సల్మాన్‌ఖాన్‌ను చంపేస్తామని మరోసారి బెదిరింపులు.. ఈసారి ఎన్ని కోట్లు డిమాండ్ చేశారంటే

బాలీవుడ్‌ హీరో సల్మాన్‌ఖాన్‌కు మరోసారి బెదిరింపులు వచ్చాయి. తాజాగా గుర్తుతెలియని ఓ వ్యక్తి నుంచి ముంబై ట్రాఫిక్ కంట్రోల్‌ రూమ్‌కు మరో మెసేజ్ వచ్చింది. రూ.రెండు కోట్లు చెల్లించకపోతే.. సల్మాన్‌ను చంపేస్తామని బెదిరించారు. వర్లీ పోలీసులు వెంటనే అలర్ట్ అయ్యారు.. ఈ బెదిరింపులకు సంబంధించి గుర్తుతెలియని వ్యక్తిపై కేసు నమోదు చేసి దర్యాప్తు చేస్తున్నారు. అయితే లారెన్స్‌ బిష్ణోయ్‌ గ్యాంగ్‌ చేతిలో హత్యకు గురైన బాబా సిద్ధిఖీ కుమారుడు జీషన్‌సిద్ధిఖీని చంపేస్తామని బెదిరించిన వ్యవహారంలో.. 20ఏళ్ల గుఫ్రన్‌ను అరెస్టు చేసిన కాసేపటికే ఈ ఘటన జరిగింది.

మంగళవారం రోజు ముంబై పోలీసుల జాయింట్ ఆపరేషన్‌లో.. సల్మాన్‌ ఖాన్‌ను బెదిరించి రూ.10 కోట్లు డిమాండ్ చేసిన వ్యక్తిని అరెస్ట్ చేశారు. పోలీసులు అరెస్ట్ చేసిన వ్యక్తి తాను గ్యాంగ్‌స్టర్ లారెన్స్ బిష్ణోయ్ సోదరుడ్ని అని చెప్పుకున్నాడు. ఇటీవల ముంబై ట్రాఫిక్ పోలీసులకు మరో మెసేజ్ వచ్చిన సంగతి తెలిసిందే. ఈ బెదిరింపుల్ని లైట్ తీసుకోవద్దని.. సల్మాన్‌ఖాన్‌ ప్రాణాలతో ఉండాలన్నా.. లారెన్స్‌ బిష్ణోయ్‌ గ్యాంగ్‌తో శత్రుత్వాన్ని ముగించుకోవాలన్నా ఆయన రూ.5 కోట్లు ఇవ్వాలని డిమాండ్ చేశారు. ఒకవేళ డబ్బులు కనుక ఇవ్వకపోతే మాజీ ఎమ్మెల్యే సిద్ధిఖీ కంటే దారుణమైన పరిస్థితులు ఎదుర్కోవాల్సి వస్తుందని బెదిరించారు. ఆ తర్వాత అతడే మరో మెసేజ్ కూడా పంపాడు. తాను ఉద్దేశపూర్వకంగా బెదిరించలేదని.. అనుకోకుండా అలా జరిగిపోయింది.. తనను క్షమించమని కోరాడు. ఈ మెసేజ్ ఆధారంగా దర్యాప్తు చేయగా.. జార్ఖండ్ పోలీసుల సాయంతో జంషెడ్‌పూర్‌ చెందిన ఓ కూరగాయల వ్యాపారి ఇలా చేశారని గుర్తించి అరెస్ట్ చేశారు.

కృష్ణజింకలను వేటాడినందుకు సల్మాన్‌ఖాన్‌ను చంపుతామని లారెన్స్‌ బిష్ణోయ్‌ గ్యాంగ్‌ అంటోంది. బిష్ణోయిల మందిరానికి వెళ్లి క్షమాపణలు చెబితే వదిలేస్తామంది.. ఇప్పటికే పలుసార్లు లారెన్స్‌ బిష్ణోయ్‌ గ్యాంగ్‌ నుంచి సల్మాన్‌ఖాన్‌ను బెదరించాయి. అయితే ఆయన స్నేహితుడు, ఎన్సీపీ నేత బాబా సిద్ధిఖీ ఇటీవల దారుణ హత్యకు గురైన సంగతి తెలిసిందే. ఈ ఘటన తర్వాత మరోసారి బిష్ణోయ్‌ గ్యాంగ్‌ పేరు తెరపైకి వచ్చింది.. సిద్ధిఖీ హత్యకు ఈ గ్యాంగ్ బాధ్యత వహించింది.