వారం వారం క్రెడిట్ స్కోర్ అప్డేట్.. ఆర్బీఐ కొత్త ఆలోచన

బ్యాంకులో లోన్ తీసుకోవాలంటే ముందుగే అడిగే ప్రశ్న మీ సిబిల్ స్కోర్ ఎంత? మంచి స్కోర్ ఉంటేనే లోన్ ఇచ్చేందుకు మొగ్గు చూపుతారు. అందుకే సిబిల్ స్కోరు చాలా ముఖ్యమని చెబుతారు. క్రెడిట్ స్కోర్ ఆధారంగానే రుణాలు ఇవ్వాలా వద్దా అనే నిర్ణయం తీసుకుంటారు. ప్రస్తుతం సిబిల్ స్కోరు అప్డేట్ అయ్యేందుకు నెల రోజుల సమయం పడుతోంది. రుణాల పేమెంట్లు సకాలంలో చేసినప్పటికీ కొందరి స్కోరు అప్డేట్ కావడం లేదు. నెల రోజుల పాటు వేచి చూడాల్సి వస్తుంది. దీంతో లోన్ పొందడంలో ఇబ్బందులు ఏర్పడుతున్నాయి. దీంతో రిజర్వ్ బ్యాంక్ ఆఫ్ ఇండియా (ఆర్బీఐ) ఈ రూల్ మార్చాలనే ఆలోచన చేస్తున్నట్లు పలు మీడియా సంస్థలు పేర్కొన్నాయి. ఇకపై సిబిల్ స్కోరు వారం వారం అప్డేట్ చేసేలా నిబంధనలు మార్చనుందని తెలుస్తోంది.

బ్యాంకులు లోన్ తీసుకున్న వారి డేటాను సిబిల్ వంటి క్రెడిట్ బ్యూరోలకు నెల నెల కాకుండా వారం వారం డేటాను పంపేలా చర్యలు తీసుకోవాలని ఆర్‌బీఐ ఆలోచిస్తోంది. ప్రస్తుతం బ్యాంకులు, నాన్ బ్యాంకింగ్ ఫైనాన్షియల్ సంస్థలు తమ కస్టమర్ల లోన్ చెల్లింపులు లేదా క్రెడిట్ కార్డ్ బిల్లుల సమాచారాన్ని నెలకోసారి పంపుతాయి. దీంతో లోన్ లేదా బిల్లు చెల్లించినా సిబిల్ స్కోర్‌ అప్డేట్ అయ్యేందుకు నెల రోజుల వరకు వేచి చూడాల్సి వస్తుంది. ఏదైనా పొరపాటు దొర్లితే ఇక అంతే సంగతి. దానిని మార్చేందుకు చాలా ఇబ్బందులు పడాల్సి వచ్చేది. ఇకపై ఆ చిక్కలు ఉండవని ఆర్‌బీఐ వర్గాలు చెబుతున్నాయి.

కొత్త నిబంధనలు అమలులోకి వస్తే సిబిల్ స్కోర్ వేగంగా అప్‌డేట్ అవుతుంది. వారం వారం మారుతుంది. దీంతో కస్టమర్లు వేగంగా లోన్స్ పొందేందుకు అవకాశాలు పెరుగుతాయి. బ్యాంకులు కొత్త లోన్లు ఇచ్చేందుకు కొత్త స్కోర్ చూస్తాయి. సకాలంలో చెల్లింపులు చేసిన వివరాలు క్రెడిట్ స్కోరులో వేగంగా కన్పిస్తాయి. క్రెడిట్ రిపోర్టులో తప్పులు ఉంటే వెంటనే సరి చేసుకునే అవకాశం లభిస్తుంది.

సిబిల్ స్కోరు ఎంత ఉండాలి?

సిబిల్ స్కోరు జనరల్‌గా 300 నుంచి 900 మధ్య ఉంటుంది. అయితే 750 అంతకంటే ఎక్కువగా ఉంటే మెరిగైనదిగా చెబుతారు. వీరికి వేగంగా లోన్లు ఇచ్చేందుకు బ్యాంకులు మొగ్గు చూపుతాయి. వడ్డీ రేట్లు సైతం తగ్గిస్తాయి. ఈ స్కోరు తక్కువగా ఉన్నవారికి బ్యాంకులు లోన్లు ఇవ్వవు. ఒకవేళ ఇచ్చినా వడ్డీ ఎక్కువగా వసూలు చేస్తాయి. దీంతో వడ్డీ భారం పెరిగి ఎక్కువ ఈఎంఐ కట్టాల్సి వస్తుంది. సిబిల్ స్కోర్ రిపోర్టులో రుణ చరిత్ర ఉంటుంది. ఎన్ని లోన్లు తీసుకున్నారు, ఎన్ని క్రెడిట్ కార్డులు ఉన్నాయి. రీపేమెంట్లు టైంకి చేశారా? అనే వివరాలు ఉంటాయి.