ఒకేచోట 4,00,000 'బంగారం' ఇటుకలు.. వాటిపైనే నడుస్తారు

విలువైన ఖనిజాల్లో బంగారం ఒకటి. ప్రపంచ వ్యాప్తంగా బంగారానికి భారీ డిమాండ్ ఉంటుంది. దీంతో వీలైనంత మేర కొంటుంటారు. అయితే, గుట్టల కొద్ది బంగారం కడ్డీలు ఉండడం చూసిన వారు చాలా తక్కువ. అది సినిమాల్లోనే సాధ్యమవుతుందని చెప్పవచ్చు. కానీ, నిజంగానే టన్నుల కొద్ది బంగారం కడ్డీలు, ఇటుకలు నిండిన ఓ చోటు ఉంది. ఎక్కడో కొండలు, గుహలు, దట్టమైన అడవుల్లో అనుకుంటే పొరపాటే. నిత్యం వందల మంది నడిచే ప్రాంతంలోనే. ఆ ప్రాంతం లండన్ మహానగరం నడిబొడ్డున ఉంది. థ్రెడ్ నీడిల్ స్ట్రీట్‌లో ఈ చోటు ఉంది. ప్రపంచంలో ఉన్న బంగారంలో ఐదో వంతు ఇక్కడే ఉందట. కడ్డీలు, ఇటుకల రూపంలో ఇక్కడ బంగారం గుట్టలు పేర్చారు.

థ్రెడ్ నీడిల్ స్ట్రీట్‌లో బంగారం ఇటుకలు, కడ్డీలపై నుంచే నిత్యం రయ్ రయ్ మంటూ కార్లూ, బస్సులూ దూసుకెళ్తుంటాయి. ఈ నగరం ప్రజలు ఈ బంగారం ఉన్న ప్రాంతం పై నుంచి అటూ ఇటూ తిరుగుతుంటారు. అయితే, గుట్టల కొద్ది బంగారం ఏంటీ దానిపై ప్రజలు తిరగడం ఏంటి అంతే విచిత్రంగా అనిపిస్తుంది కదా.. అవునండీ అది నిజమే. బ్యాంక్ ఆఫ్ ఇంగ్లాడ్ తన వద్ద ఉన్న బంగారాన్ని అంతే థ్రెడ్ నీడిల్ స్ట్రీట్‌లో భూగర్భంలో భద్రంగా దాచి పెట్టింది. భూమి లోపల నిర్మించిన ఈ వాల్ట్ ప్రపంచంలోని అత్యంత భద్రమైనవాటిల్లో ఒకటి. అమెరికాకు చెందిన రిజర్వ్ బ్యాంక్ తర్వాత అత్యధికంగా బంగారం నిల్వలు ఉన్న రెండో అతిపెద్ద వాల్ట్‌గా చెప్తారు.

బ్యాంక్ ఆఫ్ ఇంగ్లాండ్‌కు చెందిన ఈ వాల్ట్‌లో దాదాపు 4,00,000 బంగారం కడ్డీలు, ఇటుకలు ఉన్నాయట. ఒక్కో కడ్డీ లేదా ఇటుక బరువు దాదాపు 12.5 కిలోలుగా ఉంటుంది. మొత్తం బంగారం 5000 టన్నులు ఉంటదట. ఈ బంగారం విలువ సుమారు రూ.63 లక్షల కోట్లకు పైగా ఉంటుందని పలు నివేదికలు చెబుతున్నాయి. ఇంత బంగారం అక్కడ ఎందుకు పెట్టారు? ఆ బంగారం మొత్తం ఇంగ్లాండ్ బ్యాంకుదేనా? అనే సందేహం మీకు వచ్చే ఉంటుంది. అయితే, ఆ బంగారం నిధిలో దాదాపు 94 శాతం ప్రపంచంలోని 30కిపైగా దేశాల కేంద్ర బ్యాంకులకు చెందినదిగా చెబుతారు. కేవలం 6 శాతమే లండన్‌కు చెందిన బంగారం ఉందట.

సుదీర్ఘకాలంగా లండన్ ప్రపంచ బంగారు మార్కెట్‌గా కొనసాగుతోంది. రాజకీయ స్థిరత్వం కారణంగా అనేక దేశాలు తమకు చెందిన బంగారాన్ని లండన్ బ్యాంక్ వాల్ట్‌లోనే సురక్షితంగా దాస్తున్నాయి. ఈ బంగారు నిక్షేపాల రక్షణకు కఠినమైన భద్రతా చర్యలను అమలు చేస్తోంది. పెద్ద పెద్ద బాంబులను సైతం తట్టుకునేలా దీనిని నిర్మించారు. దృఢమైన ఇనుముతో తలుపులు నిర్మించారు. దొంగలు సైతం డ్రిల్ చేసి లోపలికి రాలేరు. చరిత్రలోనే ఒక్కసారి కూడా దొంగతనం జరగలేదటా.