జమ్మూ కాశ్మీర్‌లోకి చొరబడిన ఉగ్రవాదులు.. ఆపరేషన్ ఛత్రు చేపట్టిన భారత సైన్యం

జమ్మూ కాశ్మీర్‌లో మళ్లీ ఉగ్రవాద కదలికలు తీవ్ర అలజడి సృష్టించాయి. కిష్త్‌వార్ జిల్లాలో బుధవారం ఉదయం భద్రతా బలగాలు, ఉగ్రవాదుల మధ్య భారీ ఎన్‌కౌంటర్ జరిగింది. కిష్త్‌వార్‌లోని ఛత్రు అనే మారుమూల ప్రాంతంలో ఇంటెలిజెన్స్ ఆధారిత ఆపరేషన్‌ను ప్రారంభించిన భారత సైన్యం .. అక్కడ నక్కి ఉన్న ఉగ్రవాదులను చుట్టుముట్టడంతో ఈ ఎదురు కాల్పులు మొదలయ్యాయి. దీనిపై వైట్ నైట్ కార్ప్స్ ప్రకటన చేసింది. భారత సైన్యంలోని వైట్ నైట్ కార్ప్స్ ఎక్స్‌ ద్వారా ఈ విషయాన్ని వెల్లడించింది.

ఇంటెలిజెన్స్ వర్గాలు ఇచ్చి పక్కా సమాచారంతో రంగంలోకి దిగిన వైట్ నైట్ కార్ప్స్ బలగాలు.. జమ్మూ కాశ్మీర్ పోలీసుల సహకారంతో ఓ భారీ ఆపరేషన్‌ను చేపట్టాయి. వైట్ నైట్ కార్ప్స్ బలగాలు తెల్లవారుజామున ఛత్రు ప్రాంతంలో ఈ ఆపరేషన్ ఛత్రు చేపట్టినట్లు ఒక అధికారిక ప్రకటనలో తెలిపింది. ఇక ఉగ్రవాదులు, భద్రతా బలగాల మధ్య కాల్పులు జరిగినట్లు ఇండియన్ ఆర్మీ పేర్కొంది.

విశ్వసనీయ వర్గాలు వెల్లడించిన వివరాల ప్రకారం.. ఈ ప్రాంతంలో 2, 3 మంది ఉగ్రవాదులు దాక్కుని ఉన్నట్లు భావిస్తున్నారు. ఈ టీమ్ గత కొన్ని నెలలుగా ఆ ప్రాంతంలో చురుకుగా ఉందని.. అందుకే భద్రతా బలగాలు వారి కదలికలను నిశితంగా గమనిస్తున్నాయని తెలుస్తోంది. కిష్త్‌వార్ జిల్లాలోని ఎత్తైన ప్రాంతాల్లో ఉన్న ఛత్రు ప్రాంతంలో గత ఏడాది కాలంగా అడపాదడపా మిలిటెంట్ కార్యకలాపాలు జరుగుతున్నాయి. దీంతో గత కొన్ని నెలలుగా భద్రతా బలగాలు ఈ ప్రాంతంలో ఉగ్రవాద వ్యతిరేక ఆపరేషన్లను ముమ్మరం చేశాయి.

మరోవైపు.. మంగళవారం జమ్మూ కాశ్మీర్ పోలీసులు జమ్మూ, కిష్త్‌వార్ జిల్లాల్లో ఇద్దరు నిందితులను పబ్లిక్ సేఫ్టీ యాక్ట్ కింద అదుపులోకి తీసుకున్నారు. ఇందులో జమ్మూ నివాసి అయిన తజిందర్ సింగ్ అలియాస్ హ్యాపీని పూంచ్ జిల్లా జైల్లో.. కిష్త్‌వార్‌కు చెందిన సలీమ్ జావేద్‌ను డ్రగ్స్ పెడ్లింగ్‌కు సంబంధించి కోట్ భల్వాల్ జైల్లో ఉంచారు. కిష్త్‌వార్‌లో ఆపరేషన్ ఛత్రు ఇంకా కొనసాగుతున్నందున.. ముగ్గురు ఉగ్రవాదులు ఉన్నారా మట్టుబెట్టారా అనే వివరాలు ఇంకా తెలియాల్సి ఉంది.