చికిత్స కోసం వచ్చిన ఓ యువతిపై అత్యాచారం

అనారోగ్యం కలిగినప్పుడు ఎవరైనా ఆసుపత్రికి వెళ్తారు. డాక్టర్లు, సిబ్బంది అందించే సేవలపై నమ్మకం ఉంచి వారికి వచ్చిన వ్యాధి ఏంటనే వివరాలను చెబుతారు. దీనిలో ఎలాంటి అబద్ధం ఉండదు. అయితే కరీంనగర్ జిల్లా కేంద్రంలో జరిగిన ఘోర సంఘటన వారిపై ఉంచిన నమ్మకాన్ని వమ్ము చేసింది. జగిత్యాల జిల్లాకు చెందిన ఓ యువతి అనారోగ్యంతో కరీంనగర్ నగరంలోని ప్రైవేటు దీపిక ఆసుపత్రిలో చేరింది. వైద్యులు చికిత్స నిమిత్తం ఆమెను అడ్మిట్ చేశారు. రాత్రి వేళలో ఆసుపత్రి కాంపౌండర్ దీక్షిత్ ఆమెకు మత్తుమందు ఇచ్చి.. ఘోర అత్యాచారానికి పాల్పడినట్లు తెలుస్తోంది.

ఈ ఘటన వెలుగులోకి రావడంతో యువతి ఎదుర్కొన్న మానసిక, శారీరక వేదనను మాటల్లో చెప్పలేనిది. వైద్య సేవలు పొందాల్సిన చోటే ఇలాంటి అమానుషం జరగడం ఆమె జీవితాన్ని చిదిమేసింది. దీంతో ఆసుపత్రిలోని భద్రతా వ్యవస్థ, సిబ్బంది నియామక విధానాలపై ప్రశ్నలు తలెత్తాయి. రోగుల రక్షణలో నిర్లక్ష్యం వహించడం సమాజాన్నే కుదిపేసే అంశమైంది.

బాధిత కుటుంబం పోలీసులకు ఫిర్యాదు చేయగా.. పోలీసులు తక్షణమే రంగంలోకి దిగి ఆసుపత్రి సీసీ ఫుటేజీ సేకరించారు. నిందితుడు పని చేసిన గదిని సీజ్ చేసి దర్యాప్తు వేగవంతం చేస్తున్నారు. ఈ ఘటన స్థానికంగా ఆగ్రహానికి దారితీసింది. ప్రజలు ఇటువంటి ఆసుపత్రులపై కఠినమైన పర్యవేక్షణ అవసరమని డిమాండ్ చేస్తున్నారు. ఈ ఒక్క ఆపుపత్రిలోనే కాదు.. నగర వ్యాప్తంగా చాలా ఆసుపత్రిలో భద్రతా లోపాలు ఉన్నాయని.. వైద్యానికి సంబంధించి చేసే పరీక్షల్లో కూడా అధిక డబ్బులు వసూలు చేస్తున్నట్లు ఆరోపణలు వస్తున్నాయి.

భారతదేశంలో అత్యాచారంపై భారతీయ శిక్షాస్మృతిలో (IPC 376 సెక్షన్) ప్రకారం కఠిన శిక్షలు ఉన్నాయి. వైద్య సేవలు అందించే సమయంలో రోగిపై లైంగిక దాడి జరిగితే.. అది మరింత నేరంగా పరిగణించబడుతుంది. నిందితుడికి కఠిన శిక్షలు విధించే అవకాశం ఉంది. అంతేకాకుండా.. ఆసుపత్రి నిర్వాహకులపై కూడా నిర్లక్ష్యానికి సంబంధించి కేసులు నమోదు చేసే అవకాశం ఉన్నది.

ఆరోగ్యం కోసం ఆశ్రయం కావాల్సిన ఆసుపత్రి, భయం కలిగించే ప్రదేశమవ్వకూడదు. ఈ ఘటనతో యువతి ఎదుర్కొన్న అవమానం, మానసిక గాయం ఎప్పటికీ చెరగని ముద్రగా మారిపోతాయి. ఇలాంటి సంఘటనలు పునరావృతం కాకుండా కఠినమైన చట్టపరమైన చర్యలతో పాటు, ఆసుపత్రులలో భద్రతా ప్రమాణాలు తప్పనిసరి చేయడం అత్యవసరం.