ఎనిమిది నెలల చిన్నారి..21 రోజుల కిందట మాయం.. కట్ చేస్తే

ఏదైనా పోయిన వస్తువు తిరిగి దొరికిందంటే కలిగే సంతోషం అంతా ఇంతా కాదు. ఇక్కడ వస్తువు విలువతో పనిలేదు.. మన వస్తువు మనకు తిరిగి దక్కిందా లేదా అనేదే లెక్క. ఎందుకంటే మనదనుకున్నది, మనకు దూరమైనప్పుడు ఎంత బాధ కలుగుతుందో.. మనకు దూరమైనది తిరిగి దక్కినప్పుడు అంతకు రెట్టింపు సంతోషం కలుగుతుంది. ఇంతటి ఉపోద్ఘాతం చెప్పడానికి కూడా ఓ కారణం ఉందండోయ్.. అది గనుక తెలుసుకుంటే ఇదెలా సాధ్యమైందా అనే ఆశ్యర్యంతో కూడిన అనుమానం కలగకమానదు.

వివరాల్లోకి వెళ్తే.. గుజరాత్‌కు చెందిన అజిత్ రాథోడ్ కుటుంబం బతుకు దెరువు కోసం కర్నూలు జిల్లాకు వచ్చింది. బొమ్మలు అమ్ముకుంటూ జీవనం సాగిస్తున్నారు. అజిత్ రాథోడ్, ఆసియా దంపతులకు ఎనిమిది నెలల కొడుకున్నాడు. పేరు ఆకాశ్ రాథోడ్. బొమ్మలు అమ్మగా వచ్చిందాంట్లో ఆ కుటుంబం సంతృప్తిగా, సంతోషంగానే జీవిస్తూ ఉండేది. అయితే డిసెంబర్ నెలలో వారి కుటుంబంలో అనుకోని ఘటన జరిగింది. కర్నూలు నగరం సమీపంలోని కోడుమూరు రోడ్డు పక్కన పూరిల్లు వేసుకుని అజిత్ రాథోడ్ కుటుంబం జీవిస్తోంది. అయితే డిసెంబర్ 20వ తేదీ రాత్రి వీరి ఎనిమిది నెలల చిన్నారి ఆకాష్ రాథోడ్‌ను గుర్తు తెలియని వ్యక్తులు అపహరించారు. అర్ధరాత్రి ఒకటిన్నర సమయంలో అజిత్ రాథోడ్, ఆసియా మధ్య నిద్రిస్తున్న చిన్నారిని ఎవరో ఎత్తుకెళ్లారు.

అజిత్ రాథోడ్ దంపతులకు మెళకువ వచ్చేసరికి పక్కలో చిన్నారి లేడు. దీంతో ఆ కుటుంబం కంగారుపడిపోయింది. చుట్టుపక్కల అంతా గాలించింది. ఎక్కడా జాడ లేకపోవటంతో కర్నూలు పోలీసులను ఆశ్రయించారు. కర్నూలు నాలుగో పట్టణ పోలీస్ స్టేషన్‌లో ఫిర్యాదుచేశారు. మిస్సింగ్ కేసు నమోదు చేసుకున్న పోలీసులు గాలింపు చేపట్టారు. ఎక్కడా కనిపించకపోవటంతో కర్నూలు డీఎస్పీ బాబూప్రసాద్ నేతృత్వంలో పది మంది సీఐలు బాలుడి కోసం గాలించారు. అయితే వారి ప్రయత్నాలేవీ ఫలించలేదు. ఇక ఎనిమిది నెలల ఆకాష్ రాథోడ్ గురించి ఆశలు వదిలేసుకున్న తరుణంలో అద్భుతం జరిగింది.

21 రోజుల కిందట చిన్నారి ఎక్కడైతే కనిపించకుండా పోయాడో చివరకు అక్కడే ప్రత్యక్షమయ్యాడు. శనివారం రాత్రి 11 గంటల 30 నిమిషాల సమయంలో అజిత్ రాథోడ్ పూరిల్లు బయట కుక్కలు మొరుగుతున్న శబ్దం వినిపించింది. దీంతో పూరిల్లు లోపల ఉన్న అజిత్ రాథోడ్ దంపతులు బయటకు వచ్చి చూశారు. చూస్తే.. ఎదురుగా తమ కుమారుడు ఆకాష్ రాథోడ్ కనిపించాడు. దీంతో వారి ఆనందానికి అవధులు లేకుండా పోయాయి. 21 రోజుల కిందట కనిపించకుండా పోయిన తమ కొడుకు.. ఆశలు వదిలేసిన స్థితిలో చివరకు ఇంటి ముందు ప్రత్యక్షం కావటంతో ఆ దంపతులు ఉబ్బితబ్బిబ్బవుతున్నారు.

ఆదివారం ఉదయం కర్నూలు నాలుగవ పట్టణ పోలీస్ స్టేషన్‌కు వచ్చిన అజిత్ రాథోడ్ దంపతులు జరిగిన విషయాన్ని వారికి వివరించారు. చిన్నారి ఇంటి ముందే దొరికిన విషయాన్ని పోలీసులకు తెలిపారు. దీంతో కిడ్నాప్ చేసిన వ్యక్తులే తిరిగి వదిలేసి వెళ్లినట్లు పోలీసులు నిర్ధారించారు. చిన్నారి క్షేమంగా తల్లిదండ్రుల వద్దకు చేరటంతో అందరూ ఊపిరి పీల్చుకున్నారు. అయితే పోలీసులు మాత్రం ఈ విషయాన్ని సీరియస్‌గా తీసుకున్నారు. కిడ్నాప్ చేసిన వ్యక్తులను ఎలాగైనా పట్టుకోవాలని విచారిస్తున్నారు.