ఏపీకి మరో బంపరాఫర్.. లక్షా 40 వేల కోట్ల ప్రాజెక్టు.. ఆ జిల్లాలోనే ఏర్పాటు

ఆంధ్రప్రదేశ్ రాష్ట్రానికి మరో భారీ ప్రాజెక్టు వచ్చే సూచనలు కనిపిస్తున్నాయి. ఏపీలో టీడీపీ కూటమి సర్కారు ఏర్పాటైన తర్వాత కేంద్రం నుంచి పూర్తిస్థాయిలో సహకారం అందుతున్న నేపథ్యంలో.. ఏపీలో పెట్టుబడులు పెట్టేందుకు పలు సంస్థలు కూడా ముందుకు వస్తున్నాయి. ఈ క్రమంలోనే లక్షా 40 వేల కోట్ల రూపాయల ప్రాజెక్టు ఒకటి ఏపీకి రాబోతున్నట్లు తెలిసింది. ఆర్సెలార్ మిట్టల్, జపాన్‌కు చెందిన నిప్పాన్ స్టీల్ జాయింట్ వెంచర్ అయిన ఏఎం/ఎన్ఎస్ ఇండియా ఏపీలో పెట్టుబడులు పెట్టేందుకు ఆసక్తిగా ఉన్నట్లు తెలిసింది. ఆంధ్రప్రదేశ్‌లోని అనకాపల్లి జిల్లాలో రూ.1.4 లక్షల కోట్లతో 17.8 మిలియన్ మెట్రిక్ టన్నుల ఉత్పత్తి సామర్థ్యం ఉన్న ఇంటిగ్రేటెడ్ స్టీల్ ప్లాంట్ ఏర్పాటుచేయాలని ఆర్సెలార్ మిట్టల్ నిప్పాన్ స్టీల్ ఇండియా భావిస్తోంది.

ఇక ఈ ప్రాజెక్టు అమలు దిశగా అడుగులు ముందుకు పడితే ఇటీవల కాలంలో ఏర్పాటు కానున్న అతిపెద్ద గ్రీన్ ఫీల్డ్ ప్రాజెక్టులలో ఒకటిగా నిలుస్తుంది. ప్రాజెక్టులో భాగంగా మొదటి దశలో 80 వేల కోట్ల పెట్టుబడితో ఏడాదికి 7.3 మిలియన్ మెట్రిక్ టన్నుల ఉత్పత్తి సామర్థ్యం గల బ్లాస్ట్ ఫర్నేస్ స్టీల్ ప్లాంట్‌ను ఏర్పాటు చేస్తారు. మొదటి దశ కోసం కంపెనీ 2,600 ఎకరాల భూమిని కోరినట్లు తెలిసింది. ప్రాజెక్టు రెండో దశలో రూ. 60,000 కోట్ల పెట్టుబడితో ఉత్పత్తి సామర్థ్యాన్ని మరో 10.5 మిలియన్ మెట్రిక్ టన్నులు పెంచుకుంటారు. ఇక ఇందుకోసం అదనంగా 2,000 ఎకరాల భూమిని సంస్థ యాజమాన్యం కోరింది. అయితే నక్కపల్లి బల్క్ డ్రగ్ పార్క్ పక్కనే దాదాపు 1,800 ఎకరాల భూమి అందుబాటులో ఉందని.. వాటిని పరిశీలించాలని ప్రభుత్వ వర్గాలు సూచించినట్లు తెలిసింది.

మరోవైపు 2035 నాటికి 40 మిలియన్ మెట్రిక్ టన్నులకు తమ ఉక్కు ఉత్పత్తి సామర్థ్యాన్ని పెంచుకోవాలని ఆర్సెలార్ మిట్టల్ నిప్పాన్ స్టీల్ ఇండియా భావిస్తోంది. ఈ విస్తరణ ప్రణాళికలో భాగంగా ప్లాంట్ ఏర్పాటు కోసం సముద్ర తీర ప్రాంతాలను అన్వేషిస్తున్నట్లు సంస్థ యాజమాన్యం చెబుతోంది. ఇందుకోసం. ఆంధ్రప్రదేశ్, ఒడిశాలలో స్టీల్ ప్లాంట్ ఏర్పాటు కోసం భూమి, పోర్టు సౌకర్యాల లభ్యత వంటి అంశాలను పరిశీలిస్తున్నట్లు యాజమాన్య వర్గాలు చెప్తున్నాయి. మరోవైపు జులైలో ఆర్సెలార్ మిట్టల్ సీఈవో ఆదిత్య మిట్టల్‌, ఏపీ ఐటీ శాఖ మంత్రి నారా లోకేష్ మధ్య జరిగిన జూమ్ కాల్‌లో ఈ స్టీల్ ప్రాజెక్ట్ ఏర్పాటు దిశగా అంగీకారం కుదిరినట్లు ఎకనమిక్స్ టైమ్స్ తన కథనంలో పేర్కొంది.