బాబు కథ, స్క్రీన్ప్లే, దర్శకత్వంలోనే పవన్: సజ్జల
Andhra Pradesh Telugu | Suryaa Desk | Published : Tue, May 10, 2022, 01:05 PM
చంద్రబాబు కథ, స్క్రీన్ప్లే, దర్శకత్వంలోనే పవన్ కల్యాణ్ నట్టిస్తున్నారని వైసీపీ ప్రధాన కార్యదర్శి, ఏపీ ప్రభుత్వ ముఖ్య సలహాదారు సజ్జల రామకృష్ణారెడ్డి విమర్శించారు. ఏపీలో వచ్చే ఎన్నికల్లో రాజకీయ పార్టీల పొత్తుల దిశగా సాగుతున్న ప్రచారంపై ఆయన స్పందించారు. ఈ సందర్భంగా తాను త్యాగం చేసేందుకు సిద్ధమంటూ టీడీపీ అధినేత నారా చంద్రబాబునాయుడు చేసిన వ్యాఖ్యలను ప్రస్తావించిన సజ్జల...చంద్రబాబే త్యాగం అంటే జనసేన అధినేత పవన్ కల్యాణ్ను ముఖ్యమంత్రిని చేస్తారా అని ప్రశ్నించారు.
ఈ సందర్భంగా సజ్జల మాట్లాడుతూ ఒకరు త్యాగాలకు సిద్ధమంటారు.. మరొకరు తానే సీఎం అంటున్నారు..ఇంకొకరేమో తాము కలవమంటారని ఆయా పార్టీల నుంచి వచ్చిన కామెంట్లను ప్రస్తావించారు. ఎన్నికల సమయంలోనే పొత్తులు కరెక్ట్ కాదన్న సజ్జల... జనాలంటే ఆ పార్టీలకు చులకన అయిపోయారన్నారు.
చంద్రబాబు కథ, స్క్రీన్ప్లే, దర్శకత్వంలోనే పవన్ కల్యాణ్ నడుస్తున్నారని, పవన్ డైలాగులన్నీ చంద్రబాబు చెబుతున్నవేనని సజ్జల ఎద్దేవా చేశారు. చంద్రబాబు ఎన్ని జంప్లు చేశారో అందరికీ తెలుసని, చంద్రబాబు, పవన్ ఇప్పటికీ పొత్తులోనే ఉన్నారని ఆరోపించారు. పవన్ కల్యాణ్ వ్యూహం అంటున్నారని, అసలు వ్యూహం అంటే ఏమిటని సజ్జల ప్రశ్నించారు.
|
|