మహీర శర్మతో సిరాజ్ డేటింగ్.. రూమర్స్‌పై క్లారిటీ!

టీమిండియా పేస్ బౌలర్ మహమ్మద్ సిరాజ్‌కు ఇప్పుడు కొత్త తలనొప్పి మొదలైంది. ఆల్రెడీ టీమిండియాలో చోటు కోల్పోవడమే కాకుండా, తనకిష్టమైన ఆర్సీబీ నుంచి కూడా దూరమయ్యాడు. తాజాగా సిరాజ్ ఓ ఫిల్మ్ బ్యూటీతో రిలేషన్‌లో ఉన్నాడంటూ వార్తలు చక్కర్లు కొడుతున్నాయి. ఇదే విషయమై సిరాజ్ ఎక్కడ కనిపిస్తే అక్కడ మీడియా ఇదే ప్రశ్న వేస్తోంది.

మహమ్మద్ సిరాజ్, మహీర శర్మ కొంతకాలంగా సీక్రెట్ డేటింగ్‌లో ఉన్నారంటూ బాలీవుడ్ కోడై కూస్తోంది. అయితే, ఇదే విషయమై ఇద్దరూ కుండబద్దలు కొట్టినట్టు క్లారిటీ ఇచ్చారు. తాను ఎలాంటి రిలేషన్‌లో లేదంటూ మహీర శర్మ ఇన్‌స్టాగ్రామ్ స్టేటస్ పెట్టగా, దయచేసి ఫొటోగ్రాఫర్స్ అలాంటి క్వశ్చన్స్ అడగొద్దని అందులో నిజాలు లేవంటూ మహమ్మద్ సిరాజ్ ఇన్‌స్టా స్టేటస్‌ పెట్టారు. ఇద్దరూ ఒకేరోజు ఈ స్టేటస్‌లు పెట్టడంతో రూమర్స్‌పై క్లారిటీ వచ్చింది.

బాలీవుడ్ బ్యూటీ మహీర శర్మ మార్చి 20న ముంబైలో ఓ ఈవెంట్‌కి హాజరైంది. అక్కడికి వచ్చిన పాపరాజీస్ (సెలబ్రిటీల పిక్స్ తీసే ఫొటోగ్రాఫర్స్) ఈసారి ఐపీఎల్‌లో ఎవరికి సపోర్ట్ చేస్తున్నారంటూ అడిగారు. 'రేపటి నుంచి ఐపీఎల్ స్టార్ట్ అవుతుంది. మహీరా మేడమ్ మీరు ఎవరి సైడ్ ఉంటున్నారు. ఏ జట్టుకు మీ సపోర్ట్? మీ ఫెవరెట్ టీమ్ ఏది?' అంటూ ఓ వీడియోగ్రాఫర్ అడిగాడు.

సిరాజ్‌తో మహీరా రిలేషన్‌లో ఉందంటూ వస్తున్న వార్తల నేపథ్యంలో ఆ వీడియోగ్రాఫర్ అలాంటి క్వశ్చన్స్ వేశాడు. వీరిద్దరూ సీక్రెట్‌గా కొంతకాలంగా డేటింగ్ చేస్తున్నారనే వార్తలు బాలీవుడ్‌లో బాగా వినిపిస్తున్నాయి. ఈ రూమర్స్ నేపథ్యంలోనే పాపరాజీస్ మహీరా, సిరాజ్ ఎక్కడికి వెళ్లినా ఇదే ప్రశ్నలు వేస్తున్నారు.

"దయచేసి రూమర్స్‌ని స్ప్రెడ్ చేయడం ఆపేయండి. నేను ఎవరితోనూ డేటింగ్‌లో లేను" అంటూ మహీరా క్లారిటీ ఇవ్వగా.. "పాపరాజీస్‌ను నేను వేడుకుంటున్నాను. దయచేసి అలాంటి ప్రశ్నలు నన్ను అడగొద్దు. ఇదంతా నిజం కాదు, నిరాధారమైనవి కూడా. ఇది ఇంతటితో ముగుస్తుంది అనుకుంటున్నాను" అని సిరాజ్ స్టేటస్‌లో క్లారిటీ ఇచ్చాడు.

హిందీ బిగ్ బాస్ 13తో మహీరా శర్మ బాగా ఫేమస్ అయింది. నాగిన్ 3, కుండలి భాగ్య, బెపనా ప్యార్ వంటి షోలతో బుల్లితెర మీద ఈ భామ బాగా పేరు తెచ్చుకుంది. సీరియల్సే కాకుండా మ్యూజిక్ ఆల్బమ్స్‌లోనూ ఈ భామ నటిస్తోంది.