అమెరికాలో భారత సంతతి వ్యక్తి దారుణ హత్య.. భార్యాబిడ్డల కళ్లముందే కత్తితో తల నరికి మరీ..

అమెరికాలోని డాలస్‌లో ఒక భయంకరమైన ఘటన వెలుగులోకి వచ్చింది. 50 ఏళ్ల భారత సంతతి వ్యక్తి చంద్రమౌళి నాగ మల్లయ్యను.. ఆయన భార్యాబిడ్డల కళ్ల ముందే అత్యంత దారుణంగా తల నరికి హత్య చేశాడో వ్యక్తి. సెప్టెంబర్ 10వ తేదీన డాలస్ నగరానికి తూర్పు వైపున ఉన్న సామ్యూల్ బౌలెవార్డ్‌లోని 'డౌన్‌టౌన్ సూట్స్ మోటెల్'లో ఈ అమానుష ఘటన జరిగింది.

పోలీసుల వివరాల ప్రకారం.. 37 ఏళ్ల యొర్డానిస్ కోబోస్-మార్టినెజ్ మోటెల్‌లో పని చేస్తున్నాడు. అలాగే భారత సంతతి వ్యక్తి చంద్రమౌళి నాగమల్లయ్య కూడా అక్కడే మేనేజర్‌గా పని చేస్తున్నాడు. అయితే నిందితుడు యొర్డానిస్ కోబోస్-మార్టినెజ్ హోటల్లోని ఓ పాడు బడిన వాషింగ్ మిషన్‌ను వాడుకుంటూ తన బట్టలు ఉతుక్కున్నాడు. అయితే అది ఏమాత్రం సహించని చంద్రమౌళి నాగమల్లయ్య నేరుగా అతడి వద్దకే వెళ్లి నువ్వు చేసే పని నాకు నచ్చలేదని చెప్పడానికి బదులుగా.. అతడి తోటి మహిళా ఉద్యోగికి విషయం చెప్పాడు. దాన్ని వాడకూడదని చెప్పమని వివరించాడు. ఈక్రమంలోనే ఆమె వెళ్లి నిందితుడికి పాడుబడిన వాషింగ్ మిషన్ వాడొద్దని చెప్పింది.

దీంతో తీవ్ర ఆగ్రహానికి గురైన యొర్డానిస్ కోబోస్-మార్టినెజ్.. మేనేజర్ నాగమల్లయ్యను హత్య చేయాలనుకున్నాడు. అయినా ఏదైనా సమస్య ఉంటే తనతో కాకుండా తోటి వాళ్లతో చెప్పడం ఏంటంటూ.. ఓ కత్తి తీసుకుని నేరుగా మేనేజర్ వద్దకు చేరుకున్నాడు. అక్కడే అతడి భార్యాబిడ్డలు కూడా ఉన్నప్పటికీ ఏమాత్రం పట్టించుకోని అతడు.. దాడి చేయడం ప్రారంభించాడు. వారిద్దరూ అడ్డుకోబోయినా వినకుండా వారిని పక్కకు తోసేసి మరీ.. నాగమల్లయ్య తల నరికి చంపాడు. ముఖ్యంగా మొండం నుంచి తల వేరయ్యేంత వరకూ దాడి చేస్తూనే ఉన్నాడు. తల పూర్తిగా వేరయిన తర్వాత దాన్ని బయటకు తీసుకెళ్లి పార్కింగ్ స్థలంలో పడేశాడు. అనంతరం దాన్ని రెండు సార్లు కాలితో తన్ని.. ఆపై చెత్తకుండీలో పడేశాడు. పోలీసులకు పట్టుబడకూడదనే ఉద్దేశంతో పారిపోయాడు.

అయితే హోటల్ సిబ్బంది ద్వారా విషయం తెలుసుకున్న పోలీసులు హుటాహుటినా సంఘటనా స్థలానికి చేరుకున్నారు. నిందితుడు యొర్డానిస్ కోబోస్-మార్టినెజ్‌ను పారిపోయినట్లు తెలుసుకుని ఆయన కారు నెంబర్ ఆధారంగా వెంబడించి మరీ అరెస్ట్ చేశారు. అనంతరం మోటల్‌కు చేరుకుని సీసీటీవీ ఫుటేజీని కూడా స్వాధీనం చేసుకున్నారు. అందులోని దృశ్యాలు భయనకంగా ఉన్నాయని పోలీసులు చెప్పారు. అలాగే నిందితుడు నేరాన్ని అంగీకరించినట్లు తెలిపారు. అతను ఇప్పుడు డాలస్ కౌంటీ జైలులో.. క్యాపిటల్ మర్డర్ అభియోగంపై విచారణను ఎదుర్కొంటున్నట్లు వివరించారు. అంతేకాకుండా రికార్డుల ప్రకారం.. ఇతనిపై వలసదారుడి హోల్డ్ కూడా ఉంది. ప్రస్తుతం దాడి, నిందితుడికి సంబంధించిన కొన్ని ఫొటోలు సోషల్ మీడియాలో తెగ వైరల్ అవుతున్నాయి.

ఇది మాత్రమే కాకుండా కోబోస్-మార్టినెజ్‌కు ఇంతకు ముందే నేర చరిత్ర ఉన్నట్లు పోలీసులు గుర్తించారు. ముఖ్యంగా ఫ్లోరిడాలో ఆటో దొంగతనం, హ్యూస్టన్‌లో దాడి, బాలికతో అసభ్యంగా ప్రవర్తించడం వంటి ఆరోపణలు అతనిపై ఉన్నాయని చెప్పారు. ఈ భయంకరమైన హత్య అమెరికాలోని భారతీయ కమ్యూనిటీలో తీవ్ర భయాందోళనలకు కారణమైంది. ఈ ఘటనపై మరింత సమాచారం కోసం పోలీసులు దర్యాప్తు కొనసాగిస్తున్నారు.