బొలెరో వాహనంలో తరలిస్తున్న జింక మాంసం,,,డాక్టర్ మూసా ముఠాను అరెస్ట్

హైదరాబాద్‌లో జింక మాంసం కలకలం రేపుతోంది. టోలీచౌక్‌లోని ఓ అపార్ట్‌మెంట్‌లో 10 కిలోల జింక మాంసం , మూడు కొమ్ములు లభ్యమయ్యాయి. టోలిచౌకీ‌లోని మావిన్ క్లాస్ అాపార్ట్‌మెంట్ వద్ద పోలీసులు శ‌నివారం అర్ధరాత్రి త‌నిఖీలు నిర్వ‌హిస్తున్నారు. ఈ సమయంలో బొలెరా వాహనంలో అక్ర‌మంగా త‌ర‌లిస్తున్న‌ జింక మాంసం పట్టుబడింది. దీంతో ఆ వాహనం, వారి వద్ద నుంచి ఐదు రైఫిల్స్‌ను స్వాధీనం చేసుకున్న పోలీసులు.. మ‌హ‌మ్మ‌ద్ స‌లీం, మ‌హ‌మ్మ‌ద్ ఇక్బాల్‌ అనే ఇద్దర్ని అరెస్ట్ చేశారు. వారు ఇచ్చిన సమాచారం ఆధారంగా ఈ దందాను డాక్టర్ మూసా అనే వ్యక్తి నడుపుతోన్నట్టు వెల్లడయ్యింది. షూటింగ్ పేరుతో తుపాకీ లైసెన్స్ తీసుకున్న మూసా.. దాని సాయంతో జింకలు వేటాడుతున్నట్టు తేలింది. మెదక్ సమీపంలోని అడవుల్లో జింకలను వేటాడి మాంసం, కొమ్ములను హైదరాబాద్‌కు తరలిస్తున్నట్టు గుర్తించారు.

వన్యప్రాణి రక్షణ చట్టం, 1972 ప్రకారం నిందితులపై కేసు నమోదుచేశారు. వన్యప్రాణి సంరక్షణ చట్టం ప్రకారం.. అడవి జంతువులను వేటాడటం శిక్షార్హం. ఇలా ఎవరైనా చేస్తే జైలు శిక్షతో పాటు జరిమానా తప్పదు. దీనిపై సౌత్‌ వెస్ట్ జోన్ డీసీపీ చంద్రమోహన్ మాట్లాడుతూ... వన్యప్రాణి సంరక్షణలో ప్రజలు సహకరించాలని విజ్ఞప్తి చేశారు. స్వాధీనం చేసుకున్న జింక మాంసం, కొమ్ములను అటవీ శాఖ అధికారులకు పోలీసులు అప్పగించారు. హైదరాబాద్ నగరంలో ఇంత పెద్ద మొత్తంలో జింక మాంసం స్వాధీనం చేసుకోవడం ఇదే మొదటిసారి.

కాగా, జులైలోనూ టోలీచౌక్ సమీపంలోనే జింక మాంసంతో ఇద్దరు వ్యక్తులు పట్టుబడ్డారు. మహమ్మద్ సిరాజ్, మహమ్మద్ వసీమ్ అనే ఇద్దరు వ్యక్తులు జింక మాసం, తల, చర్మం, కొమ్ములు తీసుకొస్తుండగా పోలీసులకు చిక్కారు. విచారణలో తాము చార్మినార్ చౌక్ వద్ద గుర్తుతెలియని వ్యక్తి నుంచి వీటిని కొనుగోలుచేసి ఇంటికి తీసుకెళ్తున్నట్టు తెలిపారు. దీనికి ముందు మే నెలలో మహారాష్ట్ర నుంచి జింక మాంసం తెప్పించుకున్న ముగ్గుర్ని ఫారెస్ట్ అధికారులు, నగర టాస్క్‌ఫోర్స్‌ పోలీసులు సంయుక్తగా అరెస్టు చేశారు.

టోలిచౌకికి చెందిన హసన్‌ బక్రాన్‌ వద్ద జింక మాంసం ఉందనే సమాచారంతో దాడి చేసి పట్టుకున్నారు. నిజామాబాద్‌‌కు చెందిన హమీద్‌ బిన్‌ హకాని అనే స్నేహితుడు ఈ మాంసాన్నిచ్చినట్లు అతడు వెల్లడించాడు. ఇందులో కొంత మరో స్నేహితుడు షేక్‌ అబ్దుల్‌ రహ్మాన్‌ బడయ్య అల్‌ అమూదికి ఇవ్వడంతో ముగ్గురినీ అదుపులోకి తీసుకున్నారు.