ఏ బ్యాంక్ అకౌంట్లో మినిమం ఎంత బ్యాలెన్స్ ఉండాలి

దేశంలోనే రెండో అతిపెద్ద ప్రైవేట్ బ్యాంకు.. ఐసీఐసీఐ బ్యాంకు రాఖీ పండగ పూట కస్టమర్లకు భారీ షాకిచ్చిన సంగతి తెలిసిందే. ఆగస్ట్ 1 నుంచి ఈ బ్యాంక్ సేవింగ్స్ అకౌంట్ తీసుకున్న వారికి నెలవారీగా సగటున మెయింటెయిన్ చేసే బ్యాలెన్స్ మొత్తాన్ని పెంచేసింది. మెట్రో, అర్బన్ ప్రాంతాల్లో నెలకు సగటున రూ. 50 వేల మినిమం బ్యాలెన్స్ మెయింటెయిన్ చేయాలని స్పష్టం చేసింది. ఇది అంతకుముందు రూ. 10 వేలుగానే ఉండటం గమనార్హం. ఇక సెమీ అర్బన్ ఏరియాల్లో రూ. 5 వేల నుంచి రూ. 25 వేలకు పెంచేసింది. గ్రామీణ ప్రాంతాల్లో కూడా దీనిని రూ. 10 వేలకు చేర్చింది.

దీనిని చాలా బ్యాంకులు మినిమం బ్యాలెన్స్ రిక్వైర్‌మెంట్ లేదా మినిమం అకౌంట్ బ్యాలెన్స్ అని పిలుస్తాయి. ఇది కనీసం నిర్వహించాల్సిన మొత్తం. నెలవారీగా సగటున బ్యాంకులు లెక్కిస్తుంటాయి. బ్యాంకులు నిర్దేశించిన మొత్తం బ్యాలెన్స్ సగటున నిర్వహించకపోతే పెనాల్టీలు విధిస్తుంటాయి. ఇది నేరుగా మీ సేవింగ్స్ అకౌంట్ నుంచే కట్ చేసుకుంటాయి. ఇక ప్రస్తుతానికి సేవింగ్స్ అకౌంట్‌లో మినిమం బ్యాలెన్స్ మెయింటెయిన్ చేయడం ఐసీఐసీఐలోనే అత్యధికంగా ఉంది. ఇతర బ్యాంకుల్లో ఈ రూల్స్ ఎలా ఉన్నాయో చూద్దాం.

>> అతిపెద్ద ప్రైవేట్ బ్యాంక్ అయిన హెచ్‌డీఎఫ్‌సీ బ్యాంకులో చూస్తే అర్బన్ బ్రాంచీల్లో అయితే సగటున మినిమం బ్యాలెన్స్ రూ. 10 వేలుగా ఉండాలి. లేదా కనీసం ఏడాది వ్యవధితో రూ. 1 లక్ష ఫిక్స్‌డ్ డిపాజిట్ చేసి ఉండాలి. సెమీ అర్బన్ ఏరియాల్లో ఇది సగటు బ్యాలెన్స్ రూ. 5 వేలుగా ఉంది. లేదా రూ. 50 వేలు కనీసం ఎఫ్‌డీ చేయాలి. గ్రామీణ ప్రాంతాల్లో చూసుకుంటే కనీసం రూ. 2500 అకౌంట్లో లేదా రూ. 25 వేలు ఎఫ్‌డీ చేయాలి.

>> స్టేట్ బ్యాంక్ ఆఫ్ ఇండియాలో ఎలాంటి ఇబ్బంది లేదు. ఇక్కడ ఎలాంటి బ్యాలెన్స్ మెయింటెయిన్ చేయకపోయినా ఫర్వాలేదు. ఇక్కడ జీరో బ్యాలెన్స్ రిక్వైర్‌మెంట్ అని గతంలోనే స్పష్టం చేసింది. కాబట్టి అకౌంట్ బ్యాలెన్స్ లేకపోయినా పెనాల్టీ ఉండదు.

>> మూడో అతిపెద్ద ప్రైవేట్ బ్యాంక్ అయిన కోటక్ మహీంద్రా బ్యాంకులో చూస్తే ఇక్కడ సేవింగ్స్ అకౌంట్ రకాన్ని బట్టి సగటున రూ. 10 వేల నుంచి రూ. 20 వేల వరకు ఉండాలని కోరుతోంది. ఇక్కడ షార్ట్ ఫాల్ అమౌంట్‌పై 6 శాతం పెనాల్టీ విధిస్తోంది.

>> యాక్సిస్ బ్యాంకులో నెలకు సగటున అన్ని ప్రాంతాల్లో రూ. 10 వేలు మెయింటెయిన్ చేయాలి. లేదా ఏడాది వ్యవధికి రూ. 50 వేలు ఎఫ్‌డీ చేయాల్సి ఉంటుంది.

>> బ్యాంక్ ఆఫ్ బరోడా విషయానికి వస్తే అర్బన్/మెట్రో ఏరియాల్లో రూ. 2 వేలు, సెమీ అర్బన్ ప్రాంతాల్లో రూ. 1000, గ్రామీణ ప్రాంతాల్లో రూ. 500 గా ఉంది. పంజాబ్ నేషనల్ బ్యాంకులో మెట్రో ప్రాంతాల్లో రూ. 10 వేలు, అర్బన్‌లో రూ. 5 వేలు, సెమీ అర్బన్‌లో రూ. 2 వేలు, గ్రామీణ ప్రాంతాల్లో రూ. 1000 గా ఉంది. ఇతర ప్రభుత్వ బ్యాంకుల్లో కూడా చాలా తక్కువే ఉంది.