కడుపులో బిడ్డ ఉండగానే మళ్లీ గర్భందాల్చిన గర్భిణీ!

ఓ మహిళ గర్భం దాల్చిన కొద్ది రోజులకే రెండోసారి గర్భవతి అయ్యింది. అంటే ఆమె అప్పటికే ఒక బిడ్డను కడుపులో మోస్తుంటే మరో బిడ్డ గర్భంలో తయారవుతోంది. ఈ అరుదైన పరిస్థితిని వైద్య పరిభాషలో ‘డబుల్ ప్రెగ్నెన్సీ’ లేదా ‘సూపర్ఫెటేషన్’ అని అంటారు. ఇంగ్లాండ్‌లోని ట్రౌబ్రిడ్జ్‌లో నివశిస్తున్న రెబక్కా రోబెర్ట్స్ అనే 39 ఏళ్ల మహిళకు ఈ పరిస్థితి ఏర్పడింది. ఆలస్యంగా వెలుగుచూసిన ఈ ఘటన వివరాలు ఇలా ఉన్నాయి. టైమ్స్ ఆఫ్ ఇండియా కథనం మేరకు.. రెబక్కాకు ఇప్పటికే 14 ఏళ్ల కూతురు ఉంది. ఇటీవల ఆమె మళ్లీ గర్భం దాల్చింది. మూడు వారాల గర్భంతో ఉన్నప్పుడు ఆమె కడుపులో ఇంకో బిడ్డ పుడుతున్నట్లు తెలిసి ఆశ్చర్యపోయింది. అయితే, గతంలో చేయించుకున్న రెండు స్కాన్లలో ఒక బిడ్డ మాత్రమే పెరుగుతున్నట్లు వైద్యులు తెలిపారు. మూడు వారాల తర్వాత కవలలు అని ఎలా చెబుతున్నారని ఆశ్చర్యపోయింది.
ఈ సందర్భంగా ఆమె పలు పరీక్షలు చేయించుకుంది. ఆమె గర్భం దాల్చడం కోసం వాడిన మందుల వల్లే ఆమెకు ‘డబుల్ ప్రెగ్నెన్సీ’ వచ్చినట్లు వైద్యులు తెలిపారు. ఆమె తీసుకున్న మందుల ఫలితంగా ఆమె గర్భంతో ఉన్నప్పుడు మరో అండం విడుదలై ఉంటుదని, అందుకే ఆమె మళ్లీ గర్భం దాల్చిందని పేర్కొన్నారు. అయితే, ఇప్పటికీ వైద్య నిపుణులు ‘సూపర్ఫెటేషన్’కు కారణమయ్యే పరిస్థితుల గురించి పూర్తిగా అంచనా వేయలేకపోతున్నారు. రెబక్కా... 33 వారాల తర్వాత 2020, సెప్టెంబరు నెలలో కవల పిల్లలకు జన్మనిచ్చింది. వీరిలో మగ బిడ్డ 4lb 10oz బరువుండగా, ఆడ బిడ్డ 2lb 7oz బరువు ఉంది. దీంతో ఆడ బిడ్డను కొద్దిరోజులు హాస్పిటల్‌లో ఉంచారు. చిన్నారి పూర్తిగా ఆరోగ్యంతో కొలుకొనే వరకు సుమారు మూడు నెలలు వైద్యుల పర్యవేక్షణలో ఉంచారు. ఎట్టకేలకు డిసెంబరు 25న చిన్నారిని డిశ్చార్జ్ చేశారు.