ఇపుడు మోదీని పాకిస్తాన్ కు పంపిస్తారా....కె.నారాయణ

భారత్, పాకిస్థాన్ మధ్య ఉద్రిక్తతల సమయంలో సీపీఐ జాతీయ కార్యదర్శి నారాయణ చేసిన వ్యాఖ్యలపై బీజేపీ నేతలు మండిపడిన సంగతి తెలిసిందే. ఈ క్రమంలోనే సీపీఐ నారాయణ మరోసారి స్పందించారు. భారత్ పాకిస్తాన్ కాల్పులు విరమణ నేపథ్యంలో.. నారాయణ రియాక్టయ్యారు. ఈ సందర్భంగా బీజేపీపై తీవ్రస్థాయిలో మండిపడ్డారు. పాకిస్థాన్‌తో యుద్ధం వద్దని, శాంతియుత పరిష్కారం కావాలని తాను అన్నందుకు.. తనను పాకిస్థాన్ పంపాలని బీజేపీ నేతలు అన్నారని సీపీఐ నారాయణ గుర్తుచేశారు. మరిప్పుడు ప్రధాని మోదీని పాకిస్థాన్ పంపిస్తారా అంటూ ప్రశ్నించారు. తాను యుద్ధం విరమించాలని, చర్చల ద్వారా సమస్యను పరిష్కరించుకోవాలని చెప్తే, తనను పాకిస్థాన్ పంపించాలని చెప్పిన బీజేపీ నేతలు.. పీవోకేను స్వాధీనం చేసుకోకుండానే పాకిస్థాన్‌తో శాంతి చర్చలకు ఎందుకు అంగీకరించారని ప్రశ్నించారు. బీజేపీ ద్వంద్వ వైఖరిని సీపీఐ నారాయణ తప్పుబట్టారు.

మరోవైపు ఉగ్రవాదం ఎప్పటికీ ప్రమాదకరమైనదేనని.. మానవాళికి పెను ముప్పుగా నారాయణ అభివర్ణించారు. ఉగ్రవాదాన్ని సమూలంగా నాశనం చేసేందుకు అవసరమైన అన్ని చర్యలు చేపట్టాలని.. ఇందులో ఎలాంటి ఉపేక్షకు తావులేదన్నారు. ఉగ్రవాదంపై కఠిన చర్యలు తీసుకోవాలని తాను చెప్తే.. కొంతమంది అపార్థం చేసుకుంటున్నారని సీపీఐ నారాయణ ఆవేదన వ్యక్తం చేశారు. దీనిని తీవ్రంగా ఖండిస్తున్నట్లు తెలిపారు. భారత్, పాకిస్థాన్ కాల్పుల విరమణ, శాంతి చర్చలను తాము స్వాగతిస్తున్నామని నారాయణ తెలిపారు, ఇది మంచి పరిణామమని అభిప్రాయపడ్డారు.

మరోవైపు భారత్ పోరు ఉగ్రవాదంపై ఉండాలి కానీ.. పాకిస్థాన్ ప్రజలు, అక్కడి ప్రభుత్వంపై కాదని సీపీఐ నారాయణ ఇటీవల వ్యాఖ్యానించారు. ఈ నేపథ్యంలో బీజేపీ నేతలు సీపీఐ నారాయణ వ్యాఖ్యలపై మండిపడ్డారు. ఈ క్రమంలోనే బీజేపీ ఎమ్మెల్సీ సోము వీర్రాజు.. నారాయణపై ఘాటైన విమర్శలు చేశారు. పహల్గాం ఉగ్ర దాడి ఘటనతో దేశం మొత్తం శోకసంద్రంలో మునిగిపోయిందని, ఈ సమయంలో పాకిస్థాన్‌పై యుద్ధం చేయవద్దని సీపీఐ నారాయణ చెప్పడం ఎంతవరకు సమంజసమని సోము వీర్రాజు ప్రశ్నించారు. పాకిస్థాన్ ప్రజలపై నారాయణకు అంతగా ప్రేమ ఉంటే, ఆయనే తట్టాబుట్టా సర్దుకుని పాకిస్థాన్‌కు వెళ్లిపోవాలని వ్యాఖ్యానించారు. దేశ వ్యతిరేకంగా మాట్లాడిన నారాయణను సీపీఐ పార్టీ సస్పెండ్ చేయాలని డిమాండ్ చేశారు.