పోస్టాఫీస్ కొత్త యాప్.. అన్ని సేవలు ఫోన్లోనే పొందొచ్చు

భారతీయ తపాలా శాఖకు కోట్లాది మంది కస్టమర్లు ఉన్నారు. నిత్యం లక్షల మందికి వివిధ రకాల సేవలు అందిస్తోంది. వారందరికీ అదిరే శుభవార్త అని చెప్పాలి. ఎందుకంటే పోస్టల్ సేవలు మరింత చేరువయ్యాయి. ఇందుకోసం తపాలా శాఖ కొత్త యాప్ తీసుకొచ్చింది. తమ సేవలను మరింత వేగంగా, సులభంగా అందించేందుకు యాప్ లాంచ్ చేసింది. పోస్టాఫీసులో లభించే సేవలన్నింటినీ మీ మొబైల్ ఫోన్‌లోనే వినియోగించుకునేలా డాక్ సేవా యాప్ పేరుతో కొత్త యాప్ విడుదల చేసింది. ఈ మొబైల్ అప్లికేషన్ ద్వారా ఎక్కడి నుంచైనా పోస్టల్ సేవలు పొందవచ్చు. ఇక పోస్టాఫీసు మీ జేబులోనే అంటూ తపాలా శాఖ అధికారిక ఎక్స్ అకౌంట్లో పోస్ట్ చేసింది.

పోస్టల్ విభాగం అందించే యుటిలిటీ సేవలన్నింటినీ ఈ యాప్ ద్వారా అందుబాటులో ఉంటాయని తపాలా శాఖ తెలిపింది. పార్సిల్ ట్రాకింగ్, పోస్టేజ్ కాలిక్యులేషన్, ఇన్సూరెన్స్ ప్రీమియం పేమెంట్, కంప్లయింట్ రిజిస్ట్రేషన్ వంటి సేవలన్నీ పొందొచ్చు. స్పీడ్ పోస్ట్, మనీ ఆర్డర్ వంటివి రియల్ టైమ్‌లో స్టేటస్ ట్రాక్ చేయవచ్చు. దేశీయ, అంతర్జాతీయ పార్శిల్ సర్వీసులకు ఎంతెంత ఛార్జీలు ఉన్నాయో లెక్కించుకోవచ్చు. రిజిస్టర్డ్ పోస్ట్, స్పీడ్ పోస్ట్, పార్సిల్ బుకింగ్ వంటి సేవలను యాప్ ద్వారానే పొందొచ్చు. దీంతో గంటల తరబడి క్యూ లైన్లలో నిలబడాల్సిన పని లేకుండా పోతుంది. జీపీఎస్ ఆధారంగా సమీపంలోని పోస్టీఫీసు వివరాలు పొందొచ్చు. ఇక కార్పొరేట్ కస్టమర్ల కోసం ప్రత్యేకంగా రూపొందించిన విభాగం ఈ యాప్‌లో ఉన్నట్లు తపాలా శాఖ తెలిపింది.

పోస్టల్ విభాగం లాంచ్ చేసిన డాక్ సేవల్ యాప్ డౌన్‌లోడ్ చేసుకోవడం చాలా ఈజీ. ఆడ్రాయిడ్ యూజర్లు గూగుల్ ప్లే స్టోర్ నుంచి యాపిల్ ఫోన్ యూజర్లు యాపిల్ యాప్ స్టోర్ నుంచి డౌన్‌లోడ్ చేసుకోవచ్చు. డాక్ సేవల్ యాప్ అని టైప్ చేసి అక్కడ డిపార్ట్‌మెంట్ ఆఫ్ పోస్ట్స్, గవర్నమెంట్ ఆఫ్ ఇండియా పేరుతో ఉన్న అధికారిక యాప్ ఇన్‌స్టాల్ చేసుకోవాల్సి ఉంటుంది. యాప్ ఓపెన్ చేసిన తర్వాత మీ మొబైల్ నంబర్ లేదా ఈ-మెయిల్ ఐడీ ఎంటర్ చేసి రిజిస్టర్ కావాల్సి ఉంటుంది. ఓటీపీ ద్వారా లాగిన్ అయ్యి 8కి పైగా వివిధ రకాల సేవలను వినియోగించుకోవచ్చు. మరిన్ని వివరాలు, యూజర్ సపోర్ట్, పాలసీ అప్డేట్ల కోసం పోస్టల్ విభాగం అధికారిక వెబ్‌సైట్ ను సందర్శించవచ్చు.