కేంద్ర పన్నులు, సుంకాలలో మా వాటాను పెంచండి

కేంద్ర పన్నులు, సుంకాలలో రాష్ట్ర వాటాను పెంచాలని నీతి ఆయోగ్ సమావేశంలో పలు రాష్ట్రాలు ముఖ్యమంత్రులు కేంద్రం ముందు డిమాండ్ పెట్టినట్లు తెలుస్తోంది. ప్రధాని నరేంద్ర మోదీ అధ్యక్షతన ఢిల్లీలోని రాష్ట్రపతి భవన్ కల్చరల్ సెంటర్‌లో నీతి అయోగ్  పాలక మండలి సమావేశం జరిగింది. ఈ మీటింగ్‌కి కేంద్ర మంత్రులు, లెఫ్టినెంట్ గవర్నర్లు, వివిధ రాష్ట్రాల ముఖ్యమంత్రులు పాల్గొన్నారు. అయితే ఈ సమావేశంలో పలు రాష్ట్రాల ముఖ్యమంత్రులు కేంద్రం ముందు కొన్ని డిమాండ్లు పెట్టినట్టు తెలుస్తుంది. ముఖ్యంగా రాష్ట్రాలకు కేంద్ర పన్నుల వాటా పెంచాలని పలు రాష్ట్రాల సీఎంలు డిమాండ్ చేశారు.

ఛత్తీస్‌గఢ్ సీఎం భూపేష్ బఘెల్ ఆదివారం కేంద్ర పన్నులు, సుంకాలలో రాష్ట్ర వాటాను పెంచాలని కేంద్రాన్ని కోరారు. దాని వనరులపై భారం పెరుగుతుందన్నారు. వస్తువులు, సేవల పన్ను (జీఎస్టీ) పరిహారం విషయంలో కొత్త పన్ను విధానం కారణంగా రాష్ట్రం ఆదాయ లోటును ఎదుర్కొంటోందని చెబుతూ.. జూన్ 2022 తర్వాత రాష్ట్రానికి చెల్లించిన పరిహారం కోసం ఐదేళ్ల పొడిగింపును కూడా కోరారు. అలాగే 20,000 కంటే తక్కువ జనాభా ఉన్న నగరాల సమీప గ్రామీణ ప్రాంతాల్లో కూడా గ్రామీణ ఉపాధి హమీ పథకాన్ని కేంద్రం అమలు చేయాలని కోరారు.

అదేవిధంగా ఒడిశా సీఎం నవీన్ పట్నాయక్ నీతి ఆయోగ్ అంబుడ్స్‌మన్ పాత్రను చేపట్టాలని, కేంద్ర పథకాల అమలులో రాష్ట్రాలు, కేంద్రం మధ్య వివాదాలను పరిష్కరించాలని కోరారు. టెలికాం, రైల్వే, బ్యాంకింగ్ వంటి కేంద్ర జాబితాలో ఉన్న అంశాల్లో ఒడిశా నిర్లక్ష్యం చేయబడిందని ఆయన అన్నారు. ఈ మేరకు ఒడిశాపై ప్రత్యేక దృష్టి పెట్టాలని కేంద్ర ప్రభుత్వాన్ని కోరారు. వీరితోపాటు మిగతా రాష్ట్రాల ముఖ్యమంత్రులు కూడా కొన్ని సమస్యలపై చర్చించినట్టు తెలుస్తుంది. కాగా 2019 తర్వాత నీతి అయోగ్ సమావేశం ప్రత్యక్షంగా జరగడం ఇదే మొదటిసారి. ఈ సమావేశానికి తెలంగాణ సీఎం కే చంద్రశేఖర్ రావు, బీహార్ సీఎం నితీశ్ కుమార్ మినహా అన్ని రాష్ట్రాల ముఖ్యమంత్రులు హాజరయ్యారు.