ఫుల్ ఫిట్‌నెస్‌తో ఉన్న సర్ఫరాజ్ ఖాన్,,,షర్ట్ తీసేసి నెట్టింట ఫొటోలు పోస్ట్

క్రికెట్‌కు నువ్వు ఫిట్ కాదు అన్నవాళ్లకి సర్ఫరాజ్ ఖాన్ తన ట్రాన్స్‌ఫర్మేషన్‌తో షాక్ ఇచ్చాడు. భారీగా బరువు తగ్గిన సర్ఫరాజ్ తాజాగా తన టాప్‌లెస్ ఫొటోలతో అందర్నీ అవాక్కయ్యేలా చేశాడు. టీమిండియా యువ బ్యాటర్ సర్ఫరాజ్ ఖాన్ ఇప్పుడు సోషల్ మీడియాలో ఓ సంచలనంగా మారాడు. వెస్టిండీస్ సిరీస్ ముందు ప్రాక్టీస్‌లో బిజీగా ఉన్న ఈ యువ ఆటగాడు, తన బాడీ ట్రాన్స్‌ఫర్మేషన్‌ను చూపించేందుకు టాప్‌లెస్ ఫోటోని ఇన్‌స్టాగ్రామ్‌లో పోస్ట్ చేశాడు. ఒక్కసారిగా ఆ ఫోటో వైరల్ అయ్యి అభిమానులను ఆశ్చర్యానికి గురి చేసింది.

న్యూజిలాండ్‌ టెస్టు సిరీస్‌తో టీమిండియాలో అడుగుపెట్టిన సర్ఫరాజ్ ఖాన్.. ఆ వెంటనే ఆస్ట్రేలియా బోర్డర్ - గావస్కర్ ట్రోఫీలోనూ అవకాశం పొందాడు. అయితే పెద్దగా అవకాశం రాలేదు. ఆ తర్వాత ఇంగ్లండ్ టూర్‌లో ఛాన్స్ దక్కలేదు. తన ఫిట్‌నెస్ కారణంగానే జట్టులోకి తీసుకోలేదని తెలుసుకున్న సర్ఫరాజ్ ఖాన్ ఒకటిన్నర నెలలోనే ఏకంగా 17 కిలోల బరువు తగ్గి బీసీసీఐకి తాను ఫిట్‌గా ఉన్నానంటూ మెసెజ్ పంపాడు.

ప్రస్తుతం బెంగళూరులోని నేషనల్ క్రికెట్ అకాడమీలో ఉన్న సర్ఫరాజ్ ఖాన్ ఫుల్ వర్కవుట్స్‌తో బిజీ అయ్యాడు. కేవలం ఫిట్‌నెస్ మాత్రమే కాకుండా బ్యాటింగ్‌లో కూడా ఫుల్ ఫామ్‌లో ఉన్నాడు. చెన్నైలో జరుగుతున్న బుచ్చి బాబు టోర్నమెంట్లో హర్యానాపై 109 బంతుల్లో అజేయంగా 109 పరుగులు సాధించాడు. 84/4కు పడిపోయిన ముంబై ఇన్నింగ్స్‌ను హార్దిక్ తామోరేతో కలిసి 117 పరుగుల భాగస్వామ్యంతో నిలబెట్టాడు. ఆ ఇన్నింగ్స్‌లో తొమ్మిది ఫోర్లు, ఐదు సిక్స్‌లు ఉన్నాయి. అంతకుముందు 138 పరుగులతో అద్భుత శతకంతో రాణించాడు.

దేశీయ క్రికెట్‌లో చూపిస్తున్న ప్రతిభ, ఫిట్‌నెస్‌లోని మార్పు.. ఇవన్నీ కలిపి సర్ఫరాజ్‌కు రాబోయే వెస్టిండీస్ టెస్ట్ సిరీస్‌లో అవకాశాలు తెచ్చిపెట్టే అవకాశం ఉందని బోర్డు వర్గాలు చెబుతున్నాయి. మరోవైపు, టీమిండియా కెప్టెన్ రోహిత్ శర్మ కూడా తన సిద్ధతలో మునిగిపోయాడు. ఆస్ట్రేలియాలో అక్టోబర్ 19న ప్రారంభమయ్యే మూడు వన్డేల సిరీస్‌లో భారత జట్టును నడిపించేందుకు సిద్ధమవుతున్నాడు. ఇటీవల బరువు తగ్గిన హిట్‌మ్యాన్‌తో సర్ఫరాజ్ కలిసి ప్రాక్టీస్‌లో పాల్గొన్న ఫొటోలు కూడా సోషల్ మీడియాలో వైరల్ అయ్యాయి.