చారిటీ ఫౌండేషన్‌లో రషీద్ ఖాన్ ఫొటో,,,రెండో పెళ్లి అంటూ నెట్టింట రూమర్స్

అఫ్ఘనిస్తాన్ స్టార్ క్రికెటర్ రషీద్ ఖాన్ రెండో పెళ్లి పుకార్లు సోషల్ మీడియాలో షికార్లు చేస్తున్నాయి. గంటల్లోనే ఆ వార్త బాగా వైరల్ కావడంతో తానే స్వయంగా క్లారిటీ ఇవ్వాల్సి వచ్చింది. ఇటీవల సోషల్ మీడియాలో అతని రెండో వివాహం జరిగిందని ప్రచారం చెలరేగగా, రషీద్ ఖాన్ దానిని అదృష్టకరమైన అపార్థంగా పేర్కొన్నాడు. ఒక ఫోటోతో మొదలైన ఈ ఊహాగానాలు నెట్టింట వైరల్ అయ్యాయి.

నెదర్లాండ్స్‌లో జరిగిన రషీద్ ఖాన్ చారిటీ ఫౌండేషన్ ప్రారంభోత్సవంలో తీసిన ఓ ఫొటోతో రూమర్స్ మొదలయ్యాయి. ఆ చిత్రంలో రషీద్ తన భార్యతో కలిసి ఉన్నాడు. కానీ నెటిజన్లు ఆ ఫొటోను వెడ్డింగ్ ఫోటోగా భావించి, కొత్త నికాహ్ జరిగిందని ప్రచారం మొదలుపెట్టారు. చాలా పోస్టులు రషీద్ ఖాన్ మళ్లీ పెళ్లి చేసుకున్నాడు అని శీర్షికలు పెట్టి వైరల్ అయ్యాయి. అసలు వాస్తవం ఏంటంటే ఆ ఫొటో రషీద్ ఖాన్ చారిటీ ఫౌండేషన్ ప్రారంభ కార్యక్రమం సమయంలో తీసిందే. ఈ కార్యక్రమం విద్య, ఆరోగ్య సేవలు, మంచినీరు వంటి సామాజిక సేవా కార్యక్రమాలకు నిధులు సమీకరించడానికే నిర్వహించింది. వివాహ వేడుక కోసం కాదు.

రషీద్ ఖాన్ తొలి వివాహం 2024 అక్టోబర్‌లో కాబూల్ ఇంపీరియల్ కాంటినెంటల్ హోటల్‌లో జరిగింది. అదే రోజు అతని ముగ్గురు సోదరులు కూడా వివాహం చేసుకున్నారు. ఇప్పుడు నెదర్లాండ్స్ ఫోటోపై మళ్లీ పుకార్లు వ్యాపించడంతో, రషీద్ స్వయంగా ఇన్‌స్టాగ్రామ్‌లో ఒక స్పష్టమైన వివరణ ఇచ్చాడు. 2025 ఆగస్టు 2న తాను జీవితంలో కొత్త అధ్యాయం ప్రారంభించి, నికాహ్ జరుపుకున్నానని తెలిపాడు. “ఆమె నా జీవిత భాగస్వామి, ప్రేమ, శాంతి, స్నేహం యొక్క ప్రతిరూపం. ఆమెనే నా భార్య,” అని రషీద్ స్పష్టం చేశాడు.

“నిజం చాలా సింపుల్. ఆమె నా భార్య, మేము కలిసి ఉన్నాం, దాచే అంశం ఏదీ లేదు. ఆ ఫొటోపై వచ్చిన ఊహాగానాలు దురదృష్టకరమైనవే” అని తెలిపారు. కొందరు ఈ వివాహాన్ని అతని రెండో పెళ్లిగా పేర్కొంటున్నప్పటికీ, రషీద్ చెప్పిన వివరాలు చూస్తే, ఈ ఫొటో కొత్త వివాహానికి సంబంధించినది కాదని స్పష్టమవుతోంది. అది అతని ఇప్పటికే ప్రకటించిన భార్యతో కలిసి హాజరైన ఓ పబ్లిక్ ఈవెంట్ ఫొటో మాత్రమే. రషీద్ ఖాన్ వివరణతో సోషల్ మీడియాలో నెలకొన్న అన్ని అపోహలకు ముగింపు లభించింది.