మెట్రో రైల్ ప్రాజెక్టులో అప్ డేట్.. మరోసారి పొడిగింపు

విజయవాడ మెట్రో రైల్ ప్రాజెక్టుకు సంబంధించి మరో అప్ డేట్ వచ్చింది. విజయవాడ మెట్రో రైల్ ప్రాజెక్టు టెండర్ల గడువును ఏపీ ప్రభుత్వం మరోసారి పొడిగించింది. టెండర్ల గడువును మరో పది రోజుల పాటు పొడిగిస్తూ ఆంధ్రప్రదేశ్ మెట్రో రైల్ కార్పొరేషన్ నిర్ణయం తీసుకుంది. కాంట్రాక్టు సంస్థల విజ్ఞప్తితో ఏపీ మెట్రో రైల్ కార్పొరేషన్ ఈ నిర్ణయం తీసుకుంది. దీంతో విజయవాడ మెట్రో రైల్ ప్రాజెక్టు టెండర్ల ప్రక్రియలో పాల్గొనే కంపెనీలకు ఉపశమనం కలిగింది. విజయవాడ మెట్రో రైల్ ప్రాజెక్టు టెండర్ల దాఖలు గడువును పొడిగించడం ఇది రెండోసారి. గతంలో అక్టోబరు 14 వరకు పొడిగించారు. ఇవాళ్టితో గడువు పూర్తి కానుండటంతో గడువు పొడిగించాలని పలు సంస్థలు ఏపీ మెట్రో రైల్ కార్పొరేషన్‌ను కోరినట్లు తెలిసింది.

ఈ నేపథ్యంలో కాంట్రాక్టు సంస్థల అభ్యర్థనతో విజయవాడ మెట్రో రైల్ ప్రాజెక్టు టెండర్ల గడువును మరో పది రోజులు పొడిగిస్తూ ఏపీ మెట్రో రైల్ కార్పొరేషన్ నిర్ణయం తీసుకుంది. అక్టోబర్ 24వ తేదీ వరకూ టెండర్లు దాఖలు చేసేందుకు అవకాశం కల్పించారు. విజయవాడతో పాటుగా విశాఖపట్నం మెట్రో రైల్ ప్రాజెక్టుల నిర్మాణం కోసం టెండర్లు ఆహ్వానించారు. విజయవాడ మెట్రో రైల్ ప్రాజెక్టు తొలిదశలో 38 కిలోమీటర్ల మేరకు నిర్మాణం కోసం టెండర్లు పిలిచారు. విజయవాడ మెట్రో రైల్ ప్రాజెక్టు మొదటి దశలో 1ఏ కింద గన్నవరం నుంచి పండిట్‌ నెహ్రూ బస్టాండ్‌ వరకూ ఓ కారిడార్ నిర్మించనున్నారు. అలాగే 1బీ కింద పండిట్‌ నెహ్రూ బస్టాండ్‌ నుంచి పెనమలూరు వరకూ మరో మెట్రో కారిడార్ నిర్మాణం జరగనుంది.

విజయవాడ మెట్రో రైల్ ప్రాజెక్టు ఫేజ్ 1 కింద 38.40 కి.మీ. మేర మెట్రో నిర్మాణానికి రూ.11,009 కోట్లు ఖర్చవుతుందని ప్రాథమికంగా అంచనా వేశారు. భూసేకరణ కోసం రూ.1,152 కోట్లు ఖర్చు చేయనున్నారు. ఈ మొత్తాన్ని ఏపీ ప్రభుత్వమే భరించనుంది. ఇక విజయవాడ మెట్రో రైల్ ప్రాజెక్టు రెండో దశలో పండిట్‌ నెహ్రూ బస్టాండ్‌ నుంచి అమరావతి వరకూ 27.75 కి.మీ. మేరకు మెట్రో నిర్మాణం చేపట్టనున్నారు. మరోవైపు విజయవాడ, విశాఖపట్నం మెట్రో రైల్ ప్రాజెక్టుల ఫేజ్ 1 పనులను మూడేళ్లలో పూర్తిచేయాలని ఆంధ్రప్రదేశ్ ప్రభుత్వం లక్ష్యంగా పెట్టుకుంది. విజయవాడ మెట్రో రైల్ ప్రాజెక్టు కోసం సీఆర్డీఏ నుంచి రూ. 3,497 కోట్లు నిధులు ఏర్పాటు చేయనుంది. అలాగే ప్రపంచబ్యాంక్, ఆసియా డెవలప్‌మెంట్ బ్యాంక్, జైకా వంటి విదేశీ బ్యాంకుల నుంచి రుణాలను కూడా సమీకరించనున్నారు.