ప్రమాణ స్వీకారం చేసిన వెంటనే.. 100 ఉత్తర్వులపై డొనాల్డ్ ట్రంప్ సంతకాలు

అమెరికా అధ్యక్షుడి ప్రమాణ స్వీకార ఉత్సవానికి అన్ని ఏర్పాట్లు పూర్తయ్యాయి. భారత కాలమానం ప్రకారం సోమవారం రాత్రి 10.30 గంటలకు అమెరికా అధ్యక్షుడిగా రెండోసారి డొనాల్డ్ ట్రంప్ పదవీ బాధ్యతలు చేపట్టనున్నారు. ఈ కార్యక్రమం కోసం ఇప్పటికే ఫ్లోరిడా నుంచి వాషింగ్టన్‌కు అమెరికా సైనిక విమానంలో డొనాల్డ్ ట్రంప్.. తన కుటుంబ సమేతంగా చేరుకున్నారు. అయితే అమెరికా అధ్యక్షుడిగా బాధ్యతలు చేపట్టిన తొలి రోజే సంచలన నిర్ణయాలకు ట్రంప్ స్వీకారం చుట్టనున్నారు. ఈ నేపథ్యంలోనే అమెరికా అధ్యక్ష కుర్చీలో కూర్చున్న వెంటనే 100 ఉత్తర్వులపై సంతకాలు చేసేందుకు అన్ని ఏర్పాట్లు పూర్తి చేసుకున్నారు.

అమెరికా అధ్యక్ష పగ్గాలు చేపట్టిన మొదటి రోజే తన మార్క్ ప్రపంచానికి చూపించేందుకు ట్రంప్‌ సిద్ధం అయ్యారు. సుమారు 100 ఎగ్జిక్యూటివ్ ఆర్డర్స్‌పై సంతకాలు చేసేలా ఆయన బృందం రంగం సిద్ధం చేసింది. అమెరికా ఎన్నికల ప్రచారంలో భాగంగా ఇచ్చిన హామీల మేరకు ఈ ఉత్తర్వులు జారీ చేయనున్నట్లు ట్రంప్ సన్నిహితులు పేర్కొన్నారు. అయితే ఈ 100 సంతకాలు పెట్టే ఫైల్స్ చాలా కీలకమైనవని తెలిపారు. అమెరికాలోకి వచ్చే అక్రమ వలసదారులకు అడ్డుకట్ట వేసి వెనక్కి పంపించడం, అమెరికా దక్షిణ సరిహద్దులు మూసివేయడం, ట్రాన్స్‌జెండర్ల హక్కులపై ఉక్కుపాదం, చమురు వెలికితీయడాన్ని పెంచడం, గతంలో క్యాపిటల్‌ హిల్స్ వద్ద జరిగిన హింసాత్మక సంఘటనకు సంబంధించి దోషులుగా తేలిన సుమారు 1500 మందికి క్షమాభిక్ష ప్రసాదించడం వంటి వాటికి సంబంధించిన పత్రాలపై మొదటి రోజే సంతకాలు పెట్టాలనే పట్టుదలతో డొనాల్డ్ ట్రంప్‌ ఉన్నారు.

ఇక అమెరికా సైన్యంలో ప్రస్తుతం విధులు అందిస్తున్న ట్రాన్స్‌జెండర్లపై నిషేధం విధించాలని డొనాల్డ్ ట్రంప్‌ నిర్ణయం తీసుకుంటే.. ఒకేసారి 15 వేల మంది ఉద్యోగాలు కోల్పోయే అవకాశం ఉందని తెలుస్తోంది. ఇక వివిధ దేశాలపై అదనపు సుంకాల విధింపుపైనా కొత్తగా అధ్యక్షుడిగా ఎన్నికైన తర్వాత డొనాల్డ్ ట్రంప్ నిర్ణయం తీసుకోనున్నారు. మరోవైపు.. జో బైడెన్‌ అధ్యక్షుడు అయిన మొదటి వారంలో 22 ఉత్తర్వులపై సంతకాలు చేశారు.

4 ఏళ్ల క్రితం ట్రంప్ నుంచి బైడెన్‌కు అధికార మార్పిడి సమయంలో క్యాపిటల్‌ హిల్ భవనంపై జరిగిన దాడి వేళ వైట్‌హౌస్ నుంచి డొనాల్డ్ ట్రంప్‌ బయటికి వచ్చిన విషయం తెలిసిందే. మరోవైపు.. ప్రస్తుతం అమెరికాలో విపరీతమైన చలి కారణంగా ఈ ప్రమాణ స్వీకారోత్సవాన్ని క్యాపిటల్ హిల్స్ భవనం బయట కాకుండా లోపలే నిర్వహిస్తున్నారు. 1985లో అమెరికా అధ్యక్షుడిగా రొనాల్డ్‌ రీగన్‌ రెండోసారి బాధ్యతలు చేపట్టినప్పుడు కూడా ఇలాంటి పరిస్థితి వచ్చింది. 40 ఏళ్ల తర్వాత ఇప్పుడు ఇలా జరగడం అమెరికా చరిత్రలో రెండోసారి. ఇక అమెరికాలో అధ్యక్షుడిగా బాధ్యతలు చేపట్టిన తర్వాత డొనాల్డ్ ట్రంప్‌ త్వరలోనే భారత్, చైనాలతో పర్యటించే అవకాశాలు ఉన్నట్లు తెలుస్తోంది.