3 లక్షల స్కూటీలు రీకాల్.. బ్రేక్ పార్ట్‌లో సమస్య

ప్రముఖ టూ-వీలర్ తయారీ కంపెనీ యమహా మోటార్ ఇండియా కీలక ప్రకటన చేసింది. ఈ కంపెనీలో స్కూటర్లు కొన్నవారికి బిగ్ అలర్ట్ అని చెప్పాలి. ఎందుకంటే దేశవ్యాప్తంగా 3 లక్షల స్కూటర్లను రీకాల్ చేస్తున్నట్లు ప్రకటించింది. స్కూటర్ బ్రేక్ పార్ట్‌లో లోపం తలెత్తినట్లు గుర్తించామని, దానిని సరిదిద్దేందుకు ఆయా స్కూటర్లను వెనక్కి రప్పిస్తున్నట్లు కంపెనీ తెలిపింది. మరి మీరు కూడా ఈ యమహా కంపెనీకి చెందిన స్కూటర్ వాడుతుంటే కచ్చితంగా వివరాలు తెలుసుకోవాలి. మీ బండి బ్రేక్ పార్టులో సమస్య తలెత్తి ఇబ్బందులు పడతారు. మరి ఏ మోడల్ స్కూటర్లను రీకాల్ చేశారో తెలుసుకుందాం.

ఈ మోడల్ స్కూటర్లు రీకాల్

యమహా మోటార్ ఇండియాకు చెందిన రే జెజ్ ఆర్ 125 ఎఫ్ఐ హైబ్రిడ్, ఫ్యాసినో 125 ఎఫ్ఐ హైబ్రిడ్ మోడళ్లను రికాల్ చేసినట్లు కంపెనీ తెలిపింది. 2024, మే 2వ తేదీ నుంచి 2025 సెప్టెంబర్ మధ్య తయారైన ఈ 125 సీసీ మోడళ్లు ఇందులో ఉన్నాయి. ఆయా మోడళ్లకు చెందిన స్కూటర్లు 3,06,635 వాహనాలను స్వచ్ఛందంగా రీకాల్ చేసినట్లు యమహా మోటార్ ఇండియా ఓ ప్రకటనలో తెలిపింది.

సమస్య ఇదే..

125 సీసీ మోడళ్ స్కూటర్ల ముందు బ్రేక్ కాలిపర్ పని తీరు కొన్ని సందర్భాల్లో సరిగా ఉండడం లేదని గుర్తించినట్లు కంపెనీ తెలిపింది. ఈ సమస్యను పరిష్కరించేందుకే 3 లక్షల స్కూటర్లను వెనక్కి రప్పిస్తున్నట్లు వెల్లడించింది. అయితే, ఆయా స్కూటర్లు కొనుగోలు చేసిన వారు ఎలాంటి ఆందోళన చెందాల్సిన అవసరం లేదని, పూర్తి ఉచితంగానే ఫ్రంట్ బ్రేక్ పార్టును రీప్లేస్ చేసి ఇస్తామని కంపెనీ తెలిపింది. స్కూటర్లు కొనుగోలు చేసిన యజమానులకు వ్యక్తిగతంగానూ ఈ రీకాల్ సమాచారం అందిస్తున్నట్లు కంపెనీ తెలిపింది.

మెసేజ్ వచ్చిన వారితో పాటు మెసేజ్ అందని, నిర్దేశిత సమయంలో తయారైన స్కూటర్లు వినియోగిస్తున్న వారు రీకాల్ సమయంలో ఉచితంగా బ్రేక్ పార్ట్ మార్చుకోవాల్సిందిగా తెలిపింది. ఎక్కడికి వెళ్లి బ్రేక్ సమస్యను పరిష్కరించుకోవాలి, ఎక్కడ ఉచితంగా మారుస్తారు అనే సమాచారం వ్యక్తిగతంగా అందిస్తున్నట్లు తెలుస్తోంది. భారత్‌లో యమహా స్కూటర్లకు మంచి ఆదరణ ఉంది. లక్షల మంది ఈ వాహనాలను వినియోగిస్తున్నారు. అయితే, ఒక్కసారిగా 3 లక్షల స్కూటర్లను రీకాల్ చేయడంతో ఆందోళన చెందుతారు. కానీ, వచ్చిన సమస్యను కంపెనీ ఉచితంగా పరిష్కరిస్తోంది కాబట్టి ఆయా మోడళ్ల స్కూటర్లు వాడుతున్న వారు దీనిని వినియోగించుకోవడం మంచిది.