ఏపీలో వారందరికీ గుడ్‌న్యూస్.. ఉద్యోగాల్లో ఆ కోటా రిజర్వేషన్ పెంపు

ఆంధ్రప్రదేశ్ ప్రభుత్వం మరో కీలక నిర్ణయం తీసుకుంది. ఉద్యోగాల్లో స్పోర్ట్స్ కోటాను పెంచాలని నిర్ణయించింది. ఏపీలో నూతన క్రీడా విధానంపై సీఎం నారా చంద్రబాబు నాయుడు సోమవారం సమీక్షించారు. సచివాలయంలో క్రీడాశాఖ మంత్రి మండిపల్లి రాంప్రసాద్ రెడ్డి, ప్రభుత్వ ప్రధాన కార్యదర్శి నీరభ్ కుమార్ ప్రసాద్, శాప్ ఛైర్మన్ రవి నాయుడు, ఇతర ఉన్నతాధికారులతో కలిసి చంద్రబాబు సమీక్షించారు. ఈ సందర్భంగా ఆంధ్రప్రదేశ్‌లో క్రీడలకు ఇస్తున్న ప్రోత్సాహం, మౌలిక సదుపాయాలతో పాటుగా గ్రామాలలో క్రీడా స్థలాల ఏర్పాటుపైనా సీఎం వారితో చర్చించారు. ఈ సందర్భంగా పలు సీఎం చంద్రబాబు నాయుడు పలు కీలక నిర్ణయాలు తీసుకున్నారు. ఒలింపిక్స్, ఏషియన్ గేమ్స్‌లో పాల్గొని పతకాలు సాధించే రాష్ట్ర క్రీడాకారులకు ఇచ్చే ప్రోత్సాహకాన్ని పెంచాలని నిర్ణయించారు.

 ఒలింపిక్స్‌లో దేశానికి ప్రాతినిధ్యం వహిస్తూ స్వర్ణ పతకం సాధించిన రాష్ట్ర క్రీడాకారులకు ఇప్పటి వరకూ ప్రోత్సాహకం కింద రూ.75 లక్షలు అందించేవారు. అయితే ఈ మొత్తాన్ని రూ.75 లక్షల నుంచి రూ.7 కోట్లకు పెంచాలని సమీక్షా సమావేశంలో నిర్ణయించారు. ఆసియా క్రీడల్లో పాల్గొనే క్రీడాకారులకు ప్రోత్సాహకం కింద రూ.10 లక్షలు ఇవ్వాలని చంద్రబాబు నిర్ణయించారు. వరల్డ్ ఛాంపియన్ షిప్‌, వరల్డ్ కప్ పోటీల్లో గోల్డ్ మెడల్ సాధిస్తే రూ.50 లక్షలు, సిల్వర్ మెడల్ సాధిస్తే రూ.35 లక్షలు, కాంస్యం సాధించిన క్రీడాకారులకు రూ.25 లక్షలు ఇవ్వాలని ఏపీ ప్రభుత్వం నిర్ణయించింది. అలాగే నేషనల్ గేమ్స్‌లో బంగారు పతకం సాధిస్తే రూ.10 లక్షలు, రజతం సాధించిన వారికి రూ.5 లక్షలు, కాంస్యం కైవసం చేసుకున్న క్రీడాకారులకి రూ.3 లక్షల ప్రోత్సాహకం ఇవ్వాలని నిర్ణయించారు.

మరోవైపు ఏపీ ప్రభుత్వం భర్తీ చేసే ఉద్యోగాల్లో స్పోర్ట్స్ కోటా కింద ఇప్పటి వరకూ 2 శాతం రిజర్వేషన్ కల్పించేవారు. అయితే ఉద్యోగాల్లో స్పోర్ట్స్ కోటా 2 నుంచి 3 శాతానికి పెంచాలని నిర్ణయించారు. పబ్లిక్, ప్రైవేట్ భాగస్వామ్యంతో రాష్ట్రంలో స్టేడియాలు నిర్మించాలని సమావేశంలో నిర్ణయించారు. అలాగే సంస్థలు, వ్యక్తుల సహకారంతో క్రీడా ప్రాంగణాలను అభివృద్ధి చేయాలని.. సీఎం చంద్రబాబు నాయుడు సూచించారు.

మరోవైపు స్పోర్ట్స్ ఫర్ ఆల్ పేరుతో క్రీడా మంత్రిత్వశాఖ.. నూతన క్రీడా పాలసీని రూపొందించింది. సమీక్షా సమావేశంలో అధికారులు దీనిపై పవర్ పాయింట్ ప్రజెంటేషన్ ద్వారా ముఖ్యమంత్రికి వివరించారు. ఈ సందర్భంగా సీఎం చంద్రబాబు నాయుడు పలు సూచనలు చేశారు. నాలుగు లక్ష్యాలతో పాలసీ ఉండాలన్న ముఖ్యమంత్రి.. దేశంలోనే అత్యుత్తమ క్రీడా విధానంగా ఆంధ్రప్రదేశ్ క్రీడా విధానం ఉండాలని సూచించారు. అనంతరం నూతన క్రీడా పాలసీకి సీఎం చంద్రబాబు ఆమోదం తెలిపారు.