by Suryaa Desk | Sat, Nov 23, 2024, 08:07 PM

కొన్ని నెలల క్రితం జరిగిన ఆంధ్రప్రదేశ్ అసెంబ్లీ ఎన్నికల్లో తెలుగుదేశం-జనసేన-బీజేపీ కూటమి ఎంతటి విజయాన్ని నమోదు చేసిందో దేశం మొత్తం చూసింది. జనసేన అధినేత పవన్ కళ్యాణ్.. కూటమి విజయంలో కీలక పాత్ర పోషించారు అని చెప్పడంలో ఎలాంటి అతిశయోక్తి లేదు. ఏపీ ముఖ్యమంత్రి, తెలుగుదేశం పార్టీ అధినేత నారా చంద్రబాబు నాయుడు స్వయంగా ఈ విషయాన్ని చెప్పడం విశేషం. అయితే ఎన్డీఏ కూటమిలో కీలక నేతగా ఎదుగుతున్న పవన్ కళ్యాణ్‌కు బీజేపీ హైకమాండ్ కీలక బాధ్యతలు అప్పగించింది. మహారాష్ట్ర అసెంబ్లీ ఎన్నికల్లో భాగంగా కొన్ని చోట్ల ప్రచారం నిర్వహించాలని బాధ్యతలు అప్పగించడంతో పవన్ కళ్యాణ్ మహారాష్ట్రకు వెళ్లి ప్రచారం చేశారు. ఇక మహాయుతి అభ్యర్థుల తరఫున పవన్ కళ్యాణ్ ప్రచారం చేసిన స్థానాల్లో ఇప్పుడు వారు ఆధిక్యంలో కొనసాగుతుండటం విశేషం.

మహారాష్ట్ర అసెంబ్లీ ఎన్నికల ఫలితాల్లో ఎన్డీఏ కూటమి విజయం దిశగా దూసుకెళ్తోంది. బీజేపీ-షిండే శివసేన-అజిత్ పవార్ ఎన్సీపీ కలిసి మహాయుతి కూటమిగా పోటీ చేయగా.. ఆ కూటమి ఇప్పుడు గెలుపు ఖరారు చేసుకుంటోంది. ఈ నేపథ్యంలోనే మహారాష్ట్రలో మహాయుతి కూటమి తరఫున ప్రధానమంత్రి నరేంద్ర మోదీ, కేంద్రమంత్రుల దగ్గర నుంచి అనేక మంది ప్రచారంలో పాల్గొన్నారు. తెలుగు రాష్ట్రాల నుంచి తెలంగాణ సీఎం, ఆంధ్రప్రదేశ్ డిప్యూటీ సీఎంలు మహారాష్ట్రలో ప్రచారం నిర్వహించారు. ఈ క్రమంలోనే జనసేన అధినేత, ఏపీ డిప్యూటీ సీఎం పవన్ కళ్యాణ్ ప్రచారం చేసిన చోట్ల మహాయుతి కూటమి అభ్యర్థులు లీడింగ్‌లో కొనసాగుతున్నారు.

మహారాష్ట్రలోని అనేక చోట్ల పవన్ కళ్యాణ్ ప్రచారం చేశారు. వివిధ ప్రాంతాల్లో నిర్వహించిన బహిరంగ సభల్లో ప్రసంగించారు. సనాతన ధర్మాన్ని రక్షించాలని, బీజేపీ కూటమి అభ్యర్థులను గెలిపించాలని ఈ సందర్భంగా మహారాష్ట్ర ప్రజలకు పవన్ కళ్యాణ్ విజ్ఞప్తి చేశారు. మహారాష్ట్ర ఎన్నికల ప్రచారంలో ముమ్మరంగా పాల్గొన్న పవన్ కళ్యాణ్ అక్కడి తెలుగు ఓటర్లను మహాయుతి కూటమికి ఓట్లు వేసే ప్రయత్నాల్లో సఫలం అయ్యారు. పూణే కంటోన్మె్ంట్, బల్లార్‌పూర్, షోలాపూర్, డెత్లూర్, లాతూర్ రూరల్, హదప్సర్, కస్బా పేత్ ప్రాంతాల్లో పవన్ కళ్యాణ్ ఎన్నికల ప్రచారాన్ని నిర్వహించారు. వీటిలో ప్రస్తుతం ఎన్నికల ఫలితాలు వెలువడుతున్న పూణే కంటోన్మె్ంట్, బల్లార్‌పూర్, షోలాపూర్ నియోజకవర్గాల్లో బీజేపీ కూటమి అభ్యర్థులు ముందంజలో ఉన్నారు. ఇక డెత్లూర్, లాతూర్ సీట్లలో మహాయుతి, మహా వికాస్ ఆఘాడీ కూటముల మధ్య హోరాహోరీ పోరు కొనసాగుతుంది. ఈ స్థానాల్లో కూడా మహాయుతి అభ్యర్థులదే విజయం అని పేర్కొంటున్నారు.

పూణే కంటోన్మెంట్‌లో బీజేపీ అభ్యర్థి కాంబ్లే సునీల్ ద్యాన్‌దేవ్ 35 వేలకు పైగా ఓట్ల మెజార్టీలో ఉన్నారు. బల్లార్పూర్‌లో బీజేపీ అభ్యర్థి సుధీర్ సచ్చిదానంద్ దాదాపు 25 వేల ఓట్ల ఆధిక్యంలో ఉన్నారు. హదప్సర్‌లో ఎన్‌సీపీ క్యాండిడేట్ చేతన్ విఠల్ తూపే 20వేలకు పైగా మెజారిటీతో కొనసాగుతున్నారు. కస్బా పేత్‌లో బీజేపీ అభ్యర్థి హేమంత్ నారాయణ్ రసానే 20వేలకు పైగా ఓట్ల ఆధిక్యంలో ఉన్నారు. డెగ్లూర్‌లో బీజేపీ అభ్యర్థి అంతపుర్కార్ జితేష్ రావుసాహెబ్ 25వేలకు పైగా ఓట్ల మెజార్టీలో ఉన్నారు. ఇక చివరిగా లాతూర్ రూరల్ స్థానంలో బీజేపీ అభ్యర్థి రమేష్ కాశీరాం కరద్ దాదాపు 30 వేల ఓట్ల ఆధిక్యంలో ఉన్నారు.