ఏపీలోకి అఘోరి ఎంట్రీ.. వేంపాడు టోల్‌గేట్ వద్ద ఆందోళన.. ఏం జరిగిందంటే?

తెలంగాణలో ఇటీవల హల్‍చల్ చేసిన అఘోరీ మాత ఏపీలో ప్రత్యక్షమయ్యారు. ఇటీవల కాలంలో తెలంగాణలో ఇంటర్వ్యూలతో, సోషల్ మీడియాలోనూ అఘోరీ పాపులర్ అయ్యారు. అయితే అఘోరీ హఠాత్తుగా ఇప్పుడు ఏపీలోకి ప్రవేశించారు. అనకాపల్లి జిల్లా వేంపాడు టోల్‌గేట్ వద్ద అఘోరీ హల్ చల్ చేశారు. అఘోరీ తీరు కారణంగా టోల్‌గేట్ వద్ద రాకపోకలకు కాసేపు అంతరాయం కలిగింది. జనం పెద్ద సంఖ్యలో గుమికూడటంతో పోలీసులు జోక్యం చేసుకోవాల్సి వచ్చింది.

వివరాల్లోకి వెళ్తే.. విశాఖపట్నం వెళ్తున్న అఘోరీ వేంపాడు టోల్‌గేట్ వద్ద నిరసనకు దిగారు. టోల్‌గేట్ సిబ్బంది తనపట్ల అనుచితంగా ప్రవర్తించారంటూ అఘోరీ ఆందోళనకు దిగారు. టోల్‌గేట్ సిబ్బంది తనను అడ్డుకున్నారని.. తనపట్ల దురుసుగా ప్రవర్తించారంటూ అఘోరీ నిరసనకు దిగారు. రోడ్డుపైన కారు పార్కింగ్ చేసి.. ఇక్కడి నుంచి కదిలేది లేదంటూ భీష్మించుకున్నారు. దీంతో అఘోరీని చూడటానికి స్థానికులు పెద్దసంఖ్యలో అక్కడ గుమికూడారు. ఇక విషయం తెలుసుకున్న పోలీసులు.. ఘటనాస్థలికి చేరుకుని అఘోరీకి నచ్చజెప్పే ప్రయత్నం చేశారు. అయితే తనను నెట్టేసిన టోల్‌గేట్ సిబ్బంది తనకు క్షమాపణ చెప్పాలని.. అప్పటి వరకూ కదిలేదిలేదంటూ అఘోరీ భీష్మించుకుని కూర్చోవడంతో కాసేపు అక్కడ గందరగోళం నెలకొంది. చివరకు పోలీసులు జోక్యం చేసుకోసుకుని అఘోరీకి సర్దిచెప్పడంతో పరిస్థితి చక్కబడింది.

మరోవైపు అఘోరీ హైదరాబాద్ నుంచి విశాఖఫట్నం వెళ్తున్నట్లు తెలిసింది. ఈ క్రమంలోనే కాకినాడ జిల్లా ప్రత్తిపాడులో అఘోరీ పెట్రోల్ బంకు వద్ద ఉన్న వీడియోలు వైరల్ అవుతున్నాయి. విజయవాడ నుంచి విశాఖపట్నం వెళ్తున్న సమయంలో అఘోరీ మార్గమధ్యలో పెట్రోల్ బంక్ వద్ద ఆగారు. ఇక అక్కడే ఉన్న భవానీ భక్తులు కోరటంతో అఘోరీ వాహనం దిగారు. ఈ సందర్భంగా అఘోరీని చూడటానికి, వీడియోలు తీయడానికి స్థానికులు ఉత్సాహం ప్రదర్శించారు. అనంతరం అక్కడి నుంచి వెళ్లూ వేంపాడు టోల్‌గేట్ వద్దకు చేరుకున్న అఘోరీ.. టోల్‌గేట్ వద్ద కాసేపు హంగామా చేశారు. అయితే ఇన్నిరోజులూ తెలంగాణలో కనిపించిన అఘోరీ ఇప్పుడు ఏపీలోకి ఎంటరవ్వడంతో.. అఘోరీ ఎక్కడకు వెళ్తున్నారు.. ఏం చేయనున్నారనేదీ ఆసక్తికరంగా మారింది.