తెలంగాణలో రూ.600 కోట్ల కోడిగుడ్ల కుంభకోణం

తెలంగాణ ప్రభుత్వంపై బీఆర్‌ఎస్ రాష్ట్ర ప్రధాన కార్యదర్శి డాక్టర్ ఆర్.ఎస్.ప్రవీణ్‌కుమార్ తీవ్ర ఆరోపణలు చేశారు. గురుకులాలు, ఇతర పాఠశాలల విద్యార్థులకు అందించే కోడిగుడ్ల ధరల పెంపులో తెలంగాణ ప్రభుత్వం రూ.600 కోట్ల కుంభకోణానికి పాల్పడుతోందన్నారు. ప్రభుత్వం వెంటనే సంబంధిత జీవో నెం.17ను రద్దు చేయకపోతే రాష్ట్రవ్యాప్తంగా కలెక్టరేట్లను ముట్టడిస్తామని హెచ్చరించారు. మంగళవారం తెలంగాణ భవన్‌లో ఏర్పాటు చేసిన విలేకరుల సమావేశంలో ప్రవీణ్‌కుమార్ మాట్లాడుతూ.. గురుకుల విద్యార్థులకు పంపిణీ చేసే కోడిగుడ్ల ధరను కాంగ్రెస్ ప్రభుత్వం రూ.5.50 నుంచి రూ.7కు పెంచిందని తెలిపారు. ఇది అదనపు భారాన్ని మాత్రమే కాకుండా, పెద్ద ఎత్తున అవినీతికి దారి తీస్తుందని ఆయన ఆరోపించారు.

ప్రభుత్వం విడుదల చేసిన జీవో నెం.17 ప్రకారం.. కేవలం రూ.3 కోట్ల టర్నోవర్‌ ఉన్న కాంట్రాక్టర్లకు మాత్రమే టెండర్లు దక్కేలా నిబంధనలు రూపొందించారని ఆయన విమర్శించారు. దీనివల్ల కాంగ్రెస్ పార్టీకి చెందిన కొందరు నేతల అనుచరులకే టెండర్లు లభిస్తాయని, ఇది వ్యవస్థీకృత అవినీతి అని అన్నారు. ఈ జీవో వల్ల సుమారు 20 వేల మంది పేద గుత్తేదార్లు రోడ్డున పడే ప్రమాదం ఉందని ప్రవీణ్‌కుమార్ ఆందోళన వ్యక్తం చేశారు. వారి జీవనోపాధికి భద్రత లేకుండా పోతుందని, తద్వారా సామాన్య ప్రజలకు అన్యాయం జరుగుతుందని ఆయన అన్నారు. జీవో నెం.17ను వెంటనే రద్దు చేసి, పారదర్శకంగా టెండర్ల ప్రక్రియను చేపట్టాలని డిమాండ్ చేశారు. లేకపోతే బీఆర్ఎస్ పార్టీ పెద్ద ఎత్తున ఆందోళనలు చేపడుతుందని హెచ్చరించారు.

మరో కార్యక్రమంలో బీఆర్ఎస్ నాయకుడు ఏనుగుల రాకేశ్‌రెడ్డి మాట్లాడుతూ.. గ్రూప్-1 పరీక్షల్లో జరిగిన అవకతవకలపై రాష్ట్ర ప్రభుత్వం ఇప్పటికీ స్పందించలేదని విమర్శించారు. పర్సంటేజీల పాలన నడుస్తోందని, నిరుద్యోగుల భవిష్యత్తుతో ప్రభుత్వం ఆడుకుంటుందని ఆయన ఆరోపించారు. ప్రభుత్వం నిరుద్యోగుల సమస్యలపై దృష్టి పెట్టాలని, పరీక్షల నిర్వహణలో పారదర్శకతను పెంచాలని ఆయన డిమాండ్ చేశారు. ప్రభుత్వ నిర్ణయాలపై ప్రతిపక్షాలు చేస్తున్న విమర్శలకు ఇప్పటివరకు పాలకపక్షం నుంచి స్పందన రాలేదని అన్నారు.