కెనడా, చైనాలకు షాకిచ్చిన ట్రంప్.. ఆ దేశ ఉత్పత్తులపై సంచలన నిర్ణయం

అమెరికా ఎన్నికల్లో విజయం సాధించిన డొనాల్డ్ ట్రంప్.. తన 2.0 పాలనలో ఏం చోయబోయేది, ఎలా ఉండేది ఇప్పటికే స్పష్టత ఇచ్చిన విషయం తెలిసిందే. తాజాగా, మెక్సికో, చైనా, కెనడాలకు ఆయన షాకిచ్చారు. చట్టవిరుద్ధమైన డ్రగ్స్ వ్యాపారం, వలసలకు ప్రతిస్పందనగా చైనా దిగమతులుపై 10 శాతం, మెక్సికో, కెనడా నుంచి వచ్చే వస్తువులపై 25 శాతం సుంకం విధించాలని భావిస్తున్నట్లు ట్రంప్ సోమవారం వెల్లడించారు. ఈ మేరకు తన సోషల్ మీడియా ప్లాట్‌ఫామ్ ట్రూత్ సోషల్‌లో పలు పోస్ట్‌లు పెట్టారు. దేశంలోకి ప్రవేశించే అన్ని వస్తువులపై భారీ సుంకాలతో అమెరికాకు అతిపెద్ద వాణిజ్య భాగస్వాములలో కొన్నింటిపై చర్యలు తప్పవని ట్రంప్ ప్రతిజ్ఞ చేశారు.

‘‘జనవరి 20న నా మొదటి ఎగ్జిక్యూటివ్ ఆర్డర్‌లలో ఒకటి.. సరిహద్దులతో పాటు మెక్సికో, కెనడాల నుంచి దిగుమతి చేసుకునే అన్ని ఉత్పత్తులపై 25% సుంకం విధించడానికి అవసరమైన అన్ని పత్రాలపై సంతకం చేస్తాను.. ’’ అని తెలిపారు. మరో పోస్ట్‌లో చైనా వస్తువులపై దిగుమతి సుంకాన్ని అదనంగా 10 శాతం పెంచుతానని ట్రంప్ చెప్పారు. అమెరికాలో అక్రమ రవాణాపై చర్యల్లో భాగంగా చైనా వస్తువులపై అదనపు సుంకాలు తప్పవని హెచ్చరించారు.

ట్రంప్ ఆర్ధిక ఎజెండాలో దిగుమతి సుంకాలు కీలక భాగం. తన ఎన్నికల ప్రచారంలోనూ దిగుమతి సుంకాలపై తీవ్రంగా విరుచుకుపడ్డారు. తాను అధికారంలోకి వస్తే వాటిని భారీగా పెంచుతానని పదే పదే చెప్పారు. అయిలే, అధిక సుంకాలు వృద్ధిని దెబ్బతీస్తాయని, ద్రవ్యోల్బణాన్ని పెంచుతాయని చాలా మంది ఆర్థికవేత్తలు హెచ్చరిస్తున్నారు, ఎందుకంటే ప్రధానంగా అమెరికాకు వస్తువులను తీసుకొచ్చే వారు సుంకాలు చెల్లిస్తారు. దీంతో ఆ భారాన్ని వినియోగదారులపై మోపుతారని అంటున్నారు.

కానీ, ట్రంప్ బృందం మాత్రం దీనిని కొట్టిపారేస్తోంది. అమెరికా ఆర్దిక వ్యవస్థతో పాటు భాగస్వామ్యులకు ఇవి ఎంతగానో ఉపయోగపడతాయని వాదిస్తోంది. ఉత్పాదక రంగంలో ఉద్యోగాలు పెరుగుతాయని చెబుతోంది. ఇక, అమెరికా 47 వ అధ్యక్షుడిగా రిపబ్లికన్ నేత జనవరి 20 బాధ్యతలు చేపట్టనున్నారు. ఎన్నికల్లో గెలిచిన ఆయన రెండోసారి ఈ పదవి చేపడతున్నారు.