మూవీ రివ్యూ: "సీటీమార్"

సంపత్‌ నంది డైరెక్షన్ లో గోపిచంద్‌, తమన్నా హీరోహీరోయిన్లుగా నటించిన "సీటీమార్" సినిమా నిన్న థియేటర్లలో విడుదలయ్యింది.

కథలోకి వెళ్తే.. ఆంధ్రా మహిళల కబడ్డీ జట్టు కోచ్‌ గా ఉన్న కార్తీక్ (గోపీచంద్) స్పోర్ట్స్ కోటాలో బ్యాంకులో ఉద్యోగం చేస్తుంటాడు. కడియంలో తన తండ్రి స్థాపించిన రామకృష్ణ స్కూల్ మూతపడే పరిస్థితి వస్తుంది. దాంతో స్కూల్ సమస్యను పరిష్కరించుకోవడానికి కార్తీక్ తాను తీర్చిదిద్దిన కబడ్డీ జట్టుని జాతీయ స్థాయి పోటీల్లో గెలిపించాలనుకుంటాడు. ఆ జట్టు ద్వారా ఊళ్లోని స్కూల్ సమస్యను వెలుగులోకి తీసుకురావాలని నిర్ణయిస్తాడు. ఆ ప్రయత్నంలో అతనికి ఎలాంటి అడ్డంకులు ఎదురయ్యాయి? తన జట్టు జాతీయ స్థాయి పోటీల్లో విజేతగా నిలిచిందా? కార్తీక్ ఆశయం నెరవేరిందా? తెలంగాణ కబడ్డీ జట్టు కోచ్ జ్వాలారెడ్డి (తమన్నా) కార్తీక్‌ కి ఎలా అండగా నిలిచిందో తెలియాలంటే సినిమా చూడాలి. ఈ సినిమాలో మాస్ మసాలా అంశాలు ఎక్కువగా ఉన్నాయి. ఫస్ట్ హాఫ్ సరదా సన్నివేశాలతో సాగిపోతుంది. సెకండ్ హాఫ్ పూర్తిగా ఢిల్లీ, కబడ్డీ, మాఫియా నేపథ్యంలో సాగుతుంది. క్లైమాక్స్ లో గోపీచంద్ మార్క్ ఫైటింగ్స్, మరోపక్క కబడ్డీ ఫైనల్ మ్యాచ్ ఆకట్టుకుంటాయి. ఈ సినిమాకు కబడ్డీ ఆట నేపథ్యం ప్లస్ పాయింట్ గా చెప్పొచ్చు. గోపీచంద్‌ యాక్షన్ ఘట్టాల్లో ఆకట్టుకున్నారు. జ్వాలారెడ్డిగా తమన్నా తన అందంతో ఆకట్టుకుంది. సౌందర్ రాజన్ కెమెరా పనితనం, మణిశర్మ పాటల్లో సీటీమార్‌, జ్వాలారెడ్డి బాగున్నాయి. దర్శకుడు సంపత్ నంది పక్కా మాస్ సినిమాను తీశాడు. కథనంపై మరింతగా దృష్టిపెట్టాల్సింది. డైలాగ్స్ ఆకట్టుకుంటాయి.

ప్లస్ పాయింట్స్:

- కబడ్డీ నేపథ్యం

- గోపీచంద్, తమన్నా నటన

- ఫస్ట్ హాఫ్, మాస్ అంశాలు

మైనస్ పాయింట్స్:

- కథనం

- ప్రేక్షకుడి ఊహకు తగ్గట్టు సాగే సీన్లు