ఏపీలోని రోడ్లకు కేంద్రం నిధులు

ఆంధ్రప్రదేశ్‌లో మౌలిక వసతుల అభివృద్ధికి కేంద్రం అధిక ప్రాధాన్యం ఇస్తోంది. ఏపీలోని జాతీయ రహదారులు, రోడ్ల విస్తరణ పనులు కేంద్రం సహకారంతో వేగంగా జరుగుతున్నాయి. తాజాగా ఏపీలోని గ్రామీణ ప్రాంతాల్లో రోడ్ల నిర్మాణం కోసం కేంద్రం నిధులు మంజూరు చేసింది. ప్రధానమంత్రి గ్రామ సడక్‌ యోజన పథకం ఫేజ్‌-3లో భాగంగా ఆంధ్రప్రదేశ్ రాష్ట్రానికి కేంద్రం రూ.223.65 కోట్లు మంజూరు చేసింది. ఈ 223 కోట్లలో గుంటూరు జిల్లాకు రూ.143.24 కోట్లు దక్కాయి. ఇక రాయలసీమ జిల్లాలకు రూ.80.41 కోట్లు కేటాయించారు. ఈ విషయాన్ని కేంద్ర మంత్రి పెమ్మసాని చంద్రశేఖర్‌ వెల్లడించారు. గుంటూరు జిల్లా కొలనుకొండలో కేంద్ర మంత్రి పెమ్మసాని చంద్రశేఖర్ శనివారం విలేకర్లతో మాట్లాడారు. ఈ సందర్భంగా పెమ్మసాని చంద్రశేఖర్ ఈ విషయాన్ని వెల్లడించారు.

వైసీపీ పాలనలో గుంతలూరుగా మారిన గుంటూరును కూటమి ప్రభుత్వం అభివృద్ధి దిశగా నడిపిస్తోందని కేంద్ర మంత్రి పెమ్మసాని తెలిపారు. గుంటూరు జిల్లాలోని 20 రహదారులు, అన్నవరపులంక వంతెనకు కలిపి రూ. 143.24 కోట్లు మ్యాచింగ్ ఫండ్‌ను మంజూరు చేయించుకున్నట్లు వివరించారు. అలాగే కర్నూలు, చిత్తూరు, ప్రకాశం జిల్లాలలోని మరో 8 రహదారులు, 3 వంతెనల నిర్మాణానికి కలిపి మొత్తం రూ. 223.65 కోట్లు కేంద్రం మంజూరు చేసిందని పెమ్మసాని చంద్రశేఖర్ వివరించారు. కేంద్ర ప్రభుత్వం 60 శాతం , రాష్ట్రం 40 శాతం వాటాగా నిధులు మంజూరైనట్లు మంత్రి వెల్లడించారు. మంజూరైన నిధులలో రూ.123.46 కోట్లు ఖర్చుచేసి 138 కిలోమీటర్ల మేర రోడ్లు, 100.19 కోట్లతో నాలుగు వంతెనలు విస్తరిస్తామని తెలిపారు.

రాష్ట్రంలో 139 కిలోమీటర్ల మేర 20 రహదారుల నిర్మాణానికి కేంద్రం నుంచి రూ.74 కోట్లు, రాష్ట్రం వాటాగా 49.3 కోట్లు విడుదలైనట్లు మంత్రి వివరించారు. అలాగే వంద కోట్ల రూపాయల అంచనాతో రాష్ట్రంలో నాలుగు వంతెనలు నిర్మించనున్నట్లు పెమ్మసాని వివరించారు. ఇందుకోసం కేంద్రం వాటాగా రూ.29 కోట్లు, మిగతా మొత్తం రాష్ట్ర ప్రభుత్వం భరించనున్నట్లు వెల్లడించారు. మరోవైపు 2025-26 ఏపీ బడ్జెట్‌లో గుంటూరు ఛానల్ విస్తరణ దిశగా భూ సేకరణకు రూ. 100 కోట్లు, విస్తరణకు రూ. 300 కోట్లు కేటాయించినందుకు ముఖ్యమంత్రి చంద్రబాబు నాయుడు, డిప్యూటీ సీఎం పవన్ కళ్యాణ్‌లకు కేంద్ర మంత్రి కృతజ్ఞతలు తెలియజేశారు.