15 రోజుల్లోనే రెండోసారి షాక్.. స్విగ్గీ ప్లాట్‌ఫాం ఫీ పెంపు

దేశీయ దిగ్గజ ఆన్‌లైన్ ఫుడ్ డెలివరీ సంస్థలు తమ యూజర్లకు ఊహించని షాకులిస్తున్నాయి. జొమాటో ప్లాట్ ఫాం ఫీజు పెంచిన మరుసటి రోజునే స్విగ్గీ సైతం పెంపు ప్రకటన చేసింది. ఫుడ్ డెలివరీ బిజినెస్ ప్లాట్ ఫాం ఫీ పెంచుతున్నట్లు తాజాగా ప్రకటించింది. అంతేకాదు గడిచిన 15 రోజుల్లోనే రెండోసారి ఈ ప్లాట్ ఫామ్ ఫీజు పెంచడం ఆన్‌లైన్ ఫుడ్ లవర్స్‌కి ఊహించని షాక్ అని చెప్పవచ్చు. ప్రస్తుతం స్విగ్గీలో ప్లాట్ ఫాం ఫీజును రూ.15కు పెంచింది. అయితే ఎంపిక చేసిన మార్కెట్లకే ఈ పెంపు వర్తిస్తుందని తెలిపి స్వల్ప ఊరట కల్పించింది. ఆగస్టు 14, 2025 రోజునే ప్లాట్ ఫాం ఫీ రూ.12 నుంచి రూ.14కు పెంచిన సంగతి తెలిసిందే. పక్షం రోజుల్లోనే మరో రూ.1 పెంచడం గమనార్హం.

ఫుడ్ డెలివరీ ఆర్డర్లపై స్విగ్గీ, జొమాటో వంటి ఆన్‌లైన్ ప్లాట్‌ ఫామ్స్ ఈ ఛార్జీలను విధిస్తున్నాయి. ప్రస్తుతం సిగ్గీలో ఈ ఫీజు 15కు చేరింది. అయితే, ఇందులోనే వస్తు సేవల పన్ను జీఎస్టీ సైతం కలిసి ఉంటుంది. స్విగ్గీ ప్రత్యర్థి సంస్థ అయిన జొమాటో సెప్టెంబర్ 2వ తేదీ మంగళవారం నుంచే ప్లాట్ ఫాం ఫీజును రూ.10 నుంచి రూ.12కు పెంచింది. ఈ పండుగల సీజన్‌లో డిమాండ్ ఉంటుందన్న అంచనాలతో ఈ నిర్ణయం తీసుకున్నట్లు తెలుస్తోంది. అయితే, ఇందులో జీఎస్టీ ఉండదని తెలిపింది. అంటే పన్నులు అదనంగా చెల్లించాల్సి వస్తుంది.

  దిగ్గజ ఫుడ్ డెలివరీ సంస్థ స్విగ్గీ తొలిసారి 2023, ఏప్రిల్ నెలలో ప్లాట్ ఫాం ఫీజు రూ.2 అమలులోకి తెచ్చింది. దానిని క్రమంగా రూ.12కు పెంచుతూ వచ్చింది. జొమాటో సైతం ఇదే విధానాన్ని అవలంభించింది. చివరి సారిగా జొమాటో 2024, అక్టోబర్‌లో మార్చింది. దాదాపు ఏడాది తర్వాత మళ్లీ ప్లాట్ ఫాం ఫీజులను జొమాటో సవరించింది. అయితే, స్విగ్గీ మాత్రం 15 రోజుల్లోనే మార్చడం గమనార్హం.

ఈ అగ్రిగేటర్ ప్లాట్‌ఫామ్స్‌లో సగటు ఆర్డర్ విలువ రూ.500-600 మధ్య ఉంటోంది. దీంతో పోలిస్తే ఈ ప్లాట్ ఫాం ఫీజు అనేది చాలా తక్కువగా విశ్లేషకులు చెబుతున్నారు. అయితే, తాజా పెంపుపై స్విగ్గీ ఎలాంటి వ్యాఖ్యలు చేయలేదు. మరోవైపు.. ఈ ఆర్థిక సంవత్సరం 2025-26 ఏప్రిల్- జూన్ త్రైమాసికంలో కంపెనీ నెట్ లాస్ రూ.1197 కోట్లకు చేరింది. క్విక్ కామర్స్ బిజినెస్ ఇన్‌స్టా మార్ట్‌లో భారీగా పెట్టుబడులు పెట్టిన క్రమంలో కంపెనీ నష్టం రెండింతలైనట్లుగా తెలుస్తోంది. ఈ క్రమంలో ప్లాట్ ఫామ్ ఫీ పెంచినట్లు సమాచారం.