అవినీతి ఆరోపణలతో అన్నవరంలో అర్చకుడు సస్పెండ్

ఓ ఫోటో కారణంగా అన్నవరం దేవస్థానం లో ఓ అర్చకుడి ఉద్యోగం ఊడింది. అన్నవరం దేవస్థానంలోని కనకదుర్గ ఆలయంలో హరగోపాల్ అనే వ్యక్తి అర్చకుడిగా పనిచేస్తున్నారు. అయితే హరగోపాల్ ఆలయంలోని నెయ్యి డబ్బాలను అనుమతి లేకుండా తరలించే ప్రయత్నం చేశారని ఆరోపణలు వచ్చాయి. పూజకు వాడే నెయ్యిని అన్నవరం దేవస్థానం స్టోర్స్ నుంచి హరగోపాల్ అనుమతి లేకుండా తీసుకుని.. కొండ కింద ఉన్న తొలిపావంచాల వద్దకు తెచ్చారని.. మూడు డబ్బాల నెయ్యిని కారులో ఎక్కించి తరలించే ప్రయత్నం చేశారనే ఆరోపణలు వచ్చాయి. కారులో ఎక్కిస్తున్న సమయంలో కొంతమంది ఫోటో తీసి.. హరగోపాల్ వ్యవహారంపై అన్నవరం దేవస్థానం ఈవోకు ఫిర్యాదు చేశారు. దీంతో హరగోపాల్ మీద వచ్చిన ఆరోపణలపై ఈవో విచారణ జరిపించారు. ఈ వ్యవహారంపై విచారణ జరిపిన అధికారులు.. నిజమేనని నిర్ధారించడంతో హరగోపాల్‌ను ఆలయ అర్చక విధుల నుంచి సస్పెండ్ ఈవో వి. సుబ్బారావు ఆదేశాలిచ్చారు.

తిరుమల తరహాలో అన్నవరంలో రిజిస్ట్రేషన్

మరోవైపు తిరుమల తిరుపతి దేవస్థానం తరహాలోనే అన్నవరం సత్యదేవుని ఆలయంలోనూ రిజిస్ట్రేషన్ విధానం తీసుకువచ్చిన సంగతి తెలిసిందే. అన్నవరం సత్యదేవుని ఆలయంలో వివిధ సేవలు చేసేందుకు ఆసక్తి చూపించే వారి కోసం రిజిస్ట్రేషన్ విధానాన్ని ప్రవేశపెట్టారు. ప్రధానాలయంతో పాటుగా అన్నదానం, భక్తులకు మంచినీటి పంపిణీ వంటి సేవలు చేసేందుకు ఆసక్తి కలిగినవారు https://www.annavaramdevasthanam.com వెబ్‌సైట్‌లో నమోదు చేసుకోవాలని ఆలయ అధికారులు సూచించారు. పూర్తి వివరాల కోసం పీఆర్వో కార్యాలయాన్ని సంప్రదించాలని సూచించారు.

మరోవైపు కేంద్ర ప్రభుత్వం అమలు చేస్తున్న ప్రసాద్ పథకం కింద అన్నవరం దేవస్థానాన్ని అభివృద్ధి చేస్తున్న సంగతి తెలిసిందే. ప్రసాద్ పథకం కింద దేవాలయానికి రూ.25.32 కోట్లు మంజూరయ్యాయి. త్వరలోనే టెండర్లు పిలవనున్నారు. డిప్యూటీ సీఎం పవన్ కళ్యాణ్ ప్రత్యేక చొరవ తీసుకోవటంతో ఇటీవల గతేడాది ఆఖర్లో ఈ నిధులు విడుదల అయ్యాయి. అయితే వివిధ సాంకేతిక కారణాలతో టెండర్ల ప్రక్రియలో జాప్యం జరుగుతోంది. ప్రసాద్ పథకం కింద అందే నిధులతో అన్నవరం కొండపై నూతన అన్నదాన భవనం నిర్మి్ంచనున్నారు. అలాగే క్యూ కాంప్లెక్స్‌ అభివృద్ధి చేయనున్నారు. వీటితో పాటుగా రిటైనింగ్‌ వాల్‌ నిర్మాణ పనులు చేపట్టాలని ఆధికారులు ఆలోచన చేస్తున్నారు.