నెలకు రూ.25 వేలు సంపాదిస్తున్నా.. ఎలాంటి పెట్టుబడులు పెట్టాలి

చిన్న వయసు నుంచే పెట్టుబడులు పెట్టడం ద్వారా దీర్ఘకాలంలో మంచి రాబడులు అందుకోవచ్చని నిపుణులు సూచిస్తుంటారు. ప్రస్తుతం ఉద్యోగాలు చేసే చాలా మంది యువత స్టాక్ మార్కెట్లు, మ్యూచువల్ ఫండ్స్ వంటి వాటిల్లో ఇన్వెస్ట్ చేస్తున్నారు. అయితే, పెట్టుబడి పెట్టేందుకు ఎన్నో అవకాశాలు ఉన్నాయి. చాలా మందికి ఏ విధంగా ఇన్వెస్ట్ చేయాలో తెలియదనే చెప్పాలి. దీంతో అలాంటి వారు నిపుణుల సలహాలు తీసుకుంటుంటారు. అలా 24 ఏళ్ల ఓ యువకుడు పెట్టుబడుల గురించి అడిగిన ప్రశ్నకు సమాధానం తెలుసుకుందాం.

ప్రశ్న: నేను సాఫ్ట్ వేర్ ఉద్యోగిని. నా వాయసు ఇప్పుడు 24 సంవత్సరాలు. నెలకు రూ.25 వేల వరకు సంపాదిస్తున్నాను. ఆర్థికంగా ఉన్నత స్థానంలోకి చేరుకోవాలనుకుంటున్నాను. అందుకు ఎలాంటి పెట్టుబడులు పెట్టాలి? హెల్త్, లైఫ్ ఇన్సూరెన్స్ వంటి పాలసీలు ఎంత వరకూ తీసుకోవాలి? పెట్టుబడులతో పాటు క్రెడిట్ కార్డుల వంటివి తీసుకోవడం మంచిదేనా?

సమాధానం: ఆర్థికంగా ఉన్నత స్థానంలోకి రావాలని చిన్న వయసులోనే ఆలోచించడం అభినందనీయం. మీరు సరైన ప్రణాళికతో ముందుకు సాగితే మీ కోరిక తప్పకుండా ఫలిస్తుంది. అందుకు అంకిత భావం, లక్ష్యంపై ఒక స్పష్టత, క్రమ శిక్షణ అవసరం. పెట్టుబడులతో పాటు మీ కెరీర్ పైనా ప్రత్యేక దృష్టి సారించండి. ఆదాయం పెంచుకునే ప్రయత్నాలు చేయండి. అయితే, మీరు రూ.50 లక్షల టర్మ్ లైఫ్ ఇన్సూరెన్స తీసుకోండి. అలాగే మీ తల్లిదండ్రులకు, మీకూ ఆరోగ్య బీమా పాలసీ కొనుగోలు చేయండి.

వాటితో పాటు రూ.25 లక్షల వ్యక్తిగత ప్రమాద బీమా కొనుగోలు చేయండి. క్రెడిట్ కార్డులు తీసుకోవడం ద్వారా ఇబ్బంది ఉండదు కానీ వాటిని అత్యంత జాగ్రత్తగా ఉపయోగిస్తేనే ప్రయోజనం ఉంటుంది. లేదంటే అప్పుల ఊబిలో కూరుకుపోతారు. చాలా మంది క్రెడిట్ కార్డులను ఆర్భాటాల కోసమే ఉపయోగిస్తారు. అది పెద్ద పొరపాటు. వీలైనంత వరకు సొంత డబ్బునే ఖర్చు చేయాలి. అలాగే మీరు కనీసం ఆరు నెలలకు సరిపోయేలా అత్యవసర నిధిని ఏర్పాటు చేసుకోండి. ఇవన్నీ పూర్తి చేసిన తర్వాత పెట్టుబడులపై దృష్టి పెట్టండి. మీ ఆదాయంలో కనీసం 20 శాతం హైబ్రిడ్ ఈక్విటీ ఫండ్లలో మదుపు చేయడం మొదలు పెట్టండి. సిస్టమాటిక్ ఇన్వెస్ట్‌మెంట్ ప్లాన్ ( సిప్) ద్వారా నెల నెలా ఇన్వెస్ట్ చేయడం ద్వారా దీర్ఘకాలంలో పెద్ద మొత్తంలో రాబడి అందుకోవచ్చు. అయితే ఈక్విటీ పెట్టుబడుల్లోనూ రిస్క్ ఉంటుంది. నిపుణుల సలహా మేరకు పోర్ట్ ఫోలియో నిర్మించుకోవాలి. అప్పుడే లాభాలు అందుకోవచ్చు