రేపు ఈ జిల్లాల్లో పిడుగులతో భారీ వానలు.. జాగ్రత్తగా ఉండండి

ఏపీవాసులకు అలర్ట్.. రాష్ట్రంపై ద్రోణి ప్రభావం కొనసాగుతోంది. ఈ నేపథ్యంలో వచ్చే రెండు రోజులు రాష్ట్రంలోని ఒకట్రెండు చోట్ల భారీ వర్షాలు కురిసే అవకాశం ఉంది. అలాగే మరికొన్ని ప్రాంతాల్లో మోస్తరు నుంచి భారీ వర్షాలు కురుస్తాయని ఏపీ విపత్తుల నిర్వహణ సంస్థ తెలిపింది. ద్రోణి ప్రభావంతో రానున్న రెండు రోజులు రాయలసీమలో ఒకటి, రెండు చోట్ల పిడుగులతో కూడిన భారీ వర్షాలు కురిసే అవకాశం ఉందని ఏపీ విపత్తుల నిర్వహణ సంస్థ మేనేజింగ్ డైరెక్టర్ ప్రఖర్ జైన్ తెలిపారు. మరోవైపు ఉరుములతో కూడిన వర్షాలు పడే సమయంలో చెట్ల కింద ఉండొద్దని సూచించారు.

మరోవైపు ద్రోణి ప్రభావంతో గురువారం రోజు డాక్టర్ బీఆర్ అంబేద్కర్ కోనసీమ జిల్లా , తూర్పుగోదావరి, పశ్చిమ గోదావరి, ఏలూరు, కృష్ణా, గుంటూరు, బాపట్ల, ప్రకాశం, నెల్లూరు, చిత్తూరు, తిరుపతి జిల్లాల్లోని కొన్నిప్రాంతాల్లో పిడుగులతో కూడిన మోస్తరు నుంచి భారీ వర్షాలు కురిసేందుకు అవకాశం ఉందని ఏపీ విపత్తుల నిర్వహణ సంస్థ తెలిపింది. మిగతా జిల్లాల్లో అక్కడక్కడ తేలికపాటి నుంచి మోస్తరు వర్షాలు కురిసే అవకాశం ఉందని వెల్లడించింది.

మరోవైపుబుధవారం సాయంత్రం ఐదు గంటల వరకూ అత్యధికంగా ప్రకాశం జిల్లా ఒంగోలులో 64.5 మిమీ వర్షపాతం నమోదైంది. కె.ఉప్పలపాడులో 53.5మిమీ, వేములపాడు 47మిమీ, చిలకపాడులో 45మిమీ వర్షం కురిసిందని ఏపీ విపత్తుల నిర్వహణ సంస్థ తెలిపింది. విజయనగరం జిల్లా రాజాంలో 40.2మిమీ, కాకినాడలో 39మిమీ వర్షపాతం నమోదైనట్లు ఏపీ విపత్తుల నిర్వహణ సంస్థ వెల్లడించింది.

మరోవైపు మొబైల్ సిగ్నల్స్ లేకున్నా కూడా వాతావరణ హెచ్చరికలు పంపే వ్యవస్థను ఏపీలో ఏర్పాటు చేయనున్నారు. ఎవేర్‌ ద్వారా ఆర్టీజీఎస్‌ ఆధ్వర్యంలో వాతావరణ హెచ్చరికలు చేసే విధానం తేనున్నారు. ఈ విధానాన్ని తొలుత ప్రయోగాత్మకంగా ప్రతి జిల్లాలోని ఓ గ్రామం చొప్పున.. 26 గ్రామాల్లో ఏర్పాటు చేశారు. ఈ విధానం ప్రకారం ఏదైనా ప్రమాదకర పరిస్థితులు వస్తే.. వెంటనే గ్రామంలో ఏర్పాటుచేసిన సైరన్‌ సాయంతో ప్రజలకు ఆ విషయం వినిపించి, ప్రజలను అప్రమత్తం చేస్తారు. ఎవేర్‌ ద్వారా 42 అంశాల్లో ఈ రకమైన హెచ్చరికలు ఇస్తారు. వరదలు, భారీ వర్షాలు, పిడుగులు, ఈదురుగాలులు, వడగాలుల వంటి విషయాల్లో ప్రజలను ఎప్పటికప్పుడు అప్రమత్తం చేసేందుకు ఈ విధానం తీసుకురానున్నారు. అయితే వర్షాల కారణంగా మొబైల్‌ సిగ్నల్స్‌ పనిచేయకున్నా.. ఇస్రో శాటిలైట్ సాయంతో ఇవి పనిచేస్తాయి.