by Suryaa Desk | Sun, Apr 28, 2024, 10:27 PM

ప్రస్తుతం అమెరికాలో అధ్యక్ష ఎన్నికలు జరుగుతున్నాయి. డెమోక్రటిక్ అభ్యర్థిత్వం కోసం ప్రస్తుత అధ్యక్షుడు జో బైడెన్ పోటీ పడుతుండగా.. రిపబ్లికన్ పార్టీ తరఫున అధ్యక్ష బరిలోకి దిగేందుకు మాజీ అధ్యక్షుడు డొనాల్డ్ ట్రంప్ పోటీ పడుతున్నారు. అయితే ఆయా పార్టీల్లో బైడెన్, ట్రంప్ ముందువరుసలో ఉన్నారు. ఇక ఈ ఏడాదిలో జరగనున్న అమెరికా అధ్యక్ష ఎన్నికల్లో వీరిద్దరే పోటీలో ఉండటం ఖాయంగా కనిపిస్తోంది. ఈ క్రమంలోనే తమ ప్రచారంలో ఇద్దరు నేతలు దూసుకెళ్తున్నారు. ఇందులో భాగంగానే తాజాగా ఇచ్చిన ఓ ఇంటర్వ్యూలో అమెరికా అధ్యక్షుడు జో బైడెన్ తన వ్యక్తిగత జీవితం గురించి కీలక విషయాలు వెల్లడించారు. ఒకానొక దశలో మద్యానికి బానిస అయ్యానని.. ఆత్మహత్య కూడా చేసుకోవాలని అనుకున్నట్లు వివరించారు.

1972 అనేది తన జీవితంలోనే అత్యంత దారుణమైన సంవత్సరం అని జో బైడెన్ పేర్కొన్నారు. ఆ ఏడాది 30 ఏళ్ల వయసులో తన మొదటి భార్య, కుమార్తె కారు ప్రమాదంలో చనిపోయారని తెలిపారు. ఆ ఘటనతో తాను చాలా బాధపడ్డానని.. మానసికంగా తీవ్రంగా కుంగిపోయినట్లు తెలిపారు. అదే బాధతో మద్యం అలవాటు అయిందని.. అప్పటివరకు మద్యం అలవాటు లేకున్నా చివరికి దానికి బానిస అయ్యానని పేర్కొన్నారు. ఇక చనిపోవాలని అనుకున్నట్లు వివరించారు. బ్రిడ్జి మీదికి వెళ్లి పై నుంచి కిందికి దూకి ఆత్మహత్య చేసుకోవాలనే ఆలోచనలు వచ్చేవని తెలిపారు.

ఆ సమయంలోనే తనకు ఉన్న ఇద్దరు కుమారులు గుర్తొచ్చి ఆగిపోయేవాడని అని గుర్తు చేసుకున్నారు. అయితే జీవితంలో ఎన్ని కష్టాలు వచ్చినా ఆత్మహత్య లాంటి పిచ్చి పిచ్చి ఆలోచనలు దగ్గరికి రాకుండా చేయాలని సూచించారు. భార్య, కుమార్తె చనిపోయిన తర్వాత.. కొన్నేళ్లపాటు ఒంటరిగానే ఉన్న బైడెన్.. తన ఇద్దరు కుమారులను చూసుకున్నారు. ఆ తర్వాత సంరక్షణ చూసుకున్నారు. తన భార్య చనిపోయిన కొన్ని రోజుల తర్వాత జిల్‌తో పరిచయం ఏర్పడిందని.. అది కాస్తా ప్రేమ, పెళ్లికి దారి తీసినట్లు చెప్పారు. 1975 లో తొలిసారి తాను జిల్‌ను కలిసినట్లు చెప్పారు. అప్పుడు తన వయసు 33 అని.. సెనేటర్‌గా పనిచేస్తున్నట్లు చెప్పారు. ఆ సమయంలో జిల్ వయసు 24 ఏళ్లు అని.. ఆమె ఫైనల్‌ ఇయర్ చదువుతోందని వెల్లడించారు. ఇక 1977లో జిల్‌ను జో బైడెన్ రెండో పెళ్లి చేసుకున్నారు.

ఇక అదే ఇంటర్వ్యూలో మాజీ అధ్యక్షుడు, తన ప్రత్యర్థి డొనాల్డ్ ట్రంప్‌కు జో బైడెన్ సవాల్ విసిరారు. ట్రంప్‌తో చర్చకు సిద్ధమని ప్రకటించారు. బైడెన్ సవాల్‌ను వెంటనే స్వీకరించిన ట్రంప్‌.. ఎక్కడైనా, ఎప్పుడైనా ఓకే అంటూ కౌంటర్ ఇచ్చారు. అమెరికా అధ్యక్ష ఎన్నికల ప్రక్రియలో పోటీ చేసే అభ్యర్థుల మధ్య చర్చ అనేది కీలక పాత్ర పోషిస్తుంది. దేశంలో ఉన్న కీలక అంశాలపై వారు అభిప్రాయాలు వ్యక్తం చేస్తే.. వాటిని ఓటర్లు గమనిస్తూ ఉంటారు.