పవన్ కళ్యాణ్‌ టార్గెట్‌గా వైఎస్సార్‌సీపీ విమర్శలు చేసింది. ప్రభుత్వం దగ్గర అసలు నిధులు లేవని చెప్పిన పవన్ కళ్యాణ్ ఆఫీస్‌కు అన్ని లక్షలు ఎక్కడి నుంచి వచ్చాయని కొందరు ఆ జీవోతో సోషల్ మీడియాలో ప్రశ్నించారు. ప్రభుత్వానికి ఆ రూ.82 లక్షలు కూడా మిగల్చాలనే ఉద్దేశంతో పవన్ ఈ నిర్ణయం ఈ నిర్ణయం తీసుకున్నారనే చర్చ జరుగుతోంది. కారణం ఏదైనా పవన్ కళ్యాణ్ తీసుకున్న నిర్ణయంపై ప్రశంసలు కురిపిస్తున్నారు.

విజయవాడలోని వరద బాధితుల్ని కోసం పాకెట్‌ మనీని విరాళంగా ఇచ్చిన కుప్పం నియోజకవర్గంలోని శాంతిపురం నోబుల్‌ స్కూల్, కడపలోని శ్రీసాయి విజ్ఞాన్‌ స్కూల్‌ విద్యార్థుల్ని డిప్యూటీ సీఎం పవన్ కళ్యాణ్ అభినందించారు. విద్యార్థులు స్వచ్ఛందంగా ముందుకొచ్చి విరాళాలివ్వడం తనను కదిలించిందని.. నిస్వార్థంగా స్పందించిన వారందరికీ అభినందనలు తెలుపుతున్నానన్నారు. విద్యార్థుల గొప్ప మనసు చుట్టుపక్కల వారిపై సానుకూల ప్రభావాన్ని చూపిస్తాయన్నారు. 'ఆ చిన్నారులు.. ఆశావహ దృక్పథానికి, మానవత్వానికి దీపకాంతులుగా ప్రకాశించాలని ఆకాంక్షిస్తున్నా’ అన్నారు.