మ్యాచ్ ఆడతాం.. ప్రారంభ సమయాన్ని గంటసేపు పొడిగించండి..! ఏసీసీని కోరిన పాకిస్థాన్‌

ఆసియాకప్‌ 2025లో పాకిస్థాన్‌-యూఏఈ మ్యాచ్‌కు ముందు దుబాయ్‌లో నాటకీయ పరిణామాలు చోటు చేసుకుంటున్నాయి. భారత్‌ చేతిలో చిత్తుగా ఓడిపోయిన తర్వాత చెలరేగిన షేక్ హ్యాండ్ వివాదంపై పాకిస్థాన్ క్రికెట్ బోర్డు .. మ్యాచ్ రిఫరీ ఆండీ పైక్రాఫ్ట్‌కు ఫిర్యాదు చేసింది. కానీ ఆయన సరిగా స్పందించలేదని.. పీసీబీ .. ఐసీసీకి ఫిర్యాదు చేసింది. ఈ ఫిర్యాదును ఐసీసీ తిరస్కరించింది. ఆ తర్వాత రెండోసారి పాకిస్థాన్.. ఐసీసీకి మెయిల్ చేసింది. రిఫరీని పాక్, యూఏఈ మ్యాచ్ నుంచి తొలగించాలని డిమాండ్ చేసింది. లేని పక్షంలో మ్యాచ్‌ ఆడబోమని స్పష్టం చేసింది. కానీ ఐసీసీ రెండోసారి కూడా పీసీబీ అభ్యర్థనను తిరస్కరించింది.

ఐసీసీ చర్యలను పాకిస్థాన్ క్రికెట్ బోర్డు అవమానంగా భావించింది. దీంతో యూఏఈతో మ్యాచ్‌ ఆడబోమని భీష్మించుకుని కూర్చుంది. షెడ్యూల్ ప్రకారం పాక్, యూఏఈ మ్యాచ్ దుబాయ్ వేదికగా రాత్రి 8 గంటలకు ప్రారంభం కావాల్సింది. ఈ నేపథ్యంలో ఆరు గంటలకే.. యూఏఈ ఆటగాళ్లు స్టేడియానికి బయలుదేరారు. కానీ పాకిస్థాన్ క్రికెట్ బోర్డు మాత్రం తమ ఆటగాళ్లంతా హోటల్‌లోనే ఉండాలని ఆదేశించింది. ఈ మ్యాచ్‌ను పాకిస్థాన్ క్రికెట్ బోర్డు బహిష్కరించిందని ఆ దేశ మీడియాలో వార్తలు సైతం వచ్చాయి. దీంతో సుమారు రాత్రి 7 గంటల వరకు కూడా వారంతా హోటల్‌లోనే ఉన్నారు. ఫలితంగా మ్యాచ్ జరుగుతుందా? లేదా అనే ప్రశ్నలు తలెత్తాయి.

కానీ దుబాయ్‌లో ప్రస్తుతం కీలక భేటీ జరుగుతోంది. పాకిస్థాన్ ఆటగాళ్లంతా స్టేడియానికి వెళ్లాలని ఇందులో కోరినట్లు తెలుస్తోంది. కానీ మొండిపట్టు పట్టిన పాక్.. హోటల్‌లోనే ఉండాలని తమ ఆటగాళ్లకు చెప్పింది. అయితే తాజాగా ఆ జట్టు కాస్త వెనక్కి తగ్గినట్లు తెలుస్తోంది. మ్యాచ్ ప్రారంభ సమయా్ని గంట సేపు పొడిగించాలని పాకిస్థాన్ క్రికెట్ బోర్డు.. ఆసియాకప్ నిర్వహకులను కోరినట్లు తెలుస్తోంది. ప్రస్తుతం పాకిస్థాన్ ఆటగాళ్లు సైతం హోటల్‌ను వీడి స్టేడియానికి బయలుదేరినట్లు సమాచారం. బుధవారం సాయంత్రమే ఆటగాళ్ల కిట్‌లు స్టేడియానికి చేరాయి.

ప్రస్తుతం చర్చలు ఇంకా జరుగుతున్నాయి. కానీ అవి సానుకూలంగానే ముగిసే అవకాశం ఉందని తెలుస్తోంది. దీనిపై అధికారిక ప్రకటన రావాల్సి ఉంది. పీసీబీ అభ్యర్థనను ఆసియాకప్ నిర్వహకులు అంగీకరిస్తే.. మ్యాచ్ గంట ఆలస్యంగా అంటే రాత్రి 9 గంటలకు ప్రారంభం కానుంది.